介绍:
小猪猡读书了，哇呜老师脾气老好个
猪猡爸爸对唏哩呼噜讲:“侬勿好老是辣辣屋里调皮捣蛋 应该去读书了。”
小猪猡也欢喜背了书包去学堂。但是啊，伊听到老师居然是一匹大狼。吓得唻伊喉咙也尖了，“我勿去！我勿去！要去㑚去！”
猪猡太太讲:“覅紧个！哇呜老师脾气看好个，一眼也勿凶个。马阿姨屋里个小白，也辣辣挨面搭上课个。”
唏哩呼噜勿相信，有啥个狼会得脾气老好啊？勿可能个好伐？伊跑得去问小白。
小白搭伊讲:“还可以，老师嘛总归有点凶个。阿拉爸
爸发脾气个辰光用后脚蹬我唻！哇呜老师好可以，顶多碰两记台子。”
“呃，会得咬人伐？”
“勿咬个，伊假使气的发急了，最多拿牙子龇出来，吓吓阿拉。讲伊是一只大狼！”
“哦，蛮凶个嘛！”
“嗯。样子看上去是蛮凶个，不过阿拉侪勿吓伊个，覅紧个。”
第二天，小猪猡唏哩呼噜还是跟牢小白一道去读书了。一路浪向，伊个心情侪老紧张个。
一歇歇功夫，伊拉到了，大狼老师正辣辣学堂门口头等伊拉，老远个地方，小猪猡一看见大狼老师，吓得唻“我的妈！”一记头迓到一棵树后头。小白回头朝牢伊讲:“覅紧个，侬覅吓！”
小猪猡讲:“勿来三个，我认得搿只狼个。有的一趟伊拿我叼了跑了，还要拿我分开来装进伊三个小人个肚皮里向唻！”
小白一记头笑起来了“侬瞎讲啥物事啊？哇呜老师最欢喜吃烘山芋。再讲，伊呒没小人个好哇？”
搿辰光，哇呜老师也看到伊拉了。伊叫了一声“小白，早浪向好！”
小白拉牢唏哩呼噜，一道走过去。大狼老师朝唏哩呼噜鞠了一躬。伊讲“啊！又有新同学来啦！欢迎欢迎，侬叫啥名字啊？”
小猪猡回答“我叫唏哩呼噜！”小猪猡心里向吓了勿得了，搿只狼帮拿伊叼了跑个埃只大狼先生长了像透像透！简直就是一式势样。不过，面前搿只狼好像稍微要瘦一眼，面孔看上去也交关和气。埃只大狼先生根本就勿会得笑个好伐？面孔一直板辣嗨个好伐？搿辰光，又有交关小学生走过来。哇呜老师豪稍朝伊拉鞠躬，帮伊拉讲“早浪向好！”
小白拉牢唏哩呼噜走到教室里，搭伊讲“哪能啊，我讲个伐？勿是侪蛮好！”
小猪猡讲“哪能勿是学生子对老师鞠躬，反过来老师要对学生子鞠躬啊？”
正好有的一只小狐狸有了伊拉背后头，小狐狸得意洋洋个讲“好叫好伐？侪是阿拉养活伊哎！伊勿鞠躬哪能来三啊？”搿只小狐狸名字叫丁丁，伊个爸爸就是埃只开点心店个狐狸老板。小猪猡认得狐狸老板个，但是伊勿晓得丁丁就是伊个儿子。
教室呢，就是哇呜老师自家蹲个房子。等到学生子基本上侪到了，哇呜老师就跑进来，立辣前头问大家“同学们啊，㑚个学费侪带了伐？”
小白跑到讲台前头，从书包里拿出来两块烘山芋。
哇呜老师讲“哇，烘山芋！哟，还是热个！哦对勿起！”伊来煞勿及个抓牢两块烘山芋急吼拉吼个转过身，“嗯...嗯...”等伊转过来个辰光，两块烘山芋侪呒没了！哦哟，就像变魔术一样个。
哇呜老师拿出一块绢头，揩揩嘴巴。“呃！对勿呃!对勿起！我昨日夜里夜呃！夜饭呒没吃。”
唏哩呼噜迓迓较问小白“老师哪能啦？”
小白讲“好像是吃了忒快，有眼噎牢了。看到伐，我就讲老师最欢喜吃烘山芋。”
小猪猡跑上去，拿出一只淡馒头，摆辣讲台浪向。小狐狸丁丁伊拉也一个接牢一个拿吃个物事送上去。丁丁朝小猪猡讲，淡馒头算啥！我送个是点心！伊从书包里拿出一只纸头袋袋，哗啦啦，淅力索落倒出来交关点心个边角料，屑屑头，芝麻唠啥。还有两只蟑螂。哇呜老师一看，要拿蟑螂拎出来厾脱。伊拉自己就嗖嗖嗖逃脱了。
哇呜老师帮丁丁商量，“就装了纸头袋袋里伐？覅倒出来了。”
丁丁讲“搿勿来三哦，我还要派用场唻！”伊往纸袋袋里吹了一口气，再捏牢袋口。拎到老师鼻头前头，用力道一拍。“砰”一记！声音老响，“哦。。。哈哈！”学生子侪辣辣下头起哄。
两只小羊，一只猴子，一只小熊，还有一头小牛，伊拉也带来了自家个学费，有个是一根胡萝卜，有个是一把黄豆，还有个是两只铜板。每个学生子送物事个橙辰光，大狼老师侪会得朝牢伊鞠躬。
“谢谢，谢谢大家！”伊拿出来一只小篮头，拿物事侪放进去。不过啊，看起来哇呜老师顶顶欢喜个还是铜板。伊一看到两只铜板哦，眼乌珠锃锃亮。豪稍囥进自家的袋袋里。
大家还在听
