广播211 弄堂茄山胡 欢喜“茄山河”个老寿星

广播211 弄堂茄山胡 欢喜“茄山河”个老寿星 2012-10-10 16:24 来源：新民晚报 作者：司马羊 新民网编辑：王玲 　　 【新民晚报·推荐】今朝上海滩浪第一男寿星是啥人？告诉侬，伊就是住垃拉普陀区真如镇个秦茂堂老先生。 　　 老寿星1902年4月出生于江苏省无锡，到今朝已是实足110岁。伊十来岁个辰光，一介头到上海学生意，因为人聪明勤快，呒没几年，不仅人垃拉上海滩立牢脚跟，而且自家还开了一家裁缝店，做起了小老板，日脚过得蛮好。后来公私合营，伊并进上海蓝翔服装厂当营业员，直到退休。伊有8个子女，其中6个健在，小囡圄当年拉垃黑龙江生产建设兵团，有年林场失火，伊冲进火场扑火，壮烈牺牲，拨评为烈士，所以讲老寿星还是烈属。 　　 当阿拉来到伊屋里向辰光，有点呆【nge】脱了，侬晓得，老寿星原来住垃拉五层楼，伊拉住个是老式多层建筑，呒没电梯，长长个水泥楼梯盘旋向上，乃末老寿星每天就是从迭个长长个水泥楼梯上下进出个。老寿星头发花白，不过面色红润，眼睛炯炯有神，看上去顶多80岁左右，一眼呒没老态龙钟之态。伊个手腕上戴着手表，阿拉问伊现在几点钟了？伊抬起手来看了看手表，讲：“9点50分！”好眼力，介大个年纪，报辰光还一分勿差。伊女儿垃拉旁边讲：伊前几天得病毒性感冒，否则啊，伊老早跑下楼跟人家茄山河了！ 　　 原来老寿星欢喜搭人家茄山河，迭个可能是职业关系，因为老寿星年轻时做裁缝师傅，当营业员，经常要跟人打交道，迭能介就养成欢喜搭人茄山河个习惯。老寿星平时心态平和，面孔总是笑嘻嘻个，讲闲话轻声静气，一副“大肚能容天下难容之事”个弥勒菩萨像。屋里小辈送个补品搭点心，自家吃勿完，伊就分拨邻里个小囡，有辰光外出荡马路，看到好吃个物事，伊也会拨邻里个小囡买一眼，所以邻舍道里侪欢喜跟伊茄山河。老寿星每日上下午各一趟，会自家走下楼去，垃拉小区里活动活动筋骨，除脱搭熟悉个人打打招呼，伊还会得搬一只藤椅到凉亭，坐下来搭人茄山河。茄山河个话题，当然少不了“话当年”，不过主要还是社区新闻。由于伊看电视，老注重三看：看京剧，看历史剧，看古装戏，每当迭个辰光，老寿星就神情焕发，谈到精彩处，伊会眉飞色舞，哈哈大笑，活脱脱一个老小人。有句老古话讲：一天笑三笑，医生要上吊。秦老就是迭能介个人。由于老寿星垃拉上海男性百岁寿星中数“老大”，所以时常有人来看望伊，来个人到辰光免勿了会请教伊个长寿经，迭个时候，老寿星就会脱口而出讲：“阿拉讲三个好，一末是共产党好，二末是居委会好，三末是小囡好，有了迭个三个好，侬讲伲还能勿长寿？”老寿星个“三好经”，小区邻居侪晓得，葛末老寿星也成了小区个“三好先生”哉。