介绍:
《小猪唏哩呼噜》
第廿九集，真假小猪猡大师
兔子太太帮狗太太讲，“乃末侬到马路浪向买物事要当心哦。昨日夜里向，阿拉弄堂里个猫老太婆辣辣走路个辰光拨强盗抢了！强盗抢脱一只马夹袋，还辣辣伊个大腿高头咬了两只洞！搿只强盗还讲了一自家个名字哦！伊自称‘野猪猡大师’！”
后头啊，狗太太拎牢小镬子去买馄饨个辰光。帮毛驴老板讲“猫老太婆走了路浪向拨强盗抢了！搿只强盗覅忒凶哦！勿但拿猫老太婆个皮夹子，抢脱！还辣辣伊大腿高头凿了两刀！搿强盗，是猪猡大师！”哎哟小朋友，㑚讲讲看，搿闲话七里传八里阿是搞勿好啦？本来是马甲袋，乃变成皮夹子。本来只不过咬了两只洞，乃末直接变成凿了两刀！野猪猡大师搿个‘野’字也呒没了，直接变成猪猡大师了。
再后来，毛驴老板帮来伊摊头吃馄饨个猴子太太搭羊先生讲“猫老先生辣辣路浪向拨强盗抢脱一万块洋钿！钞票抢脱还勿算哦，搿强盗还辣辣伊个胸口凿了两刀！听讲搿个强盗就是猪猡大师！㑚讲，阿会得就是唏哩呼噜啊？”
猴子太太搭羊先生又去对人家讲。搿闲话传来传去，最后啊就变成了，“唏哩呼噜为了帮伊拉爸爸买一部汽车，夜里向拿了把刀出去当强盗！抢脱了猫老先生个十万块洋钿！还用刀差点拿伊凿煞脱哦！搿小人本来勿是蛮好个嘛！哪能会的做出搿牌事体呢？真叫是‘学好三年，学坏三天’啊！”
搿闲话传到了猪猡先生个耳朵里，猪猡先生完全勿相信唏哩呼噜会的做搿牌事体！但是啊，伊还是拿伊个宝贝儿子辣辣较吃了顿生活！伊一边抽唏哩呼噜个屁股，一边讲“哪能伊拉侪勿讲别人家屋里个小人，偏偏讲侬！说明侬搿只小鬼也有问题！”
村子里个人，侪辣辣传搿桩事体。伊拉交头接耳，看到猪猡先生过来了，就豪稍压低声音，鬼黜黜个讲搿桩事体。搿老让伊掼面子哦！要晓得哦，猪猡先生是一个老体面个人。
过了两天，又传开来一只消息，“猪猡大师半夜里翻到超市里向去，拿苹果，香蕉，大生梨，番茄，萝卜，塌棵菜，吃了只精精光！”猪猡先生又请唏哩呼噜吃了一顿‘茅竹板子敲肉’！
唏哩呼噜搭自家讲“搿能介下去勿来三哦！搿能介下去我要拨打煞脱了！”伊决定去寻寻搿个冒牌个‘猪猡大师’！也勿光是为了自家勿再拨吃生活。除暴安良本来就是大师应该做个！伊再是真正个‘猪猡大师’！
天黑了之后，小猪猡唏哩呼噜拎牢根木棒头，从屋里溜出去。伊迓迓较走了路高头，四周围一片安静，伊只听到自家个心跳声。“扑通，扑通，扑通。”
辣末生头，一只模子老大个人影子从边浪向跳出来！朝伊叫“喂！覅动！野猪猡大师辣辣此里！”
搿只声音响的唻，就像打雷一样哦！小猪猡直接拨吓得朝后头掼了只跟头，手里向个棒头也落脱了。搿只老模子弯腰朝小猪猡看看，笑了，“哦，原来是我个亲眷！快起来！快起来！”
小猪猡爬起来，先拿木棒子抓辣手里。伊看搿只家伙好像蛮和气个嘛，你讲“啥人是侬亲眷啊？侬哪能冒充...冒充...”伊本来想讲“侬哪能冒充小猪猡大师！”但是第一，人家前头明明讲自家是“野猪猡大师。”第二，搿只赤佬个模子大的唻，搭伊拉爸爸差勿多，外加看上去壮了勿得了！嘴巴两旁边还龇出两根老尖老尖个长牙子！威风凛凛！看上去实在是比自家更加像一个“大师”！
“我啥人也呒没冒充！我就是野猪猡大师！”搿只老模子心平气和个讲，“能够碰着侬实在忒好了，侬看上去白白胖胖，日脚肯定过得老好！侬肯定勿晓得夜里向睏了辣马路浪向是啥个味道！”
“碰着也呒没用！我再勿认得侬搿种亲眷唻！侬抢脱猫老先生十万块洋钿，还辣辣人家胸口凿了两刀！”
“嗯？侬瞎讲啥物事啊？搿帮我搭啥个界啊！”
“覅装戆，就是侬做个！”
野猪猡大师觉着老委屈个，“冤枉啊！啥个猫老先生！啥个十万块！啥个凿了两刀！侬看我有刀伐？勿相信侬搜搜看！侬好歹还拿牢根棒头！我连根筷子也呒没好伐？埃天夜里我肚皮饿煞脱了，碰着个老太太。大概是只猫！手里拎了一只马夹袋。但是我肯定，伊勿是一个先生！先生应该勿会得介小气个。伊个马甲袋里向有的点心。我看到伊一边走一边吃，就上去问伊讨一块。搿只老太真是只坑子！随便哪能也勿肯拨我吃一块！我就讲‘葛末就半块伐。’半块伊也勿肯！后头我也急了，就辣辣一个伊个大腿高头咬了一口！拿袋袋抢下来就跑脱了！伊个搿只马夹袋里向哦，连一只角子也呒没！”
“嗯就算是搿能好唻，侬搿也是拦路抢劫！再讲侬勿是还翻到人家超市里向，拿人家个素菜搭仔水果侪吃光了？”
野猪猡大师点点头，讲“嗯，是有搿能一桩事体。但是我有啥办法呢，我肚皮饿呀！不过一人做事一人当，我勿是辣辣墙壁高头写了几个字嘛‘野猪猡大师到此一吃’！”
“侬抢物事，还偷物事，侬算啥个大师啊！”
“大师勿是应该劫富济贫个嘛？”
“但是侬，侬济贫，哪能侪济到自家头高头个啦？”
“葛末我问侬，我贫伐？侬好讲我勿贫？辣辣此里一块我还呒没看到啥人比我更加贫！好了好了！侬屁闲话覅在多了！快点领我到侬屋里去伐！”
“到我屋里去做啥啊？”
“去睏觉啊！侬看，已经介晏了！侬总勿好意思让我睏辣马路高头伐！啥人叫阿拉是亲眷呢！”
“葛末侬要先承认侬抢猫老太太，还有偷超市个事体侪做错脱了！”
听到搿句闲话，野猪猡直接冲上来，对准小猪猡个大腿就咬了一口！小猪猡痛的唻“吱”一记叫起来！
野猪猡讲“看了侪是亲眷个面浪向，我还呒没用多少力道！快点带路！”
小猪猡叹了一口气，“哎，好伐。”野猪猡摇摇头，讲“㑚搿帮城里向个人啊，最难打交道！小家败气！还好我长了一副好牙子！”
其实啊，唏哩呼噜带伊带回去呢，一半是因为觉着伊睏就搿能睏辣马路高头蛮罪过个。伊打算明显带伊去城里向寻眼生活做做。搿能一来末伊也勿会得去偷，去抢了。小猪猡讲“过脱歇到了我屋里，侬快点进我个房间，覅让阿拉爸爸看到！”
“㑚爸爸算老几啊？伊个牙子有我个接棍伐？伊敢拿我野猪猡大师哪能？”
“呃，勿敢拿侬哪能，但是肯定敢拿我哪能个。我肯定要拨吃生活个！”
“啥！随便打人啊？搿哪能来三！侬放心！伊假使打侬，我帮侬咬伊！野猪猡大师就是专门管搿牌事体个！”
“哎哎！侬覅瞎乱上哦！”
回到屋里向。唏哩呼噜迓迓较拿野猪猡领到了自家房间。伊问“侬夜饭吃过了伐？”
“还呒没！我正好想问侬要物事吃！”
“但是侬刚刚勿是就讲过来是睏觉个嘛！”
“一道讲，怕侬吓得唻勿让我来！做事体嘛，当然要一步一步来！到了侬屋里，侬还会得勿拨我吃饭？”
小猪猡溜进厨房间，帮客人端的来满满一笼淡馒头。野猪猡呱哒呱哒搿吃头势接棍啊！一歇歇功夫，拿一笼淡馒头统统吃光！接下去伊还勿过念头，咔擦咔擦，拿搿只蒸格也几口头吃下去了伊讲！
小猪猡呆煞了“啊？侬，侬哪能连蒸格也吃下去啦？”
野猪猡揩揩嘴巴，讲“勿搭界！我个牙子接棍，吃只蒸格有啥啦！”
“侬是勿搭界呀！葛末我哪能办啦？明朝早浪向阿拉妈妈寻勿着蒸格，还勿是要寻我算账！”
野猪猡手一挥，“明朝个事体明朝再讲！现在先睏觉！”
小房间只有一张床，野猪猡讲“我睏床，侬睏地板！我好几个号头呒没睏过眠床了！”
“搿张眠床侬勿好睏个，因为...”
“㑚城里向个人，就是小气！”伊跳上来又是一口，咬了小猪猡“吱”一记又叫起来了。咬好，伊勿管三七廿一直接跳辣床高头睏下来。呒没想到搿只眠床“嘎吱嘎吱轰隆隆”一记头坍脱了！变成功了一片碎木头。野猪猡大师辣辣高头睏了一歇讲“侬搿只床一眼也勿灵，又膈腰，又凿屁股！还是侬来睏伐！”讲好，伊一只翻身滚到地板高头，马上就“呼呼”睏着了。
第二天大清早，小猪猡搭野猪猡讲，“侬覅再去抢人家物事了，我带侬出去寻生活。侬可以到小饭店里向去端盘子，汏碗盏。”
野猪猡摇摇头，讲“勿来三，伊拉侪讲我戆头戆脑，只配蹲辣乡下头种地！哎，阿拉老家个人侪讲城里向个钞票老好赚个！一进城就可以发财！啥人晓得是搿副氽头势！”
小猪猡讲“我认得一块地方，伊拉需要做生活个人，侬跟我过去，肯定可以赚到钞票！到辰光，阿拉就可以买交关好吃个物事了！”
野猪猡一听，马上来了精神，“好，侬教我哪能做，我做侬个徒弟！”
正好搿个辰光，猩猩阿二拎了一只水果篮，从院子外头，准备走进来。伊听到野猪猡个闲话，想“搿只小猪猡本事哪能介大，又从啥地方收了一个徒弟？”
伊跑到院子里向，看到野猪猡搿个样子，吓了一跳！“哦哟，搿只家伙个身胚，好像比老棕熊还要接棍嘛！”伊吓丝丝个，常怕搿只野猪猡对伊勿客气，伊就帮小猪猡讲“嗨嗨嗨，小猪猡大师啊，今朝天气勿错哦！侬最近身体哪能啊？”稍微客气讲句，伊就准备走了。临走你还准备拿水果篮带了跑，伊勿敢再留下搿只篮头惹事体哦！
但是伊刚刚跑到门口头，野猪猡就追出去，朝牢猩猩阿二个大腿，辣辣较咬了一口！“喂！拿物事放下来！”
猩猩阿二痛的唻“哇”一记，掼下篮头，一跷一跷逃脱了！
“我讲伐！㑚城里向个人就是小气！”野猪猡大师拎牢篮头走回来，嘴巴里讲，“明明来送礼个，送到一半后悔了，还想拿回去！啥地方介便当啊！”讲好，伊从篮头里寻出来一只苹果，辣辣裤子高头揩了两记，就往嘴巴里向塞。小猪猡豪稍拦牢伊“覅吃！我勿想收伊个礼物！”
“啥！”野猪猡先冲上去咬了小猪猡一口，小猪猡痛的唻“吱”一记叫起来！“死开！”野猪猡讲“侬勿收，我收！”伊一边讲，一边“拉吧拉吧，呱哒呱哒”拿篮头里向个香蕉，苹果，大生梨还有各种各样个水果侪吃脱了！吃好还勿过念头，伊又拎起搿只篮头，打算拿篮头也吃脱了伊讲！
呒没想，伊对牢篮头咬下去之后，伊个两根又长又尖又硬个大牙子有眼眼歪脱了伊讲！“搿是哪能回事体啊？”野猪猡大师觉着勿对头，伊豪稍拿手去摸摸自家个牙子，伊搿能介一模末，两根长牙子一记头落辣地浪向，发出“叮叮当当”个声音！
“搿勿可能！”野猪猡发急了，哇啦哇啦穷叫，伊搿能一叫，又是“乒乒乓乓”一阵响！伊满口个牙子统统落下来了伊讲！
“搿勿可能！！”野猪猡叫的更加凶了！但是搿个辰光伊个嘴巴里向已经一颗牙子也呒没了，讲闲话一直朝外头漏风！“我连石头都咬的碎，哪能搿篮头会得拿牙子掐断脱！”
大家还在听
