香港小吃花头景1

3月12号 芒果甜心聚宝盆 投稿 “香港点心” 香港小吃额花头景 讲起广东，第一桩事体嚒就是吃，早浪厢九，十点钟，一帮子老广东们，拎之小包，拿份报纸就去茶餐厅吃早茶。嗰早茶不单单是去吃茶，还有交关可咸可甜额小点心。一般情况下头，小点心一份是三只，伐清爽为啥，叫啥我就嘞嗨嗰高头吃过瘪，忒亲眷吃早茶，阿拉四介头，广东老爷叔端茶倒水邪气客气，菜也上嘞佬快额，第一盘虾饺，嗰色面，嗰卖相，让人馋唾水哒哒滴，要吃嘞，刮三唻，四个人，三只虾饺，嗰哪能嘎分法子，叫啥我硬劲，畀其中一只虾饺一分两，台面廊讲嘛，小阿姨啊，可能大菜师傅投五投六，少做一只，格么我跟侬一人一半，旁边姨父阿爸姆妈，侪伐敢动筷子嘞，我只好满脸陪笑，等老广东上后头一只点心，点心一盘盘端上来，每一盘高头触里触掐摆了三只尴里不尴尬额点心，从虾饺开始，一直到艇仔粥结束，除忒粥以外，流沙包，榴莲酥，叉烧包，蛋挞，侪一式事样，三只，三只，反正嗰顿饭切了有眼殟塞，回到屋里厢，姆妈责怪我唻，三只拿能分啊，下趟勿要去了，戆噱噱嘅，好唻，我也勿敢翻毛腔，只好闷忒吃瘪。后首来，我就脑子生根筋，再去吃早茶。点双份，但是还是老尴尬额，本来想扎台型额，我芒果作东，请客吃饭，搞得来，抠嘞勿得了，三只四个人切，坍招势喔，最后我得出一个结论，茶餐厅三嘎头去切鼎鼎嗲来，一人一只，又上台面。阿爸姆妈再也没批评过我。但是到现在我也唔嚒搞懂，为啥一份点心是三只，朋友们，㑚晓得伐？