介绍:
广播159 弄堂茄山胡 阿奶亲
2012-05-08 17:08 来源：新民晚报 作者：任丽青 新民网编辑：王玲
老早地介,阿拉屋里向小囡多，经济条件又勿大好，吃牛奶迭桩事体是老稀奇个。我记得阿弟阿妹小毛头个辰光，为了让伊拉吃得饱、长得好，阿拉阿奶每日要熬浓浓个米汤喂拨伊拉吃。搿辰光大米（就是粳米）配给勿多，大人经常吃面粉搭仔籼米。大米除脱来客人一般勿烧，要省下来熬米汤。每天早浪6点多钟，我阿奶就生好煤饼炉烧粥了。烧粥是用一只老大个钢精锅（铝锅），一罐头大米半斤左右，加四罐头水，大火烧开后炉子上盖块铁板小火熬。阿奶就坐垃拉旁边照看，经常乃根筷子到粥里向搅一搅。大概三刻钟以后粥就烧好了，不过还要再焖一刻钟。米汤出锅前头，先垃拉奶瓶里放一眼白糖，再用小勺子拿浮垃拉表面个泡沫撇脱，压末拿上层浓米汤舀进奶瓶。过脱一歇，再摸摸奶瓶勿烫手了，就拨勒阿弟阿妹吃。一瓶米汤勿好一记头吃光，要分两趟，下半天用开水捂一捂再吃一趟。剩下来个粥底我跟大人侪吃一点，有辰光再加一点大饼油条、咸菜腐乳咾啥嗒嗒，一顿早饭就解决了。侬勿要讲米汤比不上牛奶，伊个营养其实并勿推板，阿拉阿弟长得老高个，中学里还是篮球中锋。我生小囡个辰光，阿奶已经80多岁了，伊还硬紧要帮我带小囡。伊常常讲，牛奶勿够吃就吃米汤好了，几个小囡侪是我拿米汤喂大个。我是相信伊个闲话个，米汤除了好营养，还有浓浓个亲情。巴金先生讲过，经历过爱才晓得爱别人，培养爱心就是要从家庭生活开始。
