广播专辑 周立波海派清口8 文艺界

广播专辑 周立波海派清口8 文艺界 .....阿拉现在看流行歌曲一点也勿稀奇。百度浪一搜哦哟几千几万只。迭个辰光唱只流行歌曲老稀奇个。搿个辰光有一个人我觉着勿得勿提个。唱过一只歌是个女个。....勿容许唱，差点枪毙噢。勿是歌枪毙，是人枪毙噢。.....邓丽君搿种歌老早仔属于，搿种属于靡靡之音。后头现在已经属于天籁之音。.....因为为啥？因为伊用了气声唱法。而且最关键个是阿拉李老师有特色。人长得漂亮。搿只面孔是迄今为止全世界长得最圆个。真个呀。李老师搿只面孔哪能圆噢？侬比方讲拿只圆规，拿伊鼻尖为中心，兜一圈。保证勿会出去，勿会进来。而且皮肤又好，雪白粉嫩。最最关键李老师有自家个特色：一只兰花结。李老师个兰花结帮一般人是两样个。是笔笔直个，勿弯个。伊唱起来哪能唱个？.....迭个变击剑睐。别过意思就是搿个意思。对伐？ 搿辰光还有个歌星。是个女歌星。现在勿大出来。已经老多老多辰光呒没看到伊了。唱女中音个。有一粒耔长了搿边。长了搿边还是搿边啊？但是反正肯定勿是辣辣搿搭。写辣搿搭历史要改写了。关牧村！关牧村对伐伊搿个女中音是非常非常有难度个，是万里挑一个。一般女个勿具有搿种嗓门搭仔音质个。关牧村搭仔李老师又是两样个。关牧村呢比较板。唱歌勿动个。伊就是用声线用声音来征服侬。......啊，迭个声音属于比较妖怪个。对伐？ 葛末，然后呢就在1984年个辰光，整个春晚开始提升了。为啥呢？有港澳台概念。葛末第一个冲进来个是啥人呢？哎，搿个人对伐就是讲大概比我人还矮脱半只头。基本浪只有我三分之二门面。但人家腔调有个。对伐？人矮但是伊感觉老高。伊感觉自家是巨人一样。一副金丝边架梁。还带了一条大兴开司米围巾。.....埃，对伐？伊唱歌欢喜人蹲一蹲。后来唱只垄上行。... 人介矮么覅搿恁。埃，伊搿恁一动对伐下头观众看勿着了。伊搿恁弄后头观众讲：人呢？ 再后头过来个人比伊狠哎。再后头过来个人噢，基本浪属于两个半张立敏介高。覅忒漂亮。....拿阿拉大兴安岭也烧脱了。但是人漂亮个，真个漂亮。男个好长得介漂亮。对伐？后来我再晓得，是混血儿啦。伊混得了绝对彻底噢。后首来混血儿一定要混得远。后头，侬看看，费翔只眼睛多少花啊。碧碧蓝。看得来男人心也会跳个噢。要叫是我想伊搿只眼乌珠一只绿个一只蓝个？迭个是波斯猫。伊卖相真个嗲。为啥？伊混血儿混得远。因为伊拉爸爸对伐，一个是美国人一个是中国人。所以我得出个结论，混血儿侬想生得漂亮，一定要混得远。越远越好。对伐？要么东西向，要么南北向。讲侬最起码要超过8000公里以上。侬比如讲混血儿近个闲话就勿漂亮了。如果我搿只面孔算混血儿，最多是越南脱柬埔寨个混血儿。搿种混法就是混出我搿种面孔。对伐？ 葛末，辣辣90年代以前，整个八十年代应该是以什么为主旋律呢？以民歌！有个人噢，唱只歌，唱了交关年数。搿搿只歌是嗲个，阿拉人人侪会唱。搿个侬拨我只音。.......娜听过伊唱过第二只歌伐？我好像呒没听着过！怪睐，伊搿颗桃花开了毛三十年唠。哪能勿会谢脱个呢？要么伊是塑料花。我上两个号头又看到蒋老师辣辣中央电视台又辣：“在那桃花.....。" 一套西装还是一九九六年个。成本忒低了。 说到流行乐坛，一个人勿能勿提。我认为搿个人是中国流行乐坛唯一个人以为称得上艺术家个人。啥人？刘欢。为啥道理我讲伊是艺术家？张学友介有名气，最多是偶像，是实力，是天王。称不上是艺术家。因为刘欢介有名，出了介许多成功个作品，到搿歇为止，伊还守辣一方教台辣辣教书育人。迭个就老勿容易个。对伐？交关人，伊经历勿起名利个诱惑会走个。人家属于做人有烈根性个。刘欢我晓得是流行乐团里向学历最高个。只嗓子多少嗲？搿只嗓子绝对可以告阿拉阿哥拼一拼个。一只歌，第一只歌叫啥歌啊？第一只歌叫皮衣警察。就是便衣警察。......老嗲个搿只声线噢。因为我欢喜伊葛唠我关注伊。后头对伐？我老痛苦个。我哪能痛苦侬晓得伐？因为我发觉就是阿拉刘老师出名呒没多少辰光以后对伐，伊路勿会走了。迭个我正宗帮伊急煞脱啦。伊后头走路哪能走个？伊搿恁走个。埃哎伊就变成搿恁了哦？！刘欢出名介许多年数噢，伊只头颈我从来呒没寻到过。......对伐？其它阿拉覅讲，刘欢，阿拉去年个奥运会开幕式，告搿个萨布赛来曼，侬讲啥人去，只有刘欢去。只有刘欢压得牢。....对伐？侬叫杨坤去啊？杨坤去迭恁唱，.....拨人家biang一枪打煞脱。一定要刘欢。搿次我讲我看好以后搿个奥运会结束以后噢，我个朋友，跑到我搿搭来，哎伊讲啥？唉立波，我晓得侬欢喜刘欢。刘欢嗲是嗲，生活嗲，唱得嗲。但是伊有问题个。我讲啥问题啊？呀，搿种介大个场面，伊哪能着件老头衫上去？搿个伊忒呒没派头了。我讲侬懂伐啦懂伐啦？哪能介勿懂个啦？人家好着衬衫个？人家也想着衬衫个呀。人家衬衫一着着到搿搭睐？！对艺术家要宽容。刘欢搿只头颈伊，伊着老头衫已经着到搿搭了。伊还想着立领睐。伊立领一着着到搿搭睐。哪能？侬叫刘欢抢银行去啊。对艺术家要宽容，侬去看伊唱歌，侬又勿是看伊去走时装。伊又勿是平民模特儿，对伐？再讲，娜去想，阿拉中国文艺界里向，唱歌唱了好个，但是人长了勿是老成功个，多睐，又勿是阿拉刘欢一介头。侬凭啥讲阿拉刘欢啊？人家女个也有个。懂么勿懂。阿拉流行歌坛里也有一个女个，也属于大姐大个。人家唱歌，唱一只红一只。闹，人人长得是还蛮过分个就是。对伐，基本浪属于讲就是闹我两条腿并起来，基本浪拼勿过伊一条腿。但是人家歌唱得好呀。搿种声音绝对是天籁之音啊。对伐？．．．．．唱了多少嗲辣嗨啦。人家也勿好看哎。我看到过伊本人个。门牙还分开来个。侬仔细一看，呦，小舌头也看得出个。但是人家歌嗲呀。在青藏高原多少嗲。我唱得上去随便哪能。对伐？ 事实证明，娜去看，特别是文化艺术界个人，我得出一个结论，凡是面孔长得难看个人，一般生活侪老清爽个。娜讲我只面孔好看勿啦？中柬混血儿。生活清爽，其它勿用讲。侬讲张艺谋，张艺谋只面孔难看伐啦？绝对个。侬讲伊漂亮属于侬有问题个。张艺谋搿只面孔像拨菜刀劈过一样。而且是呒没开封个菜刀。但是并勿影响伊成为大师啊？！奥运会宏辉巨作勿得了个。侬讲是伐？侬侬侬侬冯小刚，冯冯小刚搿只面孔娜讲还好叫面孔伐？但是人家拍一部成功一部哎？！从集结号，叫啥拍一部成功一部。搿并勿影响伊个成就。侬覅讲冯小刚搿只面孔，如果伊讲是夜里九点半，我辣辣弄堂里碰到伊哦，冯小刚只要搿恁？排走过来哦？我覅伊动手，我自家皮夹子马上交拨伊。但并勿影响人家成为大家。 谢谢谢谢，其实侬看，满场呒没一个人走，搿是对一个演员顶顶大个奖赏。老开心个。真个，演了两个半钟头了，实在勿好意思，耽误娜了。我我我真个，我只看到一个人跑。我估计伊拉屋里水龙头呒没关脱。否则伊哪能舍得跑呢？ｏｋ，立辣搿个舞台浪，勿得勿使我想起去年三月份已经仙世一代滑稽泰斗阿拉个周柏春老师。我想周老师个离去，讲起来人家少了一份欢笑，但天堂一定会多一份快乐。所以我搿个最后一个环节就是对大师个致敬。阿拉周老师走了以后呢？我倍感孤独。真个，蛮潮个。因为我环顾四周啊，上海滑稽界姓周个，有名气个，只有我一家头了。我虽长袖善舞，必过焉能挥去一家头个寂寞。所以就辣辣搿搭学学阿拉周老师，拨大家一道过过念头好伐？阿拉周老师讲闲话交关有特色。叫啥呢？叫温吞水死样怪气。讲闲话搿恁个。搿冷面滑稽哦。阿拉周老师面孔。．．．