介绍:
唐家湾
2017年清晨，“万有全唐家湾小菜场”里，喧闹中百味混杂。北方大厦对过个胡梯浪向，已经人轧人。望下看，摊连摊，贩挨贩，向南绵延三百余米，大小弄堂数不胜数四通八达；单胡梯上去个室内市场，也堪称品种齐全，物美价廉。
箇搭是大上海顶早个小菜场，没“之一”两字，建于1903年。而大约莫100年前，替小菜场一般年纪个庄锡庆也来到了此地，见到了与现在相当个繁华。
庄锡庆指垃小菜场东首个空地，对伊个父亲讲：“就迭搭，我房子造好，将来买小菜赛过霞飞路介便当。望东有白云观，朝南有惠中堂，走走侪弗到廿分钟。我天天去拜，仙人或者上帝总归会得保佑我生意吧！”
庄锡庆个父亲讲：“其他侪好，但不过伊拉讲斜桥南是坟墩。有眼近，风水弗大好吧？”
庄锡庆讲：“迭个有啥啦？讲近也有段路要走唻。人总有一天要翘辫子个，离坟近，我个子孙送我葬还省得遠唻。”
“侬隻小鬼头只有几岁啊？”庄父嘲嘲伊，“葛侬预备房子造啥样子？”
庄锡庆答：“必须是洋房，三层，顶少要十几间。我花園里要种一棵白玉兰，子子孙孙看到树，侪可以想起我。”
庄父继续嘲：“小鬼掼派头阿？侬将来结之婚也只有两家头，要介许多房间发痴？”
庄锡庆胸一挺，讲：“我要养大兒子、二兒子、三兒子……我每个兒子还要大孙子、二孙子、三孙子……我还怕房间弗够多唻——到辰光要伊拉一淘送我葬！”
庄锡庆个房子后来就造好了，但伊並没葬垃上海，推测伊客死他乡。垃拉箇个几十年里，庄家命运起起落落，历经富足殷实、生离死别、骨肉失散、天各一方。单论其中某桩事体，侪未必稀奇。但上海弗晓得有多少条“锡庆”里，每条“锡庆”里，侪有得一位“庄锡庆”叹息过。箇个也作兴是阿拉上海人个公共记憶？
大家还在听
