国庆身痕报道

据Face.Live国庆身痕报道 国庆进入第三日，据我哋高速公路常驻记者武时隼同崔水晶报道，各处高速公路依然炊烟四起，车龙长度有增冇减，现场真係越嚟越墟冚，由于塞车，导致好多游客冇办法及时到达旅游目的地，全国各处景点收入骤减，已经严重影响到扯动内需嘅逼切需要。 有关部门领导十分重视，当即启动紧急预案，并指示，为咗各位出游群众嘅身心健康，多处高速公路出口紧急搭建帐篷，方便已经三日三夜喺路上冇觉好瞓嘅群众，喺离开高速公路之后啊，可以瞓翻一觉，临时休息点仲提供免费体检，如果发现精神不振屙呕肚痛肠胃不适甚至操身大细嘅司机，即刻罚款扣分，并统一安排冚家大细用大巴护送返回出发地，出游车辆作充公处理。下便请出本台外籍身痕记者武时隼现场报道： 武时隼：大渣姣，我係鬼佬记者“冇时准”，现场我哋睇到随住炒粉游击队炒粉供应摊嘅增加，大家越嚟越方便，而且炒粉摊仲增加品种，并通过炒粉APP自助落单冇人机派送等方式提高服务质素嚟吸引客人，你哋梗系想知道有啲咩嘢餸咧？咩嘢滑蛋虾仁、京都排骨、中式牛柳、西芹鸡柳、红烧豆腐、豉汁排骨、叉烧煎蛋、鱼香茄子、油豆腐、咕噜肉、烟蛋肉、盐焗鸡、金沙骨、葡汁焗四蔬、西西里牛肉、日式照烧鸡、清汤牛白腩、卤水鹅肉拼卤蛋、刁草汁焗石斑......我顶！争啲断气啊，哎，透啖气先哈，崔水晶你嚟讲啦，我去炒翻几味先。 崔水晶：靓仔听众你哋好，我係广州最索嘅身痕记者“吹水晶”，哗！咁多嘢食，犀飞利啊！听讲佢哋除左主打嘅干炒牛河仲供应烧肉鸡、鸡油鸡、叉油鸡、叉切鸡、鸡油鸡切鸡、鸡叉烧肉、烧肉叉烧肉、叉鸡叉油鸡、叉烧油鸡、火腩油鸡、火腩油鸭、油鸡濑、叉烧濑、烧鹅濑、猪肉饭、猪肉叉饭、油鸡饭、油鸭饭、油鸡米、叉烧油鸡米、叉烧米、豉油皇炒米、西炒饭、咸鱼鸡粒饭供应，系啵，好似仲有烧鸡翼啵，哗，好香啊，烧鸡翼我中意食，唔理咁多啦，我都嗱嗱声整翻只先！ 导播飞叔：武时隼同崔水晶你哋搞咩啊，直播紧咖，喂！人呢！？小喇叭啊，係咪博炒啊......大镬啦！突发记者现场走佬事件添，宜家高速公路现场一片混乱啊！顶你个肺！技术！快啲切换翻嚟身痕直播间啦！ 大家好！宜家继续Face.Live国庆身痕报道，据好多现场游客打电话爆料话，由于炒粉游击队嘅服务上乘，菜式繁多，味道虽然差啲，但係噉都好嘅，唔使食咁多嘢啊嘛，咁好彩碰到啲唔干净嘅炒粉摊，食到上吐下泻就当减肥咯。于是乎啊！就搞到好多游客流连忘返乐不思蜀，直呈就当正係旅游景点噉话喎，都唔肯出高速咯。喺呢度，希望有关部门管理好炒粉摊，提高节日出行服务水准，亦敬请各位游客自觉遵守秩序，唔好立乱帮衬街边档啊！Face.Live国庆身痕报道就到呢度，祝大家节日平安，假期快乐，拜拜！