台风来了，阿拉勿吓

《台风来了，阿拉勿吓》 作者：芒果 台风来了，勿好放鹞子，勿好开电瓶车，勿好着裙子，还勿好迟到，葛末搭班车好勿啦？也勿好，因为还是要踏脚踏车，乘地铁，坐公交，距离短个，像我，就要跑到车站，搿一路浪向，伞开了花，头发湿脱了，衣裳裤子全部湿光，还有搭树叶子，拨风吹得唻哗哗乱叫，搿个声音老吓人个，好像老天爷勒了光火，又像小朋友耍无赖，赖勒地浪向，哭出乌拉，我老肉麻伊拉姆妈个，小囡邪气难弄，经常一家头搞勿定。葛末台风就像皮大王，一歇歇搿搭闯祸，一歇歇埃面搭拨老师开坏（骂山门），关夜学。苦就苦了阿拉搿眼家长，罪过啊，台风小鬼头，侬又开始翻毛腔啦。侬看看叫侬无天野地做个好事体，上海拨侬搞得唻乱七八糟，屋头顶漏水，人也拨吹得唻七歪八牵，学堂，单位，放假，广场舞歇搁，相亲角全部屋里蹲，梧桐树连根拔起，广告牌，全部拆脱，停止一切娱乐活动。欢乐谷，锦江乐园，世纪公园，植物园，搿眼地方统统关脱。葛末蹲勒屋里厢叫外卖，总归太平了伐，勿一定，外卖小哥开仔橡皮船，笃笃笃，一路狂开，最后侬还啰里八苏，点只坏评，乃末一脚气唻，外卖小哥一天工资报销脱了。乃末侬冤枉鬼叫，饭菜侪冷脱了，本来想好吃现成个，现在还要开伙仓，热饭热菜。小哥末也罪过八腊，一日到夜五斤哼六斤跑上跑落，结果勒了侬搿搭喇叭腔。葛末哪能办，大家退一步，大家理解，大家体谅。做生活也要互相合作，侬勿卖力，我也勿卖力，哪能做得好。今朝，我夜到回转去，已经有搭热菜热汤等牢仔我了，想想大家侪勿容易，为了肚皮，哪怕大风大雨，也要出去做生活，为了小囡，为了屋里，拼死拼活，阿拉也要坚持。台风来了，阿拉勿吓，有搭班车司机等牢仔阿拉，送阿拉上班，有搭清洁工人扫树叶子，铲水，有搭电力师傅保障用电安全，有搭快递外卖小哥，拿饭菜，食品，货色，送到每家人家，台风天阿拉还吓啥，阿拉勿吓了，上海有搭温度，上海人鼎鼎可爱，关键辰光，用实际行动证明台风天，阿拉已经准备好了，阿拉勿吓！