介绍:
广播93 弄堂茄山胡-垃圾股
2012-01-17
来源：新民晚报 作者：钱乃荣
【新民晚报·推荐】证券公司里向坐辣海一帮老太，一道来轧闹猛，每日天来想赚眼小菜铜钿，一头看翻红翻绿，一头信口闲谈。谈发谈发，就从评股票评论到自己个“老公”浪向来了。
搿个辰光一位年纪看上去还勿到50岁个张家妈妈开了腔，一讲就开起无轨电车来：
讲起阿拉个老公，真是只的的刮刮货真价实个“垃圾股”！老实末老实得过分，呒用末呒用来出奇！我也勿晓得啥地方搭错一根神经，年轻辰光拨伊花得去，现在拨伊套牢！我想想我卖相也勿错，长得蛮适意相，人也蛮走得出去，对？
（听者齐声：咸，是呀！）阿拉个“老头子”，过去辣辣厂里，叫回到屋里，像少爷，饭也勿烧，菜也勿买，落得我做了一个全职“买汏嫂”。伊啥个也勿管，还讲“我只负责赚钞票”。其实从前辣国家厂里做生活，脑筋勿要动得个，只消听听车间里个广播喇叭绍兴戏，茄茄山河，一日实足只做四个钟头，流水线上靠上去，靠辣国家身上，结果脑筋越靠越笨。现在是样样侪做勿来。勿要讲电脑打勿来，录像机弄勿来，连电灯暗脱也修勿来！“下岗”回来后，人家侪去动脑筋想办法，做做小生意，摆个小摊头，赚点小铜钱，伊是，一家头孵辣屋里，算有了只电视机，一日开到夜，看末勿看关末勿关，只会浪费电！有一趟，伊叫拿仔一点铜钿，跟朋友一道到外地，去了几天，两手空空回转来，一眼花露水也呒没，像去旅游兜一圈，啥个工作也做勿成，只好闷声勿响屋里向坐了几日天。从此以后，伊再也呒没勇气出去寻铜钿，侬讲伊推板？连上海小男人都勿像，是上海小小男人！人家介绍伊去做高层住宅个门卫，伊去做做看，叫嫌比钞票赚得少，责任重，辰光长，厌气煞，收发报纸拎勿清，做了一个月，回来唻！勿肯再去。
结果辣小菜场浪，托人弄着一只摊位，租拨拉外地人，搿能介赚赚铜钿。伊自家末，只会得，老酒吃吃，麻将搓搓，两桩事体。死辣外面，搓到半夜三更，一只电话打转来，讲勿来睏觉了！侬讲搿只老头子，阿有出息？
自家呒没出息，伊讲自家弄勿好了，指望“小赤佬”有点出息。
所以伊盯牢仔个儿子折磨。伊讲，我已经拨侬看煞，是“垃圾股”，我一定要叫儿子成龙，成为“绩优股”、“潜力股”！乃末勿得了！天天盯牢伊读书读书再读书，考证考证再考证。测验考试勿好勿及格，一勿来三就要骂煞快！再穷也要买教辅请家教，千叮万嘱勿许谈恋爱，脱我好好叫读书，第一步只许做个“原始股”勿准搞七廿三！一定要读大学读研究生考到外国去，振振家声。赛过自家读勿着书，要儿子一道代伊全部读进去，真是“作”煞！
要儿子去做“绩优股”，自家末，还是麻将搓搓，嘻嘻哈哈，甘做“垃圾股”！
垃圾股归垃圾股，着生头里啊，出了一桩事体。
张家姆妈辣一趟洗澡辰光一摸肚皮发现有一个硬块。到医院里一查下来讲作兴恶性要马上开刀，搿叫真急煞仔伊个老公！乃末伊发动了伊脑子里向个全部神经细胞，寻亲眷找朋友，凑铜钿拣佛烧香，请好了名医开刀。肿瘤开到一半，失血忒多，需要马上输血，医院血源紧张，伊马上床浪一躺，血再多也抽拨老婆；又叫儿子考试也勿要去管了，限时限刻报到，儿子个血型正好对上，救了老娘一命。结果诚情感动菩萨，化验下来是为良性，阿弥陀佛，上上大吉，伊总算睏得着觉。以后伊又勿相信护工，亲自每日辣医院病房里陪老婆七七四十九天。
从此以后，搿位张妈妈再也不叫伊个老公为“垃圾股”！
大家还在听
