广播专辑 周立波海派清口19 笑谈滑稽界老前辈1

广播专辑 周立波海派清口19 笑谈滑稽界老前辈1 乃末应该讲我就是受迭个阿拉姚老师搭周老师影响最大，特别是阿拉周老师，阿拉周老师是对我人生观价值观有重大影响力个人。乃末老先生应该讲随老阿拉姚老师走脱以后啦，阿拉周老师辣辣去年三月份已然仙逝,.....迭个是阿拉话剧界个勿幸，但是后来想过来也相通了，周老师个离去哦，虽然阿拉上海少了一份欢笑，但是我坚信天堂一定会多一份快乐，大家讲是勿是？周老师，伊拉掌声送拨侬个，周老师姚老师。娜侪应该听到，谢谢谢谢。 阿拉周老师对我影响实在忒大了。首先，伊个为人。阿拉周老师啊，阿拉周老师从我认得周老师到一直到周老师个离开阿拉，我从来呒没看伊发过火过。随后对伐伊搿种冷面滑稽对我影响老大个。伊个逻辑思维能力老强。哎，毕竟是书生，迭书究气个滑稽啦。伊伊侬根本就勿晓得伊后头要讲句啥闲话，伊啪一跳就出来了，忒多了搿种事体。侬比方讲，我搿个辰光搿个阿拉勿是练功阿拉是科班出生阿拉要练毯子功。要练芭蕾搭民俗。迭个辰光呢我是四只小翻接着落地没落好，嘭嘭嘭嘭嚄屁股落地，哦哟，搿记落得结棍哦，我我尾椎骨折粉碎性骨折，所以我到现在搿搭侪歪个。因为没办法梆石膏修正个。歪个！疼哦，疼了半个号头，搿现在还歪个，我朋友讲哎立波侬裤子有点歪个。我讲裤子没歪，屁股歪个。真个，葛侬讲侬讲马上马上到医院里去看，医生讲哦哟掼了是蛮结棍个。啊碎脱了，下头碎脱了，但覅紧个伊讲，搿地方没啥问题个。伊讲，就石膏勿好绑嘛，啪伊帮我贴了一张麝香户骨膏，贴好以后么照样演出唠，帮阿拉周老师跑龙套。也辣美琪。乃末跑了龙套，演出，搿辰光勿到屋里向去汏浴个呀。总归辣搿搭汏好浴回去，乃末周老师汏浴个辰光呢我搭周老师一道辣汏，周老师汏过浴 ：“哟！哟小鬼啊，侬触祭饱了，侬没事体后头封脱啥体啦。”我讲：哦哟哟哟，人家也有打烊呵。啊周老师有劲哎。对伐？伊想得出个哦，侬想的来越想越好白相。 侬比方讲伊讲：搿辰光辣辣阿拉团里向，辣辣84年85年个辰光，哦，哎84年85年个辰光，就一人发两条西装。搿勿得了了，1984年一人发两套西装，搿辰光阿拉滑稽剧团老有钞票哦。发两套西装，然后再发只气压式热水瓶。迭个周老师蛮噱头，因为搿个辰光我一直住辣姚家嘛。搭伊拉一道面包车回来个。周老师上去响也勿响。伊出噱前头呒没动静个晓得勿。头睏辣嗨。“迭个，小鬼啊，葛唠我伲滑稽剧团搞勿好睐。”我问周老师啥事体啊？啥物事勿好发！发只气压式热水瓶。我讲：周老师，气压式热水瓶老贵个，有啥勿好啊。“咦？勿好呀！侬拿气压两个字脱我脱我脱我读起来拿拿伊读得慢点，分开来，葛唠当中覅断脱。耶，读”葛末我读睐。气.......压.... “哎！哪能勿死。”我勿晓得搿是伊辣辣捉弄我否则我绝对跑脱。 搿辰光文革辰光几只戏好演滑稽戏勿好演个。只好演一个钟头叫叫叫革命戏。葛末阿拉周老师正好搿个辰光呢演一只戏叫东进东进。立向有个指导员,当中一场戏，一场戏枪毙叛徒。周老师演搿指导员。搭搿个叛徒不期而遇，“我代表人民判处你的死刑！啪！”迭个辰光室内唱，呒没啥个外头特技音效个。侪是后头长工拿辣火药子。“我代表人民，判处你的死刑！啪！！”出事体了晓得伐？周老师：”我代表人民（枪一指叛徒）叛侬死刑”没响呀！（动作再来一遍）还是没响。葛末尴尬睐。周老师一点也勿尴尬。“咦，我今朝迭个枪是哪能啦？”（说着，把枪转向自己要看看究竟）啪！！！！憨脱哦，一般人憨脱哦。周老师讲句啥闲话晓得伐？“没打着！”摒！再拿搿叛徒敲死脱。叫阿拉老早就昏过去了。 比方搿个辰光伊讲：小鬼啊，葛唠老古闲话啦勿是每句侪有道理个。小鬼啊，葛唠伲唱下去啦，要讲究一种气氛。(咳嗽）呒没气氛覅唱。搿唠人家讲迭个哦哦笨鸟先飞，侬先飞一定到得了个啊？迭句闲话勿对个！葛唠伊先飞，伊也是一只笨鸟。葛唠伊就是笨鸟虽然先飞啦，葛唠也勿一定到。我问：搿是为啥？“咦，好理解个，因为伊是只笨鸟，飞是先飞，葛唠方向飞反脱了。”