广播专辑 弄堂茄山胡74 金边碗 蓝边碗

广播168 弄堂茄山胡 金边碗 蓝边碗 2014-04-15 11:33 0来源：新民晚报 新民网编辑：田诗雍 作者：郑菁深 　　上了年纪，怀旧之情油然而生，老早个生活场景就像电影一个镜头一个镜头勒辣脑子里过场，尤其勒海过春节个辰光。过春节小菜烧得比平常日脚多，碗、盆、调羹也多用了。现在屋里向自家人聚餐，各色各样个餐具侪会得上台面，金属个、塑料个，有个人家甚至一次性杯子、一次性筷子也勒辣用，想想真勿是滋味。想起老早小辰光屋里向，派用场个碗盏主要有两种：一种是釉花，碗沿鎏金个，俗称金边碗；一种是清白色个，碗沿有两条靛蓝色个纹饰，叫蓝边碗。迭个两种大碗是盛小菜个，当然还有盆子也是金边个。喫饭用个小碗侪是金边个，小幼幼，像一只饱满个莲蓬，玲珑精细，有辰光叫伊汤盅，碗底侪是景德镇个印章。小辰光吃饭，大人做规矩勿允许用大碗个，只好用小小个金边碗，也勿允许饭盛得拍拍满，否则大人要骂“饿煞鬼”投胎，也勿可以搛勒小菜放勒饭浪头，端仔饭碗离开台子到弄堂里去喫。搿歇辰光阿拉屋里还用生肖碗，调羹也是；大人小人侪用自家个碗盏调羹喫饭，属相是啥就用啥个，搿能介倒也是蛮卫生个。盛小菜个金边大碗，平常日脚勿大用，生怕敲碎（小辰光喫好夜饭汏碗常常是小人个功课，往往汏碗辰光勿当心敲碎了。现在个小朋友实在忒写意了，基本上从来勿汏碗），只有屋里向来了人客，或者是过节、祭祖才舍得拿出来用。毕竟金边碗比蓝边碗价钿贵。屋里大人讲，后首来搿些碗盏勒辣上世纪大跃进年代，里弄里办食堂，多数侪捐出去了，现在一只也呒没挺剩下了。 　　其实，用金边碗倒勿一定屋里有铜钿人家，一般稍稍个小康人家侪用个。只是当时有一种碗绝对勿用个，就是又粗又厚，花纹老简单，有个还呒没花纹，颜色卖相像老酒甏，接近陶器个样子，搿种碗俗称江北碗，大人是勿买勿用个。大多数屋里较为清苦或者是北方人、勿大讲究个人家，或者是做小生意个用用。不过，上海人讲面子，屋里向尽管有辰光比较拮据，吃饭个餐具也是蛮细巧考究个，人客来了照样金边碗、金边调羹、金边酒杯、红木筷，绝对勿会拿出一只江北碗来飨客，一来是对人客个尊重，二来也显示屋里日脚过得还蛮滋润：小菜呒没啥，饭要喫饱。