广播专辑 弄堂茄山胡72 一早上镇孵茶馆

广播166 弄堂茄山胡 一早上镇孵茶馆 2014-06-09 11:00 0来源：新民晚报 新民网编辑：田诗雍 作者：任向阳 　　郊区每个集镇侪有得一两家茶馆，垃上个世纪八十年代前头，农村里向个男老人侪欢喜到镇浪茶馆碰头吃茶。吃茶是伊拉每日天个早功课。茶勿吃，人勿爽。有道是“吃早茶咾汏【dha】肚肠，七话八话寿命长”。 　　乡下头讲起到茶馆里吃茶就叫“孵【bhu】茶馆”。一个“孵”字，话出了老年茶客心里向囥垃海个对茶馆个勿离勿弃个深厚感情，话出了老年茶客慢洋洋笃散散老茄茄个心理状态，话出了老年茶客见过世面品过咸淡之后个稳重性格。 　　乡下老人石录【从床上起来】了早，就是垃寒场里，也是早来勿得了，四点多就出门了。五点钟勿到，天还呒没亮，茶馆店里已经亮起来了。搿辰光黄昌昌个电灯火照来着亮个地方，肯定是茶馆店。 　　寒场里一早上镇，着冷哪能办？老人自有标准个防寒装备：厚绒个“行灶帽”像一只直筒筒个行灶套垃头浪，帽子前头只有眼睛告鼻头个位置开出了空荡；一身棉袄棉裤；老布袜再加老棉鞋。为了tang风，下半身还有得老布做个又长又宽又厚个束裙。从头到脚遮得密密缝缝【bhong】，再加上人垃走动，葛咾也勿大冷个。等到走进茶馆店，着着亮个灯光，熟悉个道伴，雾气拌混烟气个店堂，坐定下来看茶房拎起长嘴铜壶xiao开【揭开】紫砂茶壶盖头，朝已经放好仔茶叶个茶壶里远远较冲水进去又熟练个盖好盖头，连忙端起暖曈曈个茶壶，两只手焐牢茶壶，等歇再吃一口酾【sa，冲注】到碗盅里个茶，浑身侪暖了。 　　坐到茶馆里勿为别个，只为吃茶咾扯山海经。茶馆里个茶叶是大路货个炒青、红茶末子。大部分人天热了仍旧欢喜吃红茶，因为红茶经泡，有种焐熟个带甜个梗草香味，茶味道比较浓，好吃。山海经扯起来就无边无际了，话咾诺【我】一棚长毛兔昨日剪着斤半兔子毛，搿抢【这阵】收购价涨垃弹；话咾水根垃儿子出远洋船带归【ju】一只电视机，客堂里日逐【每天】夜头围满仔人；话咾温州人可以自己开厂了，扁担挑出来个塑料面盆比供销社便宜……讲起来是有话呒话，七搭八搭，听个新鲜咾话个有趣。进仔茶馆，老年人之间吃吃谈谈，谈谈吃吃，觉着垃拉自己个世界里向，品品清香微苦个茶水，扯扯东搭黄浦西搭海个闲话，来得个自由咾适意，葛咾来得个想靠牢仔八仙桌咾“孵”来辰光长一眼。有人讲“坐垃一道有福气，走出茶馆人爽气，跑【bao】到屋里长力气，勿来茶馆要厌气。 　　酒腻头【酒瘾】重个人，会得笃散散个从篮头里拿出一只“小高升”（二两半装个白酒），半饭盒子炒蚕豆，一粒蚕豆一口酒。也有个人顺路点心摊浪三分洋钿买一根油条，一根稻柴穿仔拎到茶馆里过烧酒。里向吃香烟个人勿多，半摊把，侪是八分个生产牌、一角三分一包个勇士牌，少数的个吃两角八分个飞马牌，三角五分个光荣牌是最好个了。只有吃水烟个朋友“孵”功最足，济手【左手】托仔水烟筒夹住隐隐叫着垃海（慢慢燃烧）个撮纸，右手抽出烟斗“噗噗噗”吹出烟灰，插进筒管里，从烟丝盒里捻出一撮黄灿灿个肃字牌水烟丝，嵌进烟斗，小心移过撮纸，“唿”一记吹旺【yhang】撮纸，拿火点到烟斗浪，“唿落落唿落落”个吸吸吐吐，一股夹杂仔烟丝芸香当归川芎个烟雾从水烟筒里过滤后香喷喷个飘荡垃茶馆里，吃个人摇头晃脑，闻着个人也眯起仔眼睛好像睏垃云里雾里。 　　吃到六点多钟，隔壁老虎灶也闹猛起来了，泡开水个街坊邻居拎仔热水瓶来排队。乡下老人摆垃壁脚跟头个鸡鸭蛋赤豆黄豆，酱瓜萝卜干还有水落小菜【蔬菜】，慢慢较侪拨镇浪个人从篮头里拣出来，垃老虎灶连牢茶馆个门口头问好价钿，买归【ju】去了。 　　六点半朝后，陆续有人吃好茶开始走了。有个街浪向去买荤腥小菜油盐酱醋，有个点心店去吃小馄钝，有个回去吃早饭，有个自留地里去浇水。到七点半，一场早茶就关张了。 　　第二场茶中浪十一点钟开始进客。乡下老人吃仔早中饭就来哉，也有个人盛好一饭盒子冷饭，坐好仔开水一泡，一只咸蛋当小菜顺带吃中饭。茶客当中有一半是早浪来吃过早茶个。伊拉还要孵个几个钟头，中浪出两角五分，吃杯茶还可以听响档说大书唱评弹。听评弹个辰光，老人坐姿最为散松，有七歪八倚个，有手托下巴个，有摇头晃脑个，有捧牢茶壶个，不过眼睛侪盯牢仔台浪向。 　　直到现在，乡下老人还欢喜孵茶馆。不过镇浪个老茶馆基本浪侪关脱哉。好得有交关村里开起了老年茶室。老人更加近便了，有个人一道打扑克白相，勿少老人欢喜蛮蛮【玩玩】小麻将，有几角或者块把个小刺激，主要是侪办了“镇保”，银行卡里钞票用勿光。香烟也吃红双喜金上海，有辰光还吃硬壳中华。有个茶室门口还贴好了排片表。每日有得戏曲片咾啥数字电影可以免费观看。吃茶个茶钿只要一元，勿少村还优待老人，连茶带水侪勿收一分洋钿。 　　葛咾乡下个老年茶客，现在侪孵垃村茶室里向，用勿着上镇哉。