广播专辑 弄堂茄山胡92 图书馆里“辟情操”

广播187 弄堂茄山胡 图书馆里“辟情操” 2013-04-22 09:31来源：新民晚报 新民网编辑：田诗雍 作者：管继平 　　三十年前个八十年代初，上海市区里向十来只市、区级图书馆，用现在个闲话讲，是一个老小资老浪漫个地方。伊辰光，小青年或者学生仔求知欲相当旺盛，业余辰光侪欢喜朝图书馆跑，弄得图书馆里向人满为患，一座难求。不过，有种人是真个看书去，还有种人则是“混腔势”，看书是假，实质浪是为了去谈谈恋爱轧轧朋友。 　　过去男女谈朋友个约会地方，蛮有讲究。据本人留心观察，大致好分三类：第一类，基本上属于赶潮流掼浪头朋友，比较时髦，伊拉一般欢喜约辣电影院门口，因为过去上海滩个每只电影院，侪属于时尚地标性质个地方，时髦男女约辣此地，顺便看场电影，假使再加上零食脱饮料咾啥，花费大概要一二元左右，基本浪也算是大开销了；而第二类，即普通青工，一般欢喜约辣辣公园门口，然后逛一趟公园（门票五分），假使再弄点饮料小吃么也就是消费三五角左右；至于第三类，有点文化元素个人，约会地点通常会摆辣脱人民公园一墙之隔的上海图书馆了（即今朝个上海美术馆）。到图书馆以读书个名义谈恋爱，既可以显示自己属于知识一族，而且开销交关省，基本属于“零成本”，因为图书馆又勿要门票，只须亮亮工作派司就好了。 　　图书馆里“辟情操”，除脱勿要消费之外，还有最大个好处就是安静，迭个正好符合恋爱中个男女喁喁切切、轻声私语个特点。记得当时个辰光读书风气蛮浓，老多年轻人侪有泡图书馆个习惯。本人伊个辰光廿岁出头，也喜欢借书读书，所以每天夜饭吃好，六点到九点，几乎侪泡了图书馆里向。辰光一长，阿拉十来个差不多个年轻人不仅相识，还互相形成了书友“圈子”，经常辣辣一道切磋心得体会。讲起图书馆里个恋爱故事，阿拉“圈子”里还真有一桩成功案例，“眼眼交”拨阿拉侪看见。 　　当时阿拉格只图书馆个“圈子”里，有一个小青年阿辰，曾经梦想当一名作家，所以每天泡辣图书馆里读中外名著，摘抄名人格言。后来他看中了一道来看书个、从事幼教工作个一位姑娘。从此，阿辰每趟到图书馆，中外名著没心想看了，就看迭个小姑娘坐辣啥地方，伊就坐过去。刚开始“郎有心，妹无意”，姑娘多次嫌变烦，看到阿辰坐过来就索性收起书包，调一只座位，但阿辰不厌其烦，紧随其后，反正姑娘坐啥地方伊就跟了坐啥地方。后来不仅辣辣图书馆，姑娘看好书回家，阿辰也“盯功”不减，一路护送，假使姑娘不让伊送，伊就尾随其后，风雨无阻。 　　俗话讲“好女就怕缠”，或许是阿辰个精诚所至吧，故事发展到后来，果然有了“松动”，两家头已经勿像刚刚开始辰光介抵触了，“情操”也开始“辟”起来了。再后头，阿拉辣辣图书馆里已经看不见伊拉了，因为伊拉图书馆里也勿大来了。后来好几年过去，我辣朋友之间听说，阿辰当年迭桩图书馆里个爱情，果然成功，而且还开花结果，养了一个“大胖儿子”。倒蛮好，迭位曾经立志要成为作家个阿辰，一“家”虽然没做成，另一“家”却做成功了。