广播228 弄堂茄山胡 夜来叫卖声

广播228 弄堂茄山胡 夜来叫卖声 2012-03-20 16:39 来源：新民晚报 作者：徐赋葆 新民网编辑：王玲 　　【新民晚报·推荐】老上海个旧式弄堂住房，人口密度高，一幢房子里住几户甚至十几户人家是不稀奇个。夜来叫卖声是上海弄堂里向个一道风景，小商贩挑了担子垃拉弄堂里向穿来穿去，用各种各样个叫卖声来招揽生意。 　　“五香茶叶蛋，火腿粽子！”搿个是我小辰光听到最多个叫卖声，尤其是夏秋之夜，交关人垃拉弄堂里乘风凉，聊家常，闻到搿个茶叶蛋个阵阵香味，嘴巴也难以抵御搿个诱惑，乃末买几只茶叶蛋或者肉粽，豪燥趁热剥垃吃，又香又糯。“芝麻糊，白糖伦教糕！”个叫卖声带有眼广东口音。热腾腾、黑油油个芝麻糊，吃上一口，香甜沁脾。白糖伦教糕晶莹似玉，甜中带糯。可惜现在吃起来，味道好像总归呒没老早底介灵。咬上去糯嫩个伦教糕也老少看到了。记得卖糖粥个是个中年男人，伊勿大声吆喝，只拿竹棒敲出慢三拍个节奏来。顺着搿个笃笃笃个竹梆声，门会得吱介一声打开，侬只要递拨伊一只碗，老快一碗热气腾腾个稠粥就送过来了。卖馄饨个小贩也敲竹梆，勿过节奏倒是慢吞吞个一拍一拍：“笃、笃、笃、笃”，所以讲老容易分辨个。小贩挑个竹担比卖糖粥个担子复杂得多。前后头好像摆了两只小竹亭子，前面一只竹亭里放了炉灶，炉灶浪一只铁锅子热气冒拉海，后面个竹亭里摆了碗盏，调料。侬只要招呼一声，馄饨担就会停垃拉侬个门前头，乃末伊前后忙碌一番，一歇歇一碗葱香扑鼻个馄饨就烧好了。 　　每当深夜，馄饨担晃动个悠悠炉火，垃拉昏暗幽静个街巷里，邪气有吸引力搭仔神秘感，到现在还留拉我个记忆里。