广播专辑 弄堂茄山胡62 单档”、“双档”

广播156 弄堂茄山胡 单档”、“双档” 来源：新民晚报 作者：冯济民 新民网编辑：王玲 　　 【新民晚报·推荐】讲起“单档”、“双档”，交关新上海人可能还勿晓得搿个是啥个么事。其实讲穿了老简单，就是面筋百叶包汤。一只面筋、一只百叶包，迭个就叫“单档”。两只面筋、两只百叶包，迭个就叫“双档”。 　　 老早侬到点心店里去吃点心，卖筹子地方点心牌子浪侪写“单档”、“双档”个。勿晓得从啥个辰光开始，侪改写成“面筋百叶包汤”了。大概生怕人家看勿懂。老早吃“单档”、“双档”，顶好个地方勿是啥个大饭店，而是垃拉老城隍庙里向个摊头浪。我记得搿只摊头就垃拉老城隍庙个正门口，搿搭有一排生小吃摊。讲起迭个“单档”。搿只面筋勿是一般个面筋，而是老厚老有嚼劲个大面筋，面筋里向还有一只鲜得来要命个小肉圆。百叶包也老有讲究个，是用薄百叶一层一层老紧包起来，顶顶里向还有肉末，汤是用肉汤做个，上头有眼油水，面筋百叶包汤里还有邪气好吃个线粉。吃个辰光，服务员拿一只铁丝网做个漏斗，里厢摆进去现成做好个面筋、百叶包搭线粉，漏斗摆了热锅子里烫一烫。再盛一碗热个肉汤，拿烫好格面筋、百叶包搭线粉一道倒进去，上头再撒点葱花，一碗“单档”就做好了。根据各人口味，还可以再摆点辣货，味道勿要忒好哦！搿能介一碗面筋百叶包汤，我记得老早“单档”大概2角洋钿一碗，“双档”大概4角洋钿一碗。 　　 我顶早吃“单档”是垃拉屋里附近个淮海中路靠近成都路浪个“老松顺”饭店（成都路高架搿辰光已经拆脱了）。后来经常到老西门“乔家栅”、“大富贵”点心店去吃。难板也到最正宗个老城隍庙去吃一趟。现在我有空仍旧经常去吃“单档”。浦东屋里附近也有“乔家栅”、“大富贵”个连锁分店，不过现在个价钿是要5块洋钿一碗喽。 　　 关于“单档”、“双档”，我觉着迭个勿仅仅是伊个好味道，还有交关值得我回味个美好记忆。