介绍:
《小猪猡唏哩呼噜》
第二集、大狼拿唏哩呼噜叼了跑喽
有的一天夜到哦，有的一只从荒郊野外个大狼溜到村子里向来咾。
伊哦，还带了一把伊自家顶顶欢喜个猎枪，外加伊还轻手轻脚，鬼头鬼脑，迓迓较，迓迓较。
伊哦先偷偷摸摸个去推山羊先生个门，欧，门浪向插销插辣盖，伊推也推勿动。后说来乃伊又去推鸭子太太个门，呒没想到鸭子太太个门勿但别辣盖，还辣辣外头哦加了一道铁栏栅伊讲。狼先生摸到冰冰冷个铁杠子高头，心里向呴勿啦：“哦哟有啥了勿起啦！搞得来好像伊拉个肉侪是巴西烤肉一样个！帮帮忙好伐！是勿啦？是勿啦？一股腥气味道，请我吃我还覅吃唻！”
狼先生又跑到第三门人家。这门人家个门哦，伊轻轻一推，欧，开了伊讲。搿只狼末头颈末笡辣盖，耳朵末竖起仔朝里向听。里向個房间传出一大片打呼噜个声音，呼...呼...
狼先生朝里向走，伊一只脚刚刚抬起来，就拨一只又大又软个物事拌了一记，哇一记，哦哟，伊掼了一只倒栽葱。哦哟乃末伊只嘴巴末也磕到地高头，手里向搿把枪末也差眼眼落脱！哦哟！
“哎哟哇啦！”狼先生捂牢自家只鼻子，疼得唻眼泪水也出来了。突勃瘤也出来了。哎，但是等伊爬起来仔细一看，欧，伊马上又开心起来了，“哦，原来勿是中了啥个埋伏啊，是一只介大个猪猡啊，哦哟喂，搿只大块头哪能介壮个啊！”
搿只睏辣地浪向个大块头是啥人乃？咳，就是猪猡爸爸呀。伊夜到头勿是要去关大门嘛，两只耳朵甩过来甩过去，人末一头辣辣朝门口妈发妈发，一头辣辣自说自话：“嗯！我要豪稍拿门锁脱，否则大狼假使要是来了乃末就完结了！虽然讲我有的12个小人，但是随便嚡里只落脱我侪要肉麻个呀！哎，今朝我忒忙了，脑筋动了交交关关，一塌刮子就睏了18个钟头，衰瘏煞脱了！”
伊嘴巴里向末一边叽里咕噜，一边朝门口头走。但是刚刚走到门个边浪向，伊就“pia”一记横辣地浪向，呼哒呼哒睏着了伊讲。猪猡爸爸个睡眠质量乃一直是老好个，从来用勿着吃啥个“安定”唠啥个。葛唠讲乃，尽管伊拨搿只狼搿能介‘哐’撞了一记，但是啊，伊还是呒没醒过来。“嗯...嗯...”伊一只万吨轮调头，翻过去，又打起呼噜来了。“呼...呼...”
狼先生乃末搿记放心唻，伊一口头哦，叼牢猪猡先生头颈后头个搿块槽头肉，就开始往门外头拖。“嗯......！”但是呢伊拖了半日天，猪猡先生一动也勿动。
狼先生搿记胸蛮闷哦，接下来呢伊又对自家讲：
"就算拖回去，一顿头也吃勿脱。我屋里向又没电冰箱，摆了辰光长了乃就不新鲜了！"
他又跑到里向房间，去拖猪猡太太，还是拖不动。他又劝自己讲：
"这位太太的皮哪能介老个啦。一拖拖的唻老老老老长，像块牛皮糖一样个。我屋里三个小囝，牙子还没长齐，介老个皮伊拉哪能嚼得动啦？牙子也要崩脱唻，就算吃下去肚皮肯定也要痛个好伐！"
最后啊，狼先生决定勿要介贪心，否则啊伊要黑心吃白粥了，伊准备就拖一只小猪猡就可以了。伊从12只小猪猡里向拣了一只顶顶胖个，叼牢伊个头颈，从大门口跑出去了。
搿只顶顶胖个小物事末，㑚晓得个呀，就是唏哩呼噜呀。
大家还在听
