介绍:
《小猪唏哩呼噜》
第三十集，小猪猡大师打遍天下无敌手
搿天夜到，小猪猡唏哩呼噜刚刚睏着呒没多少辰光，就有一个人拿伊个被头捎开来，用力个拉伊个小尾巴。
唏哩呼噜睁开眼睛，看到是小猴子皮皮，伊又拿被头蒙牢头，哼哼唧唧个讲“侬做啥啦？让我睏觉呀！”
皮皮讲“侬搿个懒猪猡，派派还是啥个大师！侬晓得伐？猩猩阿二当了强盗，现在拿小兔子琳琳捉牢了，要抢伊个钞票！”
唏哩呼噜听到搿搭，豪稍跳起来！一边穿衣裳，一边问，“辣辣嚡里搭？”
皮皮讲，“辣辣吊煞鬼弄堂！”
小猪猡看看窗门外头，外头墨黜乌里黑，啥个也看勿出！伊又一屁股坐下来讲，“侬吹牛皮！介晏了，琳琳勿会得出来个！”
“我吹牛皮？明明是侬听到辣辣吊煞鬼弄堂，吓得唻勿敢去！还讲人家吹牛皮！”
“瞎讲好伐！我会得吓鬼啊？上趟我还帮鸡太太捉过赤佬唻！”
“葛末侬就是吓猩猩阿二！”
“瞎讲，我吓伊？明明是伊吓我！伊每趟看到我侪要鞠躬，侪要讲小猪猡大师啊，侬饭吃过了伐？”
“既然侪勿是，葛末阿拉就走呀！小兔子琳琳老急个，伊叫我来寻侬，讲只有能才救得了伊！”
“伊真个搿能介讲？”
“当然咾！覅吓！要是猩猩阿二真个敢动手，还有我唻！”
小猪猡头颈一硬，“走！”
伊拉两家头出了门，就一路飞奔，一口气跑到了吊煞鬼弄堂。但是小猪猡一回头，咦？小猴子皮皮人呒没了！小猪猡喊了好几声，“皮皮，皮皮！”侪呒没人回答。
天浪向个月亮又大又圆，像只白灯笼，吊辣半空当中。
弄堂里向像煞有啥人辣辣哇哇叫，还有人辣辣“嘤嘤嘤”个哭。小猪猡三步两步走进去，就看到猩猩阿二手里拿了把老大个西瓜刀，辣辣小兔子个鼻头面前晃来晃去。
“嘿嘿，豪稍拿钞票拿出来，否则我就勿客气了！”
小兔子两只手拉牢自家两只长耳朵辣辣揩眼泪水，揩的唻两只耳朵侪湿光了！“呜呜呜，我真个呒没钞票！”
小猪猡一记头冲上去，指牢猩猩阿二讲“侬帮我停手！”
猩猩阿二吓了一跳，伊一看是唏哩呼噜来了，快点拿西瓜刀朝地高头一厾，对牢唏哩呼噜鞠了一躬，讲“啊，原来是唏哩呼噜大师啊，侬饭吃过了伐？哦，侬出来兜马路阿是啊？侬看，今朝夜里个月亮多少好啊！”
唏哩呼噜真希望小猴子皮皮也辣辣伊身边，就好了。伊朝前面又走了一步，讲“侬辣辣搿搭做啥！”
猩猩阿二面孔笑嘻嘻，点头哈腰个讲，“呒没啥事体，真个呒没啥事体！搿个小妹妹迷路了，我问伊屋里住辣嚡里搭，好送伊回去！但是侬看，伊勿讲闲话，就晓得哭！”
小猪猡大师问“侬让伊拿啥物事掏出来！”
“呃，我是讲钞票。啊，是搿能桩事体。我准备叫部差头送伊回去，我就问问伊，带钞票了伐？假使呒没带末，我先帮子垫一垫！”
小兔子琳琳搿辰光讲“伊，伊吹牛皮！”
小猪猡大师讲“侬看，人家讲侬吹牛皮！”
猩猩阿二嬉皮塌脸个讲，“咳！我就吹牛皮了！哪能！我就是要抢伊个钞票！侬好拿我哪能！”讲好，伊笑嘻嘻个“啪！”拨小猪猡辣一记耳光。小猪猡一眼防备也呒没个，拨打了朝天就是一跤！坐辣地浪向呆脱了了！
猩猩阿二讲“哼，侬当我真个吓侬啊！我凭啥道理要吓侬？就因为老棕熊是侬个徒弟？啊呸！我老里八早就晓得了！人家是拿侬当皮球了！侬还真个当自家是人家个师父啊？”
小猪猡强调，“我呒没讲过我是伊个师父咾！”
猩猩阿二讲“侬还要赖，侬勿是讲个嘛，寻侬个徒弟来收作我！哼就会得吹牛皮！还跑到鸡老太婆屋里向号称自家会得捉鬼！啥个捉鬼，搿只鬼就是侬个好朋友装个！”
小猪猡讲“我去个辰光根本勿晓得个好伐？我真个勿晓得！”
猩猩阿二眼乌珠一瞪，“侬还要赖咾！我再请侬吃一记耳光好伐？侬还吹牛皮，讲埃个野猪猡大师也是侬个徒弟！其实啊，人家一高兴，就请侬吃生活！侬当人家个徒弟，人家还覅唻！伊是吃了我带来个酸桔子，满口个牙子才落脱个！讲起来还是我帮㑚村子里除脱搿只坏蛋好伐？侬倒蛮好，到处讲牙子是侬用棒头一只一只敲脱个！”
小猪猡觉着老委屈个“是伊拉自家瞎传八传！我从来呒没搿能讲过！”
猩猩阿二讲“啥个狗屁猪猡大师，明明就是只草包饭桶好伐！”伊搿一顿臭骂，拿唏哩呼噜讲得是一钿也勿值！伊讲“侬讲，侬是只草包饭桶！侬讲！侬讲了，我今朝就放侬跑！侬假使勿讲，我今天就拿侬敲瘪脱！讲！侬讲伐”
小猪猡辣辣地高头，迓迓较看了小兔子琳琳一眼，琳琳也焦急个盯牢伊看！
小猪猡一记爬起来，伊想“琳琳介相信我，迭迭为为叫我来救伊！我一定要拿出眼大师个样子！勿好让伊失望！”
猩猩阿二一看，小猪猡又立起来了，伊喊“还敢立起来！侬帮我横下来！”伊撩起来辣一脚！小猪猡拨踢的唻，像只气球一样个，直接飞起来，朝牢墙壁飞了过去！伊虽然佝头缩颈像只气球哦，但是眼看就要撞到墙壁个辰光，伊个两只脚辣末生头伸出来，往墙壁浪向一蹬！
猩猩阿二搿一脚踢好，伊认为小猪猡定规会得“砰”一记撞了墙壁高头，直接昏过去，四脚朝天个横辣地浪向！
伊随便哪能也呒没想到，小猪猡竟然为得反弹回来，“咚”一记头，撞了伊个胸口高头！猩猩阿二闷哼一声，仰面朝天，倒下去了！
小猪猡大师四平八稳个立辣地高头，笑笑，伊讲“是侬自家踢到了自家，再来！”
猩猩阿二彻底光火了，伊一直翻身跳起来，拿起边浪搿把西瓜刀，对准仔小猪猡个头就砍下去！
小猪猡眼乌珠也勿霎，头一笡。搿把刀直接砍辣伊个头颈高头！就听到“当”一记，刀就像砍辣铁高头一样，还冒出了交关火星！再看小猪猡个头颈，连一点点个印子也看勿到！
反过来看猩猩阿二搿边，伊搿把西瓜刀“当”一记，直接拨震的唻朝后头飞出去，“噗”一记凿辣墙壁里向，搿只瘪三自家也拨震的唻虎口也破脱了，手臂把酸的唻伊“哦哟哦哟”叫了半日天！
小兔子琳琳开心个穷拍手，小猪猡大师立辣笔笔挺，朝牢猩猩阿二讲“搿趟也勿算，侬个西瓜刀刀柄脱滑了，阿拉再来！”
猩猩阿二趁小猪猡讲闲话个功夫，用足力道，又打出一拳！眼看看搿只拳头就到打到小猪猡个鼻头了，小猪猡一记头消失了伊讲！猩猩阿二一看哪能人呒没了啦！但是伊已经收勿牢脚了。搿个辰光小猪猡勿晓得哪能已经到了伊个背后头，顺势朝伊个背脊一推！猩猩阿二跌跌冲冲个朝前头跑了两步“哎哎哎哎......咕咚！”掼了只“狗啃泥”！
搿一跤掼了勿轻！猩猩阿二趴辣地高头哼哼唧唧，半日天都呒没爬起来！小兔子琳琳开心的唻勿晓得哪能才好了，伊蹦蹦跳跳个冲过来，辣辣小猪猡个面孔浪向狠狠个香了一记！
小猪猡有眼难为情，面孔也红了。伊搭小兔子讲，“阿拉走伐，我送侬回去！”
伊拉走出去呒没多少远，猩猩阿二就爬起来了，伊迓迓较跟辣伊拉屁股后头！等跑了近了，伊突然之间像一阵风一样个扑上去！小猪猡大师像煞背后头有眼睛一样哦，眼看猩猩阿二就要扑到伊个背脊高头了，一再一记头蹲下来！猩猩阿二脚扳到伊个身浪向，又掼下来了。搿趟，小猪猡真个生气咾！伊讲“侬搿只赤佬真无赖！我一直勿还手，侬倒呒没底了对伐？对侬客气当福气咾！”
搿句闲话讲好，伊拎牢猩猩阿二两只毛茸茸个脚，朝天浪向一甩！猩猩阿二直接飞起来，飞过了交交关关屋顶，也勿晓得飞到嚡里搭去了。
边浪个琳琳看了呆煞了！伊讲“侬...侬力道哪能介大啊！”小猪猡谦虚个讲“也谈勿上！武功搿种东西，有辰光也勿是光凭力道大，巧劲也老重要个！借对手自家个力道打伊自家！”就搿能介，伊拉一路讲讲笑笑，从吊煞鬼弄堂走到了大马路高头。搿个辰光，马路高头竟然立满了人，拿介阔个马路统统立满！看到小猪猡出来咾，马上就有人喊“搿只断命个小猪猡出来了！”
小猪猡定睛一看，哇哇叫个人就是猩猩阿二！猩猩阿二叫好，伊背后头又窜出来一个模子老大，身体老壮个家伙！搿只家伙粗声粗气个讲“我也有的一笔帐，要搭侬算算清爽！侬撞碎脱我个头号大冬瓜！让我拿勿着飞天牌摩踏车！要勿是猩猩阿二讲拨我听，我还当侬是只洗足球唻！”搿个凶了勿得了个人，就是老棕熊先生！
伊个闲话还呒没讲光，又有一个长相老吓人个家伙，推开人群走出来！“侬搿只死勿脱个臭猪猡，上趟侬开了一枪，吓的唻我拼仔老命逃，最后足足让我饿了三天三夜！今朝看侬还往嚡里搭跑！”居然是月牙熊先生伊讲！
月牙熊先生跑到老棕熊先生面前，搭伊搀了一把，讲“兄弟侬好！搿只小猪猡今朝我也勿会得一家头独吞！等脱歇拿伊一扯两，阿拉一人一半！”
小兔子琳琳吓煞脱了，伊用力个拉牢小猪猡个手臂把，声音也发抖了，“阿...阿拉快点逃伐！”
搿辰光，又有一个龇了两根长牙子个家伙跑出来！冲牢小猪猡就喊“认得我伐？侬搿只小赤佬！要勿是侬勿让我抢劫，我就勿会得跑到侬屋里！要是我勿到侬屋里，我就勿会得吃桔子！要我呒没吃桔子，我就勿会得酸脱我满口个牙子！今朝我要帮侬算总账！”哦，野猪猡大师也来了！
伊跑到猩猩阿二前头，忒伊也搀了一把，“谢谢侬，阿二先生！要勿是侬出钞票帮我镶牙子，我就完结了！新牙子硬了勿得了，今朝我就拿搿只小赤佬开刀！咬拨侬看！”
猩猩阿二笑嘻嘻个讲，“勿客气勿客气，阿拉共同努力！”
伊拉几个人搿能一闹末，周围看闹猛个人更加起劲了。立辣后头个人侪拼命个朝前头轧！小猪猡安慰琳琳讲“覅紧个，侬覅担心！”
伊朝前头跨了两步讲，“屁闲话覅多了！㑚自家选，是单打独斗还是一道上！”
搿四个人还呒没回答，就看到一个穿仔西装，背脊有点呴个大模子跑出来。
伊朝所有个人鞠了一躬，一板一眼个讲，“大家夜里向好！我是稀里哗啦大饭店个骆驼经理。请大家多多关照！为了支持阿拉搿块地区个武术运动！本大饭店特此开设擂台。想打相打个侪可以上擂台去比赛！拿到第一名个，可以获得阿拉稀里哗啦大饭店特制个一吨重个超级大蛋糕一只！本大饭店个搿只大蛋糕经过国际多位美食家鉴定，已经超过外国同类产品，味道到底有多少好，一吃就晓得！大家听了侪鼓起掌来，能打个人侪想赢到搿只大蛋糕不！勿能打个乃，侪想看到人家打个鼻青眼肿！搿动物城个居民伐，侪有搿只毛病，就是特别欢喜看人家打相打！要是一天呒没看到人家打相打，伊拉连夜饭也吃勿下去！”
大家还在听
