广播专辑 弄堂茄山胡48 登样、标致、资深美女

登样、标致、资深美女 阿仁 　　文图/阿仁 上海保险行业个一个女老总捲了一大笔钞票逃脱了。轰动一时。勿单单是因为伊席卷巨款迓得无影无踪，还因为伊是“美女”。呒没隔多少日脚，伊就被神通广大个警察叔叔辣境外搭牢了。办案个警察后来讲：“谈勿上是啥个美女。与疑犯一照面，长得很普通平常……看见阿拉警察，人就呆脱了。”“美女”搿只头衔最早流行辣体育个足球圈子里。“美女”记者采访洋帅，“美女”记者蹲守球星，“美女”记者与神奇教练“零距离”。以后是“美女”职称大泛滥，各行各业都涌现出来“美女”了。不过大多数个“美女”是经勿起镜头扫描个，一出镜就西洋镜拆穿。“美女”们与西施相差十万八千里，至多是住辣拉东施个贴隔壁，只比丑女登样了一点点。 　　上海闲话里个“登样”是形容漂亮美丽个起跑线，是最低个标准。好看一点个小姑娘、大姑娘、上海人称之为标致。“横弄堂里个阿二头结婚哉。新娘子是本地人，长得瞎标致!老像刘晓庆个!”比标致推扳一点个漂亮，上海人就以上照来形容了。“搭侬个儿子介绍一个女朋友，伊是阿拉个远房亲戚，小姑娘相当上照。保准侬儿子一看就欢喜。”上海闲话里还有以出俏来夸奖长相出众个女小囡个。登样、标致、上照、出俏搿点闲话常常是上了年纪个上海人来讲个，是阿爷、阿娘、爷叔、阿姨们个闲话。到了阿拉一代年轻个辰光，也就是三、四十年前，评判漂亮就用洋泾浜英文“翻司”了。翻司，face，面孔脸蛋个意思。翻司，美。翻司，嗲。翻司，鼎脱了。翻司，呒没闲话了。伊个辰光，上海人都一样穷。一样穷也等于一样富。恋爱、结婚个起步价里呒没汽车、存折和几厅几室个房子。一间亭子间、半间厢房间就够条件进洞房了。登样、上照、翻司正点就是小青年个择偶标准了。再差一点也呒没关系个，娶老婆、讨娘子是为了过日脚，勿是准备好了去拍电影。漂亮，勿好当饭吃。 　　辣伊个年代里，要得到大家个称赞得到“美女”个称号是老老勿容易个。做“美女”个门槛老高个。勿似现在，“美女”辣上海人嘴里已经只等于女人了。“美女”来了，只不过是走进来了一个女同事、女邻居、女客人。真是美女，经过年岁个洗刷也要降级个。曾经称呼单位里一位当年个美女为老一辈美女，人家就动气了。经人点拨才晓得如此情况，应该尊称为“资深美女”。看来上海闲话也辣与日俱进，勿学习点新知识，倚老卖老，也会祸从口出个。讲豁边了，还木知木觉，作孽。