广播225 弄堂茄山胡 候分掐数打长途电话

广播225 弄堂茄山胡 候分掐数打长途电话 2012-04-03 15:52 来源：新民晚报 作者：程多多 新民网编辑：王玲 　　 　　【新民晚报·推荐】中国人有老浓个乡土情结，我自认为自家是蛮重个。我是一个既经历过土插队又经历过洋插队个人。不过勿管土还是洋，总归跑得离上海屋里向老老远。跑到介远地方去，辰光再长，事体再多，总归会得牵记屋里向个人，想爷想娘想亲人。一歇歇想想屋里向个物事真好吃，一歇歇又想想上海滩浪个朋友们现在垃拉做点啥个事体……真个是想煞快人啦!尤其是吃到好吃个听到好笑个，就想豪燥讲拨屋里向个人听。放垃现在交关便当，电话一拎随便侬讲。勿过垃拉伊个辰光就邪气勿便当。尤其是打一只越洋个长途电话，要候分掐【KaK】数。 　　我本人就亲身经历了电话科技成果个快速变革。土插队辰光正好碰着文革，大家一穷二白，呒啥好讲。就讲洋插队辰光。我刚到美国是1981年春末，混发混发半年过去了。搿个辰光特别想跟屋里向亲人讲脱两句闲话，觉着听听声音也好个。平常时汇报生活或学习侪是靠通信联络，写封信一来一去至少一个半礼拜，啥人晓得打一只电话想要听听屋里向人个声音也是要先写封信。先写信告诉阿妈娘一声，下礼拜几、几月、几号、几点钟我会打电话回来。日脚勿好脱近，生怕信晏到屋里向，大家辰光错过，真叫哑子吃黄莲，有苦讲勿出。阿妈娘接到信，就天天看日历算日脚。因为旧金山跟上海时差要足足推扳十六个钟头哩。到辰光爷娘带好媳妇孙女咾啥一帮子人浩浩荡荡坐电车从徐家汇一直坐到外滩邮电总局，乃末领好号码排好队等我个迭只性命交关个电话。电话局里边靠墙壁有一长排编好号码个小房间，电话铃响，听服务员叫到号码，关照进阿里一间小房间。乃末大家轮流进去讲闲话，一大群人进进出出，哭哭笑笑侪有。后来总算进步点了，勿要去外滩了，原来静安寺邮电局也有迭档业务了，对阿拉来讲，路近交关了。想想爷娘加大个年纪为了接听儿子一只电话还要奔来奔去，真作孽啊。好垃搿段辰光勿算长。呒没多少辰光，宾馆侪可以直接打长途电话了。不过勿要激动。迭个辰光要打一只越洋长途电话贵【ju】是贵得侬吃勿消，勿光是中国打到美国，同样美国打过来也一样个。几分钟闲话讲下来，可以好好叫请人吃一顿大菜哉！ 　　想想现在社会进步之快简直叫人跟勿上，花样劲多得来眼花缭乱。一记勿当心就会脱班，脱班一多就会手忙脚乱。现在随便垃拉啥地方，随侬想啥辰 　　光，只要想通一只电话，天南海角随便侬，而且费用越来越便宜了。