广播专辑 弄堂茄山胡61 崇明芦穄着根甜

广播155 弄堂茄山胡 崇明芦穄着根甜 2012-10-31 15:55来源：新民晚报 新民网编辑：田诗雍 作者：陆茂清 　　芦穄是崇明岛浪个特产，上海人叫甜芦粟。民国辰光就有崇明人垃拉上海马路浪卖芦穄，上海人蛮喜欢个，侪话蛮甜个，《图画日报》专门报道过，还配仔一首诗：，口中叫卖肩上掮…… 　　话了对个，崇明芦穄真个着根甜，梢浪也甜个，甜来像甘蔗。 　　经常有人问，崇明芦穄为啥【ha】能【这样】甜？崇明是由长江上水头带来个泥沙囤出来个，岛浪向个沙夹黄烂泥长出来个芦穄，就是比别拉地个甜。 　　老里八早个辰光，崇明乡下头家家种芦穄，宅门前、屋后头、山头边、沟沿浪侪有的种，大多数自家种自家吃。假使有亲眷朋友来特，主人家连牵（马上）拿仔小尖【镰刀】，追到田里去斫芦穄，搿就像城里人拿水果、糖块招待客人。 　　不论是前面【过去】还是即先，去上海跑亲眷、张【看望】朋友个崇明人，总归要带点芦穄当礼品。主人家是横谢竖谢，话崇明芦穄甜来落，邪气赞，赛过香蕉苹果了！ 　　崇明芦穄个名气越来越响响来划跃跃【名声远扬】，搿倒要谢谢上山下乡个知识青年了。 　　上世纪六七十年代，前后有念几万上海知青，垃拉崇明八个农场里战天斗地，伊特工钿低煞个，吃用开销下来钞票呒得啥个特，回去探亲两手空空又难看相，好了二三分一根个芦穄埃是买得起个。 　　搿辰光乘轮船个差勿多侪是上海知青，人人带仔一捆价廉物美个芦穄上船，有个拎垃手里、有个搿垃臂弯里、有个掮垃肩胛浪，还有两个人扛个了，组成仔一道特别个风景线，见仔爹娘总话带仔崇明特产转来特，一家六门侪开心来。搿样仔一来，交交关关个上海人吃着仔崇明芦穄特，侪晓得崇明芦穄甜味足，登时（等于）脱（给）崇明芦穄做广告。 　　日脚过了飞快，知青大军买芦穄老早过脱个特，带仔芦穄离开崇明个人流又出现特。 　　长江隧桥开通以后，到崇明来白相个上海人越来越多，侪要买芦穄。崇明人是蛮会做生意个，修（摘）脱芦穄叶，削脱根，掰脱梢，剥脱壳落，斩成二三节一段，扎了整整齐齐还生好拎袢，看上去碧蹦爽青【碧绿碧青】邪气适意，上海朋友侪带仔上车，回去自家吃吃送送亲眷朋友。 　　一届又一届“崇明芦穄节”浪，大家抢来【争着】斫芦穄，掰芦穄，有滋有味吃芦穄。有点外地客人还是第一趟吃，啥叫芦穄也勿晓得，只当是呒宁熟个高粱了，吃仔侪话甜来拗【不要】去话伊勿是高粱，饱仔口福又开仔眼界。