广播专辑 弄堂茄山胡55 煎药

广播149 弄堂茄山胡 煎药 2013-08-19 11:08来源：新民晚报 新民网编辑：田诗雍 作者：马尚龙 　　煎药和熬药只不过是讲法勿一样，事体是一样个事体；讲法不一样，但是艰难程度是一样个，煎和熬合辣一道是煎熬，呒没啥个程度区别。也就是煎药熬药搿能勿容易，是一件很见功力个事情，所以也真有人自知功力不够，但是偏偏相信中药中医，葛末就请中药店送药了。 　　中药店历来是弥散药味个地方，搿个味道勿仅是药房里拉开一只只抽屉侪是一味味药，而且辣中药店个后门，必定有代客煎药送药个工场间。勿必怀疑中药店是否会偷工减料，张冠李戴，侪是老牌子讲信誉个店，童涵春、徐重道，店名就起得厚道，完全可以放心。一帖药，分两次煎，倒辣两只小热水瓶里，早浪一顿，下半日一顿，小热水瓶个药倒辣饭碗里，差不多就是大半碗。医生开几帖药，就要送几天。送药工送到人家个家里，要是辣楼浪，也勿必上楼，双方会有默契，今朝个瓶留下，昨日个空瓶带回去，四个小热水瓶个自动交接可能就辣牛奶箱里。送药工一部自行车到东到西一点也勿会搞错，因为辣热水瓶外面，侪贴了病家个地址名字个。 　　但是真正吃中药个人，还是自己煎药个，特别是有钞票个人家，更是自己煎药——伊拉会叫资深个佣人来做。伊拉会觉得中药房里个药是烧出来个，就是放辣钢精锅里烧20分钟烧出来个，而勿是辣药砂罐里慢慢能个熬出来个。中药讲究三分药力七分心意，药熬得好勿好，直接会影响药个效力。一般人家总是亲人熬药，也勿无道理，当病人喝着自己亲人花了很大功夫煎出来个药时，心里一阵感动，病也就好了三分。 　　煎药是一件难事。煎药一定是药砂罐，而且还要辣药砂锅盖上压一把剪刀，总是有拿病压下去个意思吧。要文火，勿能让药潽出来，也勿能是一大碗，要让药辣药砂罐里慢慢个煎熬慢慢个收水，人就勿能离开半步，一帖药两次煎完，至少也是一个多小时个。即使搿样还是免勿了一眨眼，熬干了，连药砂罐也裂开了。只有搿些年长个主妇，常年吃中药，说起煎药免勿了得意：我伊只药砂罐，用了好几年了，只要人管辣拉，勿会坏个呀。确实是搿能，搿一个药砂罐外层侪是烤干了个黑色药汁，一条条流下来个样子，药砂罐个颜色也已经很深。邻居侪看得到妇人个药砂罐，因为每天煎好药，妇人总是拿了药砂罐走到弄堂里，顺势拿药砂罐里个药渣倒辣弄堂垃圾桶旁个一个角落，葛是要将病送走个意思。