广播专辑 弄堂茄山胡76 弄堂里踢小洋皮球

广播170 弄堂茄山胡 弄堂里踢小洋皮球 2014-01-14 14:54 1来源：新民晚报 新民网编辑：田诗雍 作者：郑菁深 　　提起足球，我勿是道地个球迷，不过辣拉读中学个辰光也是班级里个足球队员，踢踢后卫。当年我辣拉卢湾中学念初中个辰光，学堂里差勿多每一个班级侪有足球队，放学后操场里全是踢球个，还经常举行足球赛，记得埃个一年，高二（4）班是全校冠军，阿拉初三（5）班是亚军告初中年级冠军。尽管几十年过去了，还是觉得蛮自豪个。 　　我老早屋里住辣南市公共体育场附近（后来改为沪南体育场，再后来荡然无存了），埃歇辰光，公共体育场是周围居民个乐园，足球场、篮球场、双杠单杠、沙坑、跑道等等一应俱全，还常庄举办足球赛，免费进场观看。只有市级球赛，才要买票，也不过五分一角洋钿。 　　记得埃歇辰光小朋友练球，足球买勿起，大多数踢踢小洋（橡）皮球。讲起小洋皮球大概搭现在个铅球差勿多大小，球浪印着一个永字，就是有名个永字牌小洋皮球。乃末几个人辣拉操场里，用衣裳或者杂物分两堆当球门，就开始比赛了，三对三、四对四，最多五对五。不过大多数辰光辣拉弄堂里踢，侬来我往，倒像煞有介事。搿个辰光弄堂里踢小洋皮球蛮多个，交关弄堂有小洋皮球队，时常比赛白相，搿条弄堂搭另条弄堂比，有辰光还跨区比。有一次礼拜天阿拉雄赳赳气昂昂，长途跋涉到杨浦区去踢，结果三比十惨败，回转来垂头丧气。当年弄堂里人少，空地多，踢小洋皮球绰绰有余。当然踢坏人家玻璃窗是常有个事，挨骂、喫生活也就免勿了了。 　　侬还覅看踢踢小洋皮球呒啥花头，阿拉弄堂里也真出了一个足球人才，一个小名叫阿三个小朋友，也是踢小洋皮球出道个，先是进厂队，后来到市里踢青年队，脱产踢球，成了阿拉弄堂里个骄傲，每趟回来就像英雄凯旋，是弄堂里小球迷个偶像。老早踢球个人真是多，大人踢大足球，小人踢小皮球，大小球队摸老老，国家队辣拉亚洲也是数一数二个。而现在呐，据资料浪讲，阿拉国家业余、专业踢足球个少得可怜，要闯进世界足坛几率就可想而知。想想也是个，现在小朋友读书压力迭能介重，作业迭能介多，啥辰光有空踢球喔。再讲现在独生子女家长宝贝，足球是剧烈运动，风险忒大，勿踢就呒没事体。告咾中国足球水平要提高，蛮难个。