广播224 弄堂茄山胡 拍拍满满浸粽箬

广播224 弄堂茄山胡 拍拍满满浸粽箬 2012-06-20 14:33 来源：新民晚报 作者：陈日旭 新民网编辑：王玲 　　【新民晚报·推荐】为啥今年端午节来得介晏【e】？原因是今年农历闰四月。端午节，民间还俗称“端阳”。因为是农历五月初五，有两个“五”，所以又叫“重五”、“重午”。虽名称交关，但以“端午”为正宗。 　　我从小生长辣下只角石库门老弄堂里。葛末，老弄堂里过端午节，我是记得蛮清爽个。端午前几日，楼下天井里向，差勿多人家侪用大木盆，拍拍满满浸好裹粽子用个“粽箬”【niK】（箬叶）。楼下头有个叫小毛娘个阿婆，是远近有名个裹粽高手。搿个几天，伊是忙得勿得了。东家喊，西家请，叫伊拉帮忙。侬勿要看小毛娘后脑勺梳着“乌龟团”（发髻），走路慢吞吞，出手倒老快个，勿管品种是白米粽、赤豆粽，还是枣子粽、鲜肉粽，也勿管式样是三角粽、小脚粽，还是枕头粽，只见伊两只手翻过来翻过去，“三下五去二”，一只只粽子包出来，大小一洛式，卖相弹眼落睛。当然，小毛娘勿会白费力气，请伊包个人家，等一歇侪会送几只烧熟个粽子拨伊拉，作为谢意。搿能一来，小毛娘大丰收，自家屋里就用勿着再包粽子了。且年年如此，成了街坊邻里个常规。 　　其实，阿拉小人对吃粽子倒也无所谓，摆辣心浪向个是，两只眼乌珠的溜溜转，盯牢啥人家脚盆里粽叶阔，叶瓣长，等主人家稍不留神，就偷拿几片，卷起来用线一扎，做小喇叭吹。做得越大，声音越响，越神气。特别大个做成海螺样，吹得“呜呜”响，真是扎劲。端午节搿天，大人会跟孩子额角头浪用调好个雄黄粉划一个“王”字，有个还辣胸口涂个“虎”字。弄堂里一帮小鬼头，个个成了“王老虎”，嘴里吹着粽叶喇叭，垃拉弄堂里个弹格路上奔来奔去。一出汗，雄黄字受潮，变得糊踏踏，面孔弄得像“鬼夜壶”，大人看了，又好气，又好笑。还有抱辣手里个小小人，爷娘辣伊手腕浪挂丝线扎个菱形小粽子，看上去五颜六色，里向包个是朱砂、雄黄、中药香料粉，一股味道有点刺鼻，实际是驱虫排毒派用场个。小人有迭个“护身符”，可保健康平安。也有大人挑一只上等个咸鸭蛋，用专用网兜套好，吊辣小人头颈浪，作为一种习俗。勿瞒侬讲，搿辰光，一连吊好几天，也舍勿得吃脱唻。另外，姆妈还会从小菜场买回一束菖蒲、艾蓬，挂辣辣门边，用伊散发出来个清香气味，阻止害虫飞进门。迭个习俗交关好，一直沿袭至今。 　　端午还流传不少谚语。有一句一直挂辣阿奶嘴巴【bo】浪：“吃了端午粽，还要冻三冻。”意思讲，过了端午，还会有冷空气来袭，勿要急于汏脱绒线衫之类个厚衣裳，要防一脚个。搿些老话，我也记得蛮牢……