广播专辑 弄堂茄山胡24b 上海人欢喜乘风凉

闲话闲画 上海人欢喜乘风凉 阿仁 　　文图 / 阿仁 　　上海人欢喜乘风凉，辣大热天里。辣上海个旧城区告老城厢呒没改造之前，大多数个上海人轧拉一道——一条十几只门牌号头个弄堂里可以住进几十甚至上百家人家。住个面积小、住个人头多，碰上三伏天，大家热煞。于是上上下下、前前后后个人家一到吃夜饭前后就侪情愿到大弄堂里、到小马路浪去乘乘风凉。考究一眼个乘风凉事先要做准备个，拎出几铅桶个自来水先把马路个柏油路、或者把弄堂里个水门汀路、石板路冲洗一番。冷水个蒸发会使局部范围里降温勿少。前人浇水，后人乘凉。乘风凉个先头部队常常是一家人、几家人搬出桌椅、搬出饭菜辣此用起夜饭。辣马路边、弄堂里吃夜饭供邻居们、过路人观摩常常会引起小小个闹猛。“萧山萝卜干炒毛豆下饭！”“用酱瓜来炒味道更加好！”“冬瓜汤里还可以笃点笋干……”“咸蛋要去买苏北高邮个……”看个比吃个积极性更高，大家七嘴八舌，有点像现在电视里个厨艺大赛。 　　天色暗下来了。路灯亮起来了。乘风凉个大部队陆陆续续尽数到场。男女老少、拖儿带女个房客们侪搬出了凳椅来占领上风头。小矮凳、长板凳、竹椅、竹榻、篾竹躺椅、帆布躺椅甚至红木太师椅都掮出来了。讲究一点个老先生还泡来了大麦茶、龙井茶，请邻居们大家吃一杯。乘风凉个人常常有几个分中心。阿姨妈妈聚辣一道讲东家长、西家短。爷叔阿爸凑辣一道着几盘车马炮象棋。打扑克牌个一桌朋友常常会扫兴收摊个，因为夜风大个辰光伊拉是捉不牢小台子浪个一堆纸牌个。当然，乘风凉里最最开心个是一群皮小囡。侬迓到东、伊迓到西，辣人堆里白相捉迷藏。少不了有拨爷娘捉牢了吃一顿排头个：“刚刚淴过浴清清爽爽个，现在背心浪又湿答答了。要吃生活啊？”大人骂过山门之后，皮小囡们会识相一段辰光。女小囡更欢喜听鬼故事。拨伊拉盯牢个老娘舅只好答应再讲一只：“……经过外围坟山，半夜里，突然窜出一只吊煞鬼，红眉毛绿眼睛，要扑上来哉……”小姑娘有尖叫起来个，有捂牢耳朵个，更有拔脚开溜个。老娘舅趁势收篷：“吓煞了？葛末明朝再讲了、明朝再讲。” 　　夜半时分，大家散伙。“早点困觉，明朝还要上班读书！”生活辣继续。上海人个生活方式已经大大变化了。搬进新居、住进小区个上海人不再到室外去乘风凉了。热天里上海人乘风凉个习俗像一张风俗画片正辣渐渐褪色，渐渐隐去。不过，我还是有点怀旧个。伊毕竟是阿拉老上海人个一段记忆，又火热又风凉。