介绍:
大家好，我是小搞老师，今朝我要搭大家讲一只故事，故事个名字叫《老虎拔牙》。
辣盖(在)森林里向，住了交关(许多)小动物。有的一天哦，来了一只大老虎，伊(它)个牙子(牙齿)老尖哦！伊要吃人哦！小动物看到伊全部吓煞脱咾(都吓死了)！
小猢狲讲：“老粗个一棵树哦，老虎拿牙子一啃，‘咔嚓’一记，就断脱了！”
小白兔讲：“吃树有啥啦？铁杆子伊咬起来像吃面条子一样个！吓人伐？”
小狐狸辣盖旁边讲：“㑚(你们)侪吓老虎个牙子啊？我就勿吓！我要拿伊牙子全部拔光！”
“吹牛皮！吹牛皮！”小猢狲，小兔子全部笑话小狐狸。“哼哼，㑚勿相信啊？ 㑚看辣盖！”
小狐狸就去寻大老虎了，伊带了老大个一包礼物。“啊！尊敬个老虎！听讲侬吃肉吃腻脱啦？侬看，我帮侬带了世界高头最好吃个物事(东西)————糖！”
“糖是啥物事啊？”老虎从来呒没吃过呀！伊接过一粒糖，就往嘴巴里向塞......“哟！介(这么)好吃啊！”乃末老虎就命令狐狸每天带一包糖来。
第二天，小狐狸又带了一包糖过去......第三天，第四天，第五天，老虎吃了一包又一包糖。连睏觉(睡觉)个辰光(时候)哦，糖还含了嘴巴里。
就搿能介，老虎每天侪要吃交交关关糖。“我是一只大老虎，咿呀咿呀喂！我吃糖勿刷牙子，咿呀咿呀喂！”
终于有一天，老虎捂牢嘴巴，叫起来了。“哎哟，我个牙子疼煞了！啥人来帮帮我啊！哎哟哟哟，疼煞了！疼煞了！”
老虎来到医院里向，伊要寻马医生。“快点拿我拔牙子！”马医生敢拔老虎个牙子啊？伊吓得唻门也勿敢开。老虎又去寻牛医生，啥人晓得牛医生老早就逃脱了！
哎哟！老虎个面孔肿起来了，疼的唻穷叫！“啥人拿我个牙子拔脱，我就让伊做大王！”
搿辰光小狐狸来了，笑眯眯个讲：“我来帮侬拔牙子好伐？”“哦哟，谢谢侬！谢谢侬！谢谢侬！”老虎捂牢嘴巴。
狐狸一看老虎个嘴巴就叫起来了哦“哦哟勿得了！侬个牙子侪要拔光！”“啊？只要勿疼，拔就拔伐！”
乃末小狐狸就开始拔老虎个牙子了，嘿哟！嘿哟！拔脱一颗又一颗。最后，狐狸拿老虎个牙子全部拔光了！
搿只老虎呒没牙子唻！乃变成瘪嘴老虎唻！伊讲闲话还漏风哦！伊帮狐狸讲“对对对！还是侬最好！送畀我糖，还帮我拔牙子！谢谢侬！谢谢侬！”
老虎个牙子全部拔光唻！再也吃勿到小动物唻！小动物再也勿吓老虎唻！最后伊拉辣盖森林里向快乐个生活！
好，今朝个故事讲好了。小朋友要少吃眼糖，夜到记得刷牙子！再会！
大家还在听
