广播240 弄堂茄山胡 环龙桥堍个算命先生

广播240 弄堂茄山胡 环龙桥堍个算命先生 2014-08-25 10:21 0来源：新民晚报 新民网编辑：田诗雍 作者：秦来来 　　阿拉小辰光，城隍庙里有一座建于明代个青石桥，叫做环龙桥。当时豫园还呒没整修，环龙桥还算地处“园”外，是城隍庙由东向西（旧校场到安仁街个通道）必经之处。环龙桥一带老冷清。因为靠着“菩萨”、挨着“庙”，所以邻居之间除了东家长、西家短个传闻之外，同“鬼”搭边个故事、传闻也就比较多。 　　辣拉环龙桥个桥堍脚下，有一个上海滩独具特色个“算命街”；沿着荷花池南面，走廊里向一抹色个“格子铺”，有七八家之多；只见伊拉，一个个长衫马褂，头顶瓜皮小帽，一抹色戴着墨镜，看上去侪像“算命高手”。侬看伊云里雾里，伊看侬一目了然；侬开口竹筒倒豆，伊启齿循循善诱；到辰光勿论夫妻勿和、父母勿尊、子女勿孝、家财难处……侬会亨八冷打倾囊而出，伊就会鉴貌辨色，层层破除侬个防线；侬要啥，伊就会拨侬啥。侬想要钞票，伊讲会让侬发财；侬想要当官，伊讲会拨侬官位；侬想要长寿，伊讲侬肯定活到九十九；侬想求儿子，伊讲“辰光一到”，侬就会遂了心愿…… 　　除了一张“铁口”，伊拉还有一样“神器”，搿个就是会“衔牌算命”的“神鸟”。 　　当有人来算命个辰光，算命先生一面向来人问明年庚八字，一面拿出一副类似香烟牌子大小个所谓“命牌”，和弄一番，说是洗牌。然后，把放辣身边个鸟笼打开，一只小鸟（据说是黄雀）从笼中跳出来，搿只鸟往往乖巧可爱，既勿乱飞也勿逃匿，而是停辣鸟笼前个一排“命牌”中，用小小个尖嘴衔出一张牌，算命先生拿过小鸟衔出个“命牌”，并赏拨小鸟一粒粟子吃，小鸟又心甘情愿个飞回笼中。算命先生打开“命牌”一看，上面果真画着跟被算人个年龄、属相相符合个画片，旁边还有几句批语。根据搿几句批语，伊凭着三寸勿烂之舌，天花乱坠一气，解释并断定算命人命运。伊个批解让侬听起来，讲是么却勿大像，讲勿是么又好像是迭能一桩事体。不过看看小鸟神奇，算命人最终勿得勿信服。 　　阿拉弄堂里就有一位算命先生，名叫“万家生”。据说当年伊也是很有名气个算命先生。 　　我个邻居李杏葆先生，如今已是名冠全国个语文教育专家。李先生自幼天资聪慧，伊勿信算命、测字一类，当年对迭位住对门个邻居，也是口无遮拦，“侬个名字起得勿好，‘万家生’，难道侬自家呒没姓个？”搿句无忌童言，显然开罪了万先生，所以当李杏葆小学毕业，准备报考名校上海中学而去征询意见时，万先生一口断定，“考勿进”。但是李杏葆也非等闲之辈，一来自身过硬，书读得好；二来勿信搿个一套，以高分考取。当李杏葆再次来到万先生跟前，讲，侬个“命”算得勿准。万先生倒也勿显慌张，慢吞吞个讲，我搭人家算命，要收费；侬来叫我算，呒没出过铜钿，我要是白送，勿是要送脱侬一条“命”。两人一来一去，李先生事实雄辩，得理勿让人；万先生以退为攻，也算讲得通，两人旗鼓相当，打了一个平手。但是细想起来，李先生当年只是一个稚嫩少年，万先生已是江湖老口，迭能算来，还是李先生高出一筹。 　　后来，算命被取缔了，随着豫园个修缮改造，搿条“算命街”也就勿复存在了。万家生先生被安置到里弄生产组谋生，伊终于学会了新个手艺——修阳伞、补套鞋。直到今朝，我眼前依然会浮现出当年个景象：辣昏暗个路灯下，万先生“啃支啃支”用勿熟练个手法，拱着背拿锉刀用力搓着橡皮个身影……