也讲西洋餐

《也讲西洋餐》 作者:芒果 刚起西洋餐，我第一个想到泰晤士，小辰光每趟经过，总归会得停下来，往店里厢看，里厢么红鼻头，绿眼睛额老外，啊么穿了涕里塌拉额垃圾瘪三，只有西装笔挺，打扮时髦额老爷叔忒子老阿姨，还有得谈旁友的小青年，伊拉一只手乃刀一只手乃叉子，侠起文雅额，乃斩下来额么事，比如牛肉，比如面包，比如法式焗蜗牛……慢悠悠额塞进嘴巴，伊拉一面切一面讲闲话，因为贴了玻璃窗，我听伐见伊拉刚颜啥，只晓得个种环境，再哇拉哇拉额人，再粗鲁额人，切相再难看，一进个扇门，马上一百八十度度转弯，衣裳拉拉直，轻轻叫走路，慢慢叫讲闲话，面带笑容，头势清爽。每趟经过，吸铁石总归吸牢子两只脚，走伐动，姆妈讲芒果啊，西洋餐厅是有钞票人家去额地方，老高档额，阿拉看看过过瘾头可以来，等弄下趟攒大钞票了，阿拉再进去好伐？我眼烊了伐得了要流出来额馋吐水马上又咽转去。 有辰光做梦阿了了泰晤士里厢切法式焗蜗牛，个米道好切，有辰光又了了里厢点一碗罗宋汤，一份炸猪排，番茄酸溜溜额，猪排酥脆，又香又嫩，老灵额。有辰光，梦里厢，有的搞活动，套餐跌价，我会的点一份，一介头从前菜，主食，切到结束……每趟困醒了，还了了流馋吐水，枕头浪攒是结作。最后还是切伐到。 辰光一天天过去，我也一颜颜长大，一直到现在还记得第一趟切西洋餐，当然咯不是泰晤士，而是必胜客披萨，刀叉用伐来，一开始还难为情，要面子，但是刀叉真额用伐好，个么我就乃出家什，两双半，个切起来过瘾头额，披萨三口两口，面包两口三口，肉酱面三卷四卷，就到肚皮里去了，但是米道真额好，披萨饼皮厚，热气腾腾额，浇头阿老好切额，伊个额披萨，咬了嘴巴里伐硬，轻轻一咬就顺老牙齿，顺老小舌头送到喉咙口，一歇歇攒到胃里厢去了。有几只洋盘，要切薄皮披萨，我切下来，有颜茄门香。因为有种披萨端上来就是温额，胃切不消。所以口感大大打折扣。而且咬额辰光要硬劲拉，像牛皮糖。现在想想做梦是桩老开心额事体，因为伊让我不断朝自家额目标靠近。就像老早忒现在，从眼烊到霞意额切，从贴老玻璃窗望，到坐了里头切，我想这个就是进步伐。 接下来我刚刚蛋糕，雪域抹茶冰淇淋蛋糕，上头洒了厚厚一层抹茶粉，伐会切额人，像我，就八呛老之了。蛋糕要小调羹慢慢挖，特别是冰淇淋奶油蛋糕一口夯，米道甜苦相间，还有的淡淡额茶叶香。春天到了，绿颜色，让我想到地里厢长大额茶叶，忒之炒茶，磨粉。最后加工成做蛋糕额配料，确实功夫深额。了溉必胜客坐了嗨，用调羹搅拌蘑菇汤，奶香沿老嘴巴一直滴到台子浪。咪一口，身体暖洋洋额，好像又了了做梦，好像法国蜗牛跳进蘑菇汤，又好像叉子了了意大利肉沫子面条里厢卷，又好像乃了两只烤鸡翅蘸之番茄酱了了啃…… 梦是伐会醒额，要么有的更加嗲额菜请我切，但是我醒转来，又要跑到另外一只梦里厢起来。切货额梦是一生一世伐会醒额。