广播专辑 周立波海派清口7 教育

广播专辑 周立波海派清口7 周立波谈教育 阿拉爸爸是新中国第一代技巧运动员。葛末辣辣迭个文化革大命个辰光啦，受冲击了。战高温去了，排斥出去了。就到上海硬质合金厂去当工人去了。葛末侬想，阿拉爷个儿子，现在就立辣那面前，迭个儿子是搿副腔调。迭个爷一定勿是一盏省油个灯啊。阿拉爸爸以工人个身份进去，呒没出几个好头噢，阿拉爸爸混法混法混法混法，拨以混到采购部去唠。搿个辰光采购部勿得了啊。是肥得流油个地方。有点好处个。人家塞点物事拨伊。摆到现在要双规个。大错误么也勿会犯个。葛末总归有点客户关系唠。所以阿拉屋里向呢搿种副食品蛮多个。乃末特别是麦乳精交交关关摆辣嗨。哦呦，我正宗老虫跌辣白米缸里哦。阿拉姆妈只要一做事体，或者阿拉姆妈勿辣嗨。我就干吃麦乳精。带同学回来着台型。“来，吃一口。”人家从来呒没吃过。半听呒没睐。闹，小人犯错误对伐，伊总归蛮吃酸个，伊总归是门板后拆污勿过天亮个。吃好以后一看只有半罐了。晓得闯祸了。但是我真个聪明个。我从小就聪明。我搿种脑筋真个是老好个。人叫做是一部云。我叫现在辣辣台浪向。我作为一个喜剧演员。我假使讲我脑子翻翻，我去做科学家噢，弄得勿好我可以得诺贝尔奖个。这是因为我脑子聪明。人真个侪讲运道个。闹，侬比如讲牛顿，牛顿勿得了了。侬讲是伐。万有引力。牛顿一只苹果落了伊头浪向。一记头伊就变成大科学家。侬想，如果伊落下来一只铅球呢？葛末牛顿就吧嗒了。人侪讲运道个。侬讲我哪能聪明。侬一看半罐头，哪能解决啊。姆妈回来要查个。其它还没开，开过个有问题。我就拿麦乳精倒了台浪向。台子浪倒好。然后拿报纸塞辣下头。再拿麦乳精撸进去。仍旧放回去。现在搿种饭店里向哦，啥个牛肉下头摆萝卜丝侪是跟我学个。我七十年代就会了。聪明伐？真个聪明。但是阿拉姆妈调羹一舀，发现勿对了，又是一顿生活。搿就叫门板后拆勿勿过天亮。 我搭大家老实回报，实际浪向阿拉姆妈打我历史悠久。也印证了一句老话，叫棍棒底下出孝子。一直打，但现在我最爱个就是我个姆妈。呒没办法，因为我只有一个姆妈哎。阿拉姆妈从啥个辰光开始打我哦。从幼儿园中班开始，一直打我打到四年级的下半学期。实在打勿动了。基本浪每天一顿生活。如果过年还加班打。因为实在忒皮。而且老热作个。就是搿种乱七八糟个脑子侪想得出个。啥个拿屋里向个闹钟噢，刚刚买回来新个噢，第二天我好拿伊拆开来。我全部拿伊拆光。本身大伐？三年级辰光噢，再拿伊全部装好，聪明伐？但是走勿走了。乃又是一顿生活。葛末阿拉姆妈打我搿个辰光开始用手打个，到后头勿对了，手打勿动了。用尺打。用尺去打，到后头一看呢勿对。尺打也勿对。三天断一把三天断一把，迭个成本也忒高了。就用拖鞋开始打。拖鞋啪啪啪啪打。辰光长了搿种套路侪吃得准。百分之七十侪可以拨我挡脱。后来阿拉姆妈技术革新了。益拿两只拖鞋打我。一只呢专门负责做假动作。小鬼侬再皮，侬再皮。乃挡勿牢了。我毕竟勿是武当山出来个。挡勿牢。但是，好得对伐我天天打天天打呢，我老经打个。阿拉上海人勿是讲搿人经打伐？经打个。就是经得起打伐。我老经得起打个。还有一点就是讲，天冷还勿要紧，痛也就痛了，无所谓。天热真个坍招势。因为为啥？侬想，短袖，短裤，短袖子，迭个阿拉姆妈除脱头勿打，侪是伊打击个目标。打好以后人打得像斑马一样。到学校里向去真个坍招势。两个女同学看到我老起劲个。呦，周立波，侬姆妈又买新拖鞋了？我问，“侬哪能晓得个？”“侬今朝搿个花纹搭仔昨日搿个花纹是勿一样个。”讲点小辰光皮个故事蛮好白相个。.....阿拉姆妈掉拖鞋伊拉也晓得个。坍招势伐？老坍招势个。 ....但是阿拉屋里穷开心。因为搿个辰光还呒没看到过介好个日脚。.......哦，搿个辰光，打弹子，菱角，豆腐夹子，香烟牌子唠，糖纸头，橄榄核子，我侪白相，老开心。阿拉埃个辰光小区，出来叫阿姨早，阿伯早，隔壁邻居大家老闹猛个。我们埃个辰光个童年，讲起来阿拉戈物质勿丰富，别过，阿拉邪气开心。而阿拉现在个小人，伊拉是幸福个，必过并勿开心。.....对伐？阿拉现在个小人要啥有啥。哪怕屋里条件勿是老好，只要小人，总归满足伊。侪拨小人，小人多少快乐啊。但是，伊是幸福勿是快乐。因为伊拉压力太大。娜去看好了，现在小学一二年级个小朋友哦，做回家作业可以做到夜到8点半哦。搿现在搿小人压力老大噢。哎勿晓得啥人想出来一句言语，讲啥：“啊，勿要让阿拉个小人输辣辣起跑线浪向啊？！”呸。人生是场马拉松，不是短跑，不是刘翔。搿恁小人勿要拨娜弄煞脱个啊。对伐？我现在看看阿拉小人真个罪过啊。乃末阿拉眼老师呢也属于路道老粗个。辣学堂里向教书勿像教书，像辣布置回家作业一样。家长侪要跟进，侬讲是伐？......天真呒没了，勿天真了。特别侬去看好睐，一点像种已经到初一初二搿种褪毛期辰光个男小玩，阿拉上海人勿是欢喜讲褪毛期么？！表情出来侪一样个哦。侪啥个表情晓得伐？勿像老底子老皮老天真晓得伐？憨闲话侪问得出个。现在小人老酷个。现在个小人基本浪侪搿恁。“宝宝”，实际浪做啥？娜覅去怪伊，是他们压力太大，压力太大，勿天真了。实际浪头呢？小人勿天真，邪气吓人个。侪是应试教育害的人，但是搿也勿是一个人个问题。......因为小人一旦勿天真是老吓人个晓得伐？因为搿个国家的小孩没有了天真，搿个国家个未来一定缺乏想象。 谢谢大家同意我个意见。我还有一桩事体可以证明个。我对伐有一趟辣辣开车子，正好是母亲节个辰光，有一个十二岁个小朋友打电话打到电台里去，要为伊个妈妈点歌。.....十二岁小朋友，点得出搿只歌，绝对属于路道粗个。对伐？我还有个朋友，伊拉儿子正好十六岁，乃末小胡子也长出来了。正好是叛逆期。葛末伊想总归要帮儿子沟通沟通伐？或者侬侬发育啦？生理浪有啥烦恼伐？有啥事体要问问爸爸伐？我搿个朋友比较内敛。葛末就帮伊拉儿子讲：搿个，宝宝啊，迭个，爸爸呢，今朝，迭个呢，想搭侬谈谈。伊儿子讲：谈好了。“闹，爸爸勿晓得哪能讲，侬迭个事体呢？” “爸爸，侬有啥勿懂侬问我好了。”弄得了一鼻头灰。....勿是小人勿懂事体，是小人个压力忒大。所以阿拉勿要以为：哦哟，现在小人哪能侪勿听闲话个？实际浪是小人个压力实在忒大。娜想，小人对伐，勿好拨伊老大个压力。我建议哦：比方讲一个班级四十名，四十个同学，基本浪让自家个小人氽辣二十到二十一名里，氽了腰眼里。啊里来介许多第一第二名啦？！对伐？小学初中拨伊氽氽，氽了腰眼里向，到了大学，捡一门自家欢喜个课，拨伊再加课，再加油门过去。伊一定会变成一个有用之才。外加，勿会影响伊个想象和天真，对伐？小人学了介深呒没意思个呀。伊拉讲李嘉诚也就懂眼加减乘除。哎？侬讲做生意要超出加减乘除多伐？勿多个呀？侬啥个侬叫李嘉诚解搿个一元一次方，伊保证勿会。两元一次方更加勿谈了。...阿拉再反过来想想，原来，阿拉搿代人噢，辣辣班级里向，如果现在算社会浪混得好个人哦，基本浪班长学习委员老少个。班长学习委员老早底是班长学习委员，现在基本浪侪混得勿大好。功课好个，但是混勿好个。还是眼皮大王混得蛮好。对伐？埃，娜去想？现在点班长学校委员到阿里搭去啦？侪辣门口贩票子。