广播专辑 弄堂茄山胡68 汤团是自家包个好吃

广播162 弄堂茄山胡 汤团是自家包个好吃 2012-02-07 11:50 来源：新民晚报 作者：蔡小鸥 新民网编辑：王玲 　　【新民晚报·推荐】上海人过年总归要吃汤团个，从初一吃到十五，年再算过好。老早个汤团侪是自家屋里做个。用石磨子磨水磨粉，捏猪油黑洋酥；芝麻炒熟了要用捣臼松烂，做好馅，再好包汤团。 　　我小辰光最欢喜磨水磨粉了，舀上一勺糯米磨几圈，白白个水磨粉沿老磨槽慢慢叫流垃接应个锅子里，等磨好后，再放进布袋用绳子扎牢袋口吊垃拉竹竿浪渧水，做好粉搭水分离后，再可以揉捏搓包下了吃。乃末还根据勿同个口味，包成几十只大大小小勿同形状，摆拉盘子浪，再盖一条打湿个纱布。 　　我总归觉着自家亲自包个吃起来特别好吃。搿种磨糯米个石磨子还勿是家家屋里侪有个，有常时邻舍道里借来借去一家一家排队轮流用。阿拉屋里向人口少糯米也少，葛末磨得就少，过年辰光就问隔壁人家借来用，后首来阿拉爸爸讲，一直问人家借烦煞了，就自家买了一套。从此以后人家就到阿拉屋里来借了。先是隔壁对过人家借，后来弄堂到底人家也来借，再后来名气响了后弄堂人家也来借了。本来阿拉姆妈跟弄堂里笃底个人家勿大搭界，认得个人也呒没几个，现在人家侪认得伊仔，跑进跑出勿打招呼勿来三了。老早过年配给个糯米等物事要排队买个，因为有了一套石磨认得交关人，伊拉再会帮阿拉姆妈搞定，迭个就用勿着排队了，节省了交关辰光。 　　现在过年吃汤团是到超市买几盒现成个回来直接下了吃，少了勿少麻烦，石磨工具已成为灶披间古董了。勿过，超市买来个汤团花头经再浓再透，吃来吃去个，总归呒没自家屋里包出来个香糯。