广播专辑 弄堂茄山胡36 老底仔个弄堂游戏

老底仔个弄堂游戏 周钰栋 　　文/周钰栋 　　假期里，居委会里个社工组织了小区里个一些青少年白相打弹子，踢毽子，滚铁圈，造房子，跳橡皮筋搿种老弄堂个游戏。辣拉游戏个进行当中，我立辣旁边从头到尾看了一遍，总感到里向个味道勿足。尽管几位社工跑前跑后热心指导，迭些参加活动个小囡还是蹩手蹩脚，洋相百出，看勿出半点感兴趣样子。 　　想想阿拉老底仔，弄堂游戏侪是按照各人个性格、脾气分开来白相个。比如讲，性格搭仔脾气粗野一点个男小囝就喜欢扑辣地浪向打弹子，或者双手拿一只脚抱起来作金鸡独立状搭人家斗鸡，或者骑辣一个人个身浪向白相官兵捉强盗。性格脾气稍微文雅一点个男小囝基本浪就是白相“滚铁圈”搭仔“踢毽子”搿两样游戏了。而像“造房子”，“跳橡皮筋”告“翻麻将牌”搿几样游戏则基本浪是女小囡个专利。 　　老底仔个弄堂游戏勿管侬白相阿里一种侪是老开心个，而且开心得常庄会忘记脱回去吃夜饭，弄得弄堂里一到吃夜饭个辰光就会响起姆妈们个一片喊声；有辰光喊勿应，爷娘索性就直接跑到白相个地方，拎起阿拉个耳朵就往屋里向跑。像搿能介个事体，可以讲每一天侪会得发生。老早阿拉读书个辰光呒没啥个压力，只要学堂里一放学，所有个辰光侪是侬个，一旦功课做好，侬想哪能白相就哪能白相，再讲，爷娘侪忙拉做生活，根本就呒没辰光来管侬，大家侪散养辣拉弄堂里。而且，辣拉一道白相个小囝，要么是自家屋里向个兄弟姊妹，要么是弄堂里一道长大个知根知底个汰鼻涕兄弟（或者叫赤膊兄弟。北方人叫“发小”），有辰光虽然讲相互之间也会得寻点相骂【吵架】，掼上几跤【打架】，但侬看好了，勿出三日，几家头又白相辣一道去了。而且，白相个辰光大家还会得想出各种各样个花头经，用现在个闲话来讲，就是每天有“新意”，侬讲，迭样子个白相会得勿开心？阿里像现在个小囡，勿要讲学习压力大得勿得了，就是跑到外头，风也吹勿得，太阳也晒勿得，更勿要讲要伊拉扑辣地浪向弄龌龊手弄龌龊衣裳去白相了。再讲小囡之间侪勿认得个，看来看去侪是陌生面孔，侬讲哪能白相得起来？就是硬劲拉勒一道白相，相互之间呒没默契，呒没情感个交流，搿种白相也就呒没味道了。所以讲，现在要想拿老早个弄堂游戏继承、发展起来，首先要拿小囡从繁重个学习当中解脱出来，让伊拉个心情来个彻底放松。其次要推陈出新，要辣拉老底仔个弄堂游戏个基础浪再翻出一点适合现在个小囡个心理特点、胃口喜好个花样经来（当然搿种翻新完全可以让小囡自家动脑筋来做）。最后，辣拉活动之前，小囡之间最好有个交流、熟悉个过程，迭能介一来辣拉活动当中相互之间才会配合默契，白相起来也就会有味道了。侬讲是？对于辣拉小朋友当中开展老弄堂游戏搿桩事体个意义，最近我还听到迭能介一种讲法：可以提高小朋友个身体素质，培养伊拉个创新精神搭仔团队协作能力。看来，老弄堂游戏尽管有眼土，还邪气草根，但一旦拿伊提高到教育小囡个战略高度来认识，搿个就是一桩大事体了。