特别节目：端午节三门风俗

五月初五端午节，是民间个传统节日。本来寔古越先民一直都有个习俗，落脚套得屈原得，应该寔一种附会。 三门端午有“无啜端午粽，寒衣不可送；啜过端午粽，寒衣远远送”个俗语。端午一过，便进入一年里向顶热个天卦爻，也是各种虫、蛇顶兴个时节。 端午箇日，份加份人家头都在门口头插菖蒲剑对茼艾，蛮多坞荡便单样茼艾插插过，前门、后水门都插。菖蒲个叶长拔拔、扁耷耷，望来对剑样。茼艾个叶散花花，望来对旗样。为之讲有箇种讲法：“蒲剑斩千妖，艾旗招百福”。 屋里还要挂香袋。香袋做来五颜六色，范子各异，有对粽样，有对绣球样，里头香粉囥得，挂眠床头或者衣橱外头，是讲有驱邪个作用。 小佬人手臂筒得还要系五颜六色个丝线，俗称“端午壮”，寔管顾小人快长快大用。早年听讲屋里有女对嫁出，娘伯还要送小鸡、蒲扇、布帐箇落物事。 箇日日昼，屋里都要挭雄黄烧酒，喷门脚、墙脚得，还在小人个眼角头、耳朵横搨点得，以驱虫避邪。还有啜雄黄烧酒个习俗，古老都讲能解百毒。且识得雄黄烧酒有毒性，还是少啜点。 当然，端午顶无之少个便寔粽爻。有馅红枣个甜粽，也有馅猪肉个咸粽，还有何物都不加个白粽。会装个人家头，还麦糕炀来，麦焦筒来，热热闹闹，对过年样。