广播专辑 弄堂茄山胡66 上海走油蹄髈

广播160 弄堂茄山胡 上海走油蹄髈 2012-04-17 15:27 来源：新民晚报 作者：唐瑞清 新民网编辑：王玲 　　 　　【新民晚报·推荐】垃拉中国八大菜系猪肉类佳肴当中，我顶馋上海“走油蹄髈”。辣陌生头一看，覅觉着浑身绛红，油晶光亮，鼓鼓墩墩，有眼吓丝丝，实际浪吃口勿大油个。 　　伊经过清水笃、油锅煼【zou】、笼格蒸，勿再肥膘油腻，而且精肉韧爽、肉皮松绵，还透着浓郁骨髓香气哩，味道邪灵。伊卤酽肉嫩，本帮风味浓醇，上海滩浪几乎家喻户晓。 　　老早点子，外公掌勺大饭店，时常有人请帮忙烧几桌。外公讲红白事个台面浪要末“走油肉”、要末“走油蹄髈”，迭种大菜基本少勿脱，烧搿道菜是伊拿手好戏。伊为掌握搿门绝活，特地去朱家角拜师学艺，埃面是上海“走油蹄子”个摇篮。相传洪武年间，周庄人氏沈万三勤奋经商老快暴富。发迹后嗜好杯觥交错，升平歌舞通宵达旦，每夜单为守卫及打更巡夫者就足足提供十坛老酒搭仔三十盘蹄髈，让伊拉敞开肚皮啖吃。辰光一长，有人感激东家，就拿搿种蹄髈称作“万三蹄”，别名“丁蹄”。万三引以为豪，每趟宴请重要客人，除清蒸鳜鱼、姜汁回螺、熏焖鳝筒等菜肴外，少勿脱“万三蹄”。可是有一趟，辣招待一个官员辰光，听伊诘问：何如拿更夫者食物上台焉？沈万三勿置争辩，叫人端了下去。但万三何等精明之人，岂容“万三蹄”受嘲讽，脑筋一动，决定辣邻县朱家角也砌炉灶。伊搭庖丁携手烹饪弄出“走油蹄髈”，搭原来“丁蹄”佳名齐飞，诱人味蕾。隔年，搿个官员又来了，吃好击掌穷叫“”，临跑还有失风雅顺手带十只回转去，晃晃手头蹄子：叫啥来哉？沈万三灵机应变，因朱家角地处松江管辖，答道：“上海走油蹄髈”。外公讲搿只故事绘声绘色，像自己经历一样，辣屋里每趟烧“走油蹄髈”，总归要讲拨我听。我有常时馋痨虫上来，想叫伊烧拨我吃，外公总归答应爽快：便当…… 　　啥人料到真巧我长身体当口，反倒吃勿着哉。搿个辰光买物事样样凭票，我缠绕外公，伊苦仔面孔两手一摊：拿啥烧啊？平常日脚肉粒屑难落眼。伊讲伊也欢喜吃，现在蒸笼搁置，爪篱废弃，连哪能烧法侪要忘记脱哉。光阴荏苒，外公想吃“上海走油蹄髈”，念想成疾。我看伊躺辣病榻浪神情，心中有了主意，好拉生活已开始转机，农副产品有所亮相，乃末连忙赶到朱家角，勿过等我返回，邪遗憾邪遗憾，伊已闭了口眼。 　　事体过去几十年，眼下国富民丰，“上海走油蹄髈”辣大超市侪有出售,想吃随便买。我天性欢喜吃伊，现在吃，又多仔一个情结，就是多了一份对外公个思念。