老底仔个文具店

老底仔个上海第四期：老底仔个文具脱仔文具店（下）。 上半段讲到学生个文具，挨下来讲讲文具店伐。现在大概老少有得专门个文具店了伐，MUJI大概可以算半只，淘宝浪应该有得勿少自营店。杜伯伯出国交关辰光了，对现在大上海个商业分布已经呒没啥概念了。 小辰光离开屋里向顶近个文具店叫老胡开文文具店，搿是后首来恢复个店名。当中有段时间叫啥个记勿清爽了。老胡开文辣抛球场个中段，坐西朝东，一边是一家独立个吃食店，另外一边是一间小药房。店堂里向个玻璃柜台像区字形围仔一圈，从左到右，分区摆仔各种勿同类型个文具，柜台一大半个地方摆个侪是大人做生活用个绘图仪器、教学用具咾啥，学生子用个纸头铅笔只占了咪咪小一块地方。因为离学堂近，老胡开文是同学们买文具个第一选择。 再往南走，到南京路浪，搿搭连牢仔有得好几家勿同特色个文具店。辣辣廿路脱仔廿七路个车站后头，有得一家开面老大个文具店，埃个辰光叫向阳文化用品商店。里向个格局脱仔老胡开文差勿多，就是大了一圈；侪靠日光灯撑门面，所以店堂间也亮交关。店堂后头隔仔弄堂还有得一只差勿多大个仓库，杜伯伯哪能会得晓得个呢？因为有一年暑假杜伯伯脱几个同学就辣埃搭做了一天童工，拿一大盒头一大盒头个粗铅笔芯拿出来，分成功三根一卷个小包装，卖一分洋钿。搿样子一天生活做下来末，每个人侪会得拿到一小盒头断脱个铅笔芯，作为工钿。 往西辣鸿仁里口口头，原来是号码机商店。改成功制笔公司门市部以后，普通老百姓就有得机会进去看看最新品种个钢笔、圆珠笔、水彩笔。再后首来搞多种经营（三产），辣便携式打字机最行俏个辰光也卖过飞鱼牌、英雄牌打字机。 再往东，辣同吉里弄堂口有得一家专门卖钢笔个店，店堂间勿小，玻璃柜台里向上下三层侪是各种各样笔杆个钢笔、圆珠笔，蛮奇怪个。再往东辣斜对过个江西路路口，有得一家当时相当上档次个打字机商店，里向卖各种稀奇古怪个打字个机器，有得外文、中文个打字机，还有得机械式个收银机，后首来有了进口个卡西欧、夏普个电子计算器…… 反正埃个辰光搿搭挨一挨二摆辣海个侪是杜伯伯所有看到过个机器里向最高级个了。 年龄辣勿断增长，课外个活动区域也扩展到了福州路一带。辣九十年代末期，杏花楼隔壁还呒没新个文具批发市场之前，马路个搿面有得一爿店堂老浅个美术用品商店，对过是大一眼个百新文具店，往东，过了山东路，后首来又开了一爿卖笔墨纸砚个商店，装修了比较时髦。实质浪，福州路个特色是书店，下趟仔杜伯伯再来脱大家讲讲，老底子文化一条街浪个埃眼书店，有得几家啊，侬肯定从来呒没听到过