广播227 弄堂茄山胡 做人家

广播227 弄堂茄山胡 做人家” 2012-03-20 16:46 来源：新民晚报 作者：王建平 新民网编辑：王玲 　　【新民晚报·推荐】上海闲话当中个“做人家”就是“节约”个意思，适当“做人家”是好事体，不过过分“做人家”就勿好了，结棍个还会闹出人性命。 　　我有一个邻居姓林，大家侪叫伊阿木林。迭个男人邪气“做人家”。伊上下班从来勿乘公交车，专门搭乘“大卖场免费专车”，勿管啥人打伊手机，伊侪要先揿脱，再寻座机回电，寻勿着座机伊就勿回电。侬如果有啥个要紧事体寻伊，真是急煞人；伊屋里向有线电视信号一年到头是插辣人家“信号分配器”上头，勿要付一分铜钿个；上网也从来勿要宽带，伊用“无线路由器”借用邻居个网络来省脱宽带费。还有伊除脱铃勿响其他侪响个脚踏车，拨人家当作垃圾清理脱十几趟，伊东跑西寻，想办法领回来照样踏。伊讲：“新个脚踏车容易拨人家偷脱，旧脚踏车呒没人要”。伊顶顶“做人家”个要算是吃，伊一小块咸带鱼好吃三碗泡饭，吃剩下来个鱼骨头勿舍得掼脱，嘬两嘬还好过三碗泡饭。 　　有一趟礼拜天，我看到阿木林伊拉儿子身浪向穿了一件运动衫与众不同，袖子特别长，下摆又特别短，胸前还有一排暗钮子，特别新潮。我好奇个问伊拉儿子：“小林林，侬身浪向迭件运动衫，是勿是从外国带回来个？”小林林眼睛拨瞪拨瞪看牢我，一歇歇又拨瞪拨瞪看牢阿木林，好像呒没听懂我个闲话。小林林回答：“勿是买个，也勿是送个，是爸爸自家改个。”原来阿木林拿自家一条旧个棉毛裤，裤裆里剪只洞，套辣儿子头浪向就算运动衫了！“”阿木林讲：“勿是买勿起，我要等阿拉门口迭家商店打折扣个辰光再买。”我问：“伊拉打多少折扣？”伊讲：“原价24元，打好折扣就22元，足足相差2元唻！”我讲：“侬过分‘做人家’勿好个。”阿木林听了一眼也呒没触动，反而讲：“讲拨侬听，‘做人家’是阿拉屋里祖传个，阿拉外婆一双棉鞋，穿得唻前头露脚趾后头露脚跟，还勿舍得掼脱。伊讲，放辣海，到大热天当风凉鞋子穿。阿拉老娘一件长袖子衬衫，穿了十几年，两只袖子侪坏脱了，伊拿把剪刀拿两只袖子剪脱照样穿。”上个礼拜六，阿木林垃拉屋里向突然昏过去了，医生诊断是严重营养勿良。邻居对阿木林讲：“阿木林啊，侬‘做人家’做得连性命也勿要了，现在真个叫‘省下来铜钿买药吃’唻。”医生晓得迭格情况后，特意帮阿木林配了交关价位比较高个营养药。呒没想到，阿木林毛病还是呒没好。医生搞勿懂，到底哪能一桩事体？原来，阿木林晓得医生帮伊配个侪是价位比较高个药，实在勿舍得吃。伊就拿一顿吃三粒个药片，改为一天吃一顿，一顿吃半粒了。