广播258 弄堂茄山胡 讨个乡下大娘子勿吃亏

广播258 弄堂茄山胡 讨个乡下大娘子勿吃亏【qu】 2012-02-21 11:13 来源：新民晚报 作者：周曙明 新民网编辑：王玲 　　文/周曙明 　　【新民晚报·推荐】我出生垃拉上海长乐路236弄个石库门里向。高中毕业个辰光碰着“上山下乡”。不过，我个大姐、二姐垃拉上世纪六十年代就到新疆去了，阿哥也去了崇明农场。我按政策吃着硬档子——“市工”，分到人称小上海个周浦镇浪一家汽车传动轴厂当邪气吃得开个“工人”。 　　埃个辰光，讲啥“宁要浦西一张床，覅浦东一间房”，意思是讲市区里好。伲屋里个住房一塌刮子只有24个平方，想谈个女朋友，真个是捏鼻头做梦。我直到30岁敲开，还是枯庙前头个旗杆。食堂里个钟阿姨劝我：覅老蛤巴【gebo】垫台脚——假硬胀哉，谈个乡下姑娘也蛮好个。我怕过仔迭个站，呒没伊个店，就垃拉钟阿姨个帮忙下，讨仔一个乡下头小姑娘做大娘子。 　　伲丈人家就垃召稼楼西半【be】爿【bhe】个谈家牌楼。老丈人对我迭个“上海女婿”蛮看得起个，装修仔一间裕屋【yhuoK】做新房间，让伲小夫妻两个蹲拉乡下头。小我6岁个谈妹妹身高1米60，大眼睛高鼻梁，人蛮趣个，就是皮肤黑一眼，勿过也算是‘黑里俏’。人家讲‘黑末有用，白末白送’，迭个倒是拉个。伲娘子养仔伲囡儿【ng】，只不过休息个把号头就下田做生活哉，身体老结棍个。 　　搿个辰光，乡下头煤炭紧张，伲上海屋里向人道多，配给个煤球也多，就省下来拨我带到乡下头去，邻舍隔壁看见仔眼热来要死，侪讲我迭个上海人路道粗。伲丈母娘听仔，眼睛眯成一条线，讲：“伲女婿人倒蛮巴结个，烧饭盪【dhang】镬样样肯做个，礼拜日还帮伲拔草捉花掼稻咾啥。” 　　伲屋界西是畜牧场，屋后头是老竹园。随常用水侪靠场门前个宅河，出门跑【读bao，音“报”】个是烂泥路。落雨日脚，走一步滑一滑，走两步拔一拔……人家侪讲我戆大【ghangdhu】，水泥路覅跑【dao】，去走烂泥路，自来水覅吃，去吃河浜水……我迭只耳朵进，埃只耳朵出，侪当呒介事。 　　老实讲，我蹲拉乡下头蛮好。离开厂里近勿算，一年四季还有豆豆绿绿，新米咾啥，搿个垃拉埃个辰光上海人侪吃勿着个，常怕【shangPo】吃个蔬菜末也新鲜。所以我对做“乡下人”，一眼垃勿懊恼【ao1ao，后悔】！ 　　改革开放以来，乡下头变化大来勿得了。前年仔，伲老宅基地浪造起了商品房基地——“四高小区”。伲一家门动迁到环境优美个小区里，囡儿拉登一套三室一厅电梯房，伲老夫妻两个登2室1厅，覅忒适意噢！现在，我末欢喜弹弹钢琴，老太婆末欢喜唱唱沪剧咾啥，真是一吹一唱，一搭一档。我老早个上海朋友、亲眷咾啥，侪讲我完来后稍翘，讨个乡下大娘子勿吃亏【qu】。