介绍:
《小猪唏哩呼噜》
第一集、唏哩呼噜是啥人
讲到唏哩呼噜，就要先讲唏哩呼噜个阿爸搭姆妈。唏哩呼噜个阿爸，是只猪猡。伊讨个老婆嘛，蛮巧个，也是一只猪猡伊讲。有的一天哦，搿位猪猡太太帮猪猡先生生了老大一窠小猪猡。哦哟，搿记猪猡先生开心煞脱唻，伊讲：“哈哈哈，乃末我做爸爸唻！” 他立辣边浪向数哦：“一、二、三、五、六……” 猪猡妈妈讲：“错脱唻，‘三’后头是‘四’！” “哦哦哦！”猪猡爸爸又开始从头数：“一、二、三、四、五、六、八……” 猪猡妈妈讲：“又错脱来，‘六’后头末是‘七’呀！” “哦哦哦！”猪猡爸爸只好又从头开始数。伊一直数了18趟哦，再刚刚数清爽。“哦哟我的妈妈哎!”，猪猡爸爸拿头浪向个汗揩脱：“老婆，侬忒接棍了，一枪头养了12个！嗯！我也蛮了勿起个，我是12只小猪猡个爸爸！” 辣末生头，伊一拍脑袋：“哎呀，我忘记脱数有几只光榔头，几只小姑娘了呀！”
乃末伊又开始数：“小姑娘、小姑娘、小姑娘、小姑娘、小姑娘、又是小姑娘……哎哟，哪能介许多小姑娘啦！” 一直数啊数，数到辣末头一个，猪猡先生一记头开心个叫起来了： “哇，男~男~头~！” 伊拿搿只小猪猡高高个举过头顶，哇啦哇啦穷叫： “搿是我个宝贝！搿是我个乖囝！”
搿搭乃要讲讲，猪猡先生乃实际浪向呒没啥个重男轻女个思想个，伊为仔介欢喜呢，只不过是因为12只小猪猡里向，就搿能介一百零一只男男头。 他个搿只“乖囝囝”，就是唏哩呼噜。 不过啊，埃个时候搿只小物事乃还勿叫“唏哩呼噜”，而是叫“小十二”。
搿乃也是呒没办法个事体呀。㑚自家想想看，㑚阿爸姆妈帮㑚起名字个辰光，要死脱多多少少个脑细胞啊。但是㑚侪是一家头呀，猪猡爸爸要一枪头想出12只名字唻！伊哪能想得出来啊？他一头辣辣查字典，一头辣辣跟自家老婆商量，两家头哦，一直忙到夜里向天末也黑了，蜡烛也点起来唻，再刚刚想出来两只名字。猪猡阿爸讲：“哎哟，衰瘏煞脱了 ，我要睏觉了……明朝再讲伐！” 猪猡姆妈乃蛮肉麻猪猡阿爸个：“哎哟，看看较侬头浪向个汗，是淌淌淌淌点，快点去休息伐！动脑子个事体末最吃力唻，我看啊阿拉明朝也覅想了。索加就叫伊拉‘阿大’、‘阿二头’、‘阿三头’、‘阿四头’、‘阿五头’搿能介排下去末好了呀！……搿能介又分得清爽啥人是啥人，又记得牢！” 猪猡阿爸老感动个。伊讲：“侬真是世界浪向最体贴，最聪明个老婆，葛末就搿能伐！”
本来乃搿一切个事体乃已经侪决定下来了，偏偏搿马小姐多了一句嘴巴。事体乃是搿能个：
一天夜里向哦，猪猡先生一家门辣辣屋里向吃夜饭，齐巧搿马小姐从窗门外头经过，伊一记头呆脱咾，伊从窗口头拿头探进来讲：“哦哟！㑚屋里向吃物事声音介响啊！㑚一家门吃饭，整只村子里向个人侪听到唻！” 猪猡屋里向吃饭乃，本来每个人侪有的一把调羹个。只不过，时常部伊拉吃到开心个辰光乃，就会得统统拿调羹厾脱，拿嘴巴伸到碗盏里，“呱嗒呱嗒”、“咕噜咕噜”一片响，吃的唻碗盏里向泡泡也要出来了。马小姐搿能介一讲末，两个大人、十一个小姑娘末侪觉着难为情唻，一道停下来。只有阿拉个小十二，伊乃还当仔马小姐辣辣表扬伊拉唻，乃招吃的唻更加起劲唻。唏哩呼噜，唏哩呼噜！马小姐捂牢嘴巴穷笑：“唏哩呼噜、唏哩呼噜，香唻，香唻！”
讲好，伊就嘻嘻哈哈个跑脱了。 猪猡个妈妈乃听了就勿捂心了，嘴巴里向哦就开始呜哩嘛哩了：“搿只小姑娘，痴头怪脑，油腔滑调，瞎三话四，瞎七搭八，一眼规矩也呒没！伊自家有啥好个啦？头颈末绝绝细，还拖了介大一根尾巴，像把扫帚一样个，难看的唻臭要死！” 猪猡阿爸倒讲：“哎！实际浪‘唏哩呼噜’也蛮好个嘛，一听见末，就觉着饭末也香喷喷、莱末也香喷喷，浑身适宜！唏哩呼噜、唏哩呼噜，哈哈，灵个灵个，阿拉的小十二，索加就叫伊‘唏哩呼噜’伐！” 猪猡姆妈一听，也马上就同意了。好，乃末㑚侪知道“唏哩呼噜”是啥人了伐。
大家还在听
