广播223 弄堂茄山胡 扇哉善哉 我侪囥好

广播223 弄堂茄山胡 扇哉善哉 我侪囥好 2012-07-04 15:12 来源：新民晚报 新民网编辑：王玲 文/黄沂海（上海市银行博物馆馆长） 　　 【新民晚报·推荐】天气一眼眼热起来了，想想老底子人家侪翻箱倒柜寻起扇子来了。不过现在用勿着，大多数人家屋里向侪装了空调，冷气吹吹，西瓜吃吃，夜报看看，交关适意。 　　 我小辰光除脱欢喜写字画图之外，还欢喜囥【藏】两把扇子白相相，也就是现在人讲个收藏扇子，乃末一勿当心，几年下来，我足足收藏了毛【接近】五百把扇子啦。还劲头十足，写了两本书：《扇有善报》搭《扇解人意》。据出版社讲迭两本书卖得蛮好。普通闲话里头，“扇”与“善”音同字勿同，读起来邪气有意思。朋友祝贺我个收藏小有成果，我就学老和尚个腔调回应一声：扇哉，善哉！葛末我哪能会得收藏扇子？我认为收藏扇子个好处有三条：好收藏、好欣赏、好白相。先讲好收藏：侬想，扇子体积介小，折扇收拢来只有尺把长，老早人家叫伊“怀袖雅物”。勿像收藏明清红木家生【家具】，或者是四屏条八屏条字画，屋里向摆也摆勿落。我收藏个几百把扇子，三只拉杆箱就足够了，藏而勿露，交关符合我个脾气；再讲好欣赏：扇面也是门艺术，方尺里头可以望到大千世界。垃拉扇面上头写字画图，难度老大个。明朝有个大书法家叫祝允明，伊讲写扇书就赛过美女垃拉屋头顶浪跳舞。折扇扇面，上头宽下头狭，样子邪气特殊，所以扇面构思要精巧，布局要讲究，要盯牢仔看，想象力会得丰富得一塌糊涂；压末要讲好白相：扇子顶顶容易白相，勿管是一家头做相公，还是三两知己碰头，根本勿讲究啥人官大官小，也忘记脱外头落雨落雪，乃末看看笔墨，弄弄扇骨，摸摸扇囊，迭个辰光真个是觉着捂心【开心、满足】啊！闲话又要讲转来，我收藏扇子，勿在乎画家书法家是勿是有名头，也勿在乎扇子垃拉拍卖会浪能勿能起蓬头，而是在乎扇子里头有勿有讲头，迭个“讲头”，就是每把扇子侪要有故事好讲。比方讲，为了集齐王个簃、王公助、王葵祖孙三代个扇面，我差勿多跑遍了上海滩浪交关画廊，经历了山重水复、柳暗花明，“一门三代”总算垃拉我个扇斋“光荣会师”。王个簃先生个扇子，我是垃拍卖会浪碰到个。迭把扇子一露头，拍卖会像煞倒翻了田鸡篓，好几个藏家五斤吼六斤，侬勿让我，我勿让侬，形势邪气吃紧。我头脑一热，穷追勿舍，从一万块起步，一记头拍到三万块，闹猛得一天世界，十几个回合拗手劲，总算拨我搞定。“穷追”个结果是“追穷”，我袋袋里个板板空脱了，假装潇洒签单个辰光，想想还是肉痛个。王个簃儿【ni】子王公助个扇子来得还算便当，不过伊孙子王葵个扇画，就叫我觅得辛苦。听讲王葵是吴中书画院副院长，我先托了苏州个朋友，又垃拉网浪向发帖求购，结果呒没音讯。老天爷帮忙，一日无意中碰着一位认得王葵个藏家，伊热心得勿得了，帮我牵线搭桥，求到王葵扇画。祖孙三人个扇子，统统摆拉书桌浪欣赏，画风一脉相传，活脱似像，赛过一家人碰头，侬讲扎劲？不过，有得也会有失。我前年底垃拉朵云轩看到钱行健个一把扇子，画得乓乓响，字也写得赞，看得我心别别跳。扇子标价一万块，当时我手头有点捻勿开，想了半天，呒没落手。一年到头哉，等到过年辰光皮夹子“胖”起来了，兴冲冲奔到朵云轩一看，乃末好哉，柜台里向“老母鸡变鸭”，钱行健扇子拨人家捷足先登了，胸闷啊！ 　　 扇子就是面子，老早有铜钿人家，屋里向要备一百多把扇子，一日一把，一天一换，绝勿重样，扎足台型。迭能介讲，我囥有几百把扇子，每年天热，我好笃悠悠翻行头哉。 　　 【此文沪语小词典精选】 　　 侪、囥、葛末、捂心、邪气、一塌糊涂、五斤吼六斤、活脱似像、家生、像煞、笃悠悠、迭能介、翻行头、摆拉、捻勿开、扎劲、起蓬头、有讲头、翻行头、吃紧、闹猛、赛过、乃末