介绍:
《小猪唏哩呼噜》
第廿一集，上课哪能介有劲
哇呜老师个房间老小个，十几个学生子就拿房间轧的唻扑扑满。
上课个辰光，随便侬坐辣嚡里搭。有个人做辣台子浪向，有个坐辣床浪向，有个坐辣地板浪向。小猴子安安索加勾了吊灯高头，拿书包末缚辣电线浪向，两只脚荡发荡发。
小猪猡唏哩呼噜看到小狐狸丁丁边浪向有的一只空位子。伊就跑过去搭伊坐辣一道。
讲台乃，是两只叠起来个破箱子。黑板乃，也是哇呜老师自家diy做出来个。拿黑颜色个锅底灰，腔眼胶水，调辣一道，再搨辣墙壁浪向。的角四方，远看乃就帮真个黑板呒没啥两样。
哇呜老师看一看自家个手表，就举起一只蛮大个铃铛，咣当咣当摇起来了，嘴巴里还讲“上课啦！”
第一节课是语文课，哇呜老师刚刚开始讲，小花猫咪咪就拼命叫起来“老师，伊抢我个蝴蝶结！”
小猪猡看了老清爽，是小猴子安安趁老师回头写黑板个辰光，拿尾巴绕辣吊灯高头，身体荡下来，一把抢脱了小猫咪个蝴蝶结。
“拿蝴蝶结还拨人家，安安！勿可以欺负小姑娘！”哇呜老师讲。
小猪猡看到安安拿蝴蝶结厾下来还拨小猫咪，刚刚松了一口气，辣末生头，伊觉着自家个一只耳朵好像拨一只大蜜蜂狠狠个叮了一口！痛的唻伊“吱”一记头叫起来。
哇呜老师问“唏哩呼噜，哪能回事体啊？”
小猪猡指牢旁边头个小狐狸丁丁讲，“伊老用力道个咬了我一口，痛煞脱了！”
哇呜老师讲“丁丁，勿许欺负新同学！”
伊搿句闲话还呒没讲光，坐辣眠床浪个小熊又呜哩嘛哩勿晓得辣讲啥。
哇呜老师问“小黑，侬嘴巴里叽里咕噜讲啥物事啊？”
小熊讲，“嗯，我是讲老师侬屋里个床一眼也勿灵，哪能侪是水啦？”
“侪是水？”哇呜老师轧过去看，真个，伊个床浪向湿脱老大一滩。
伊抬头看看，天花板高头虽然有的几滩水渍浞，但是搿歇点并呒没滴水。埃个是上趟落暴雨个辰光漏水留下来个印子呀。搿歇外头太阳老大个好伐？葛末是哪能回事体啊？
伊又回头看看五斗橱，五斗橱浪向是为小朋友们准备个水杯，水壶，侪呒没翻脱呀！
“到底哪能回事体啊？”哇呜老师问坐辣床浪个小绵羊兄弟。“是勿是㑚又带饮料到学堂里向来了是伐？豪稍拿出来！”
绵羊阿哥张了张嘴巴，呒没讲啥。绵羊阿弟朝小熊看了看，吓丝丝个讲“阿拉呒没带饮料，嗯，是小黑，射尿出了！”
伊搿句闲话刚刚讲好，满房间个学生子通通笑起来了，哈哈哈哈哈哈哈。
原来床浪向个水，是小熊伊自家弄个。小狐狸丁丁带头起哄，一边哇啦哇啦瞎叫，一边两只手穷拍台子，两只脚穷蹬地板。小猴子安安拿手指末头塞辣嘴巴里，拼命吹口哨。哇，搿记真个闹猛啊！吵的唻房顶也要拨伊拉捎脱了！
唏哩呼噜觉着老扎劲个，也跟了大家哇啦哇啦穷叫！原来，上课介有劲啊！
等大家侪吵了差勿多了，哇呜老师搭小熊讲“下趟覅再搿能了哦！侬看看较，下头个被头也湿脱了，老师夜到还哪能介睏觉啊？要想射尿，侬就举手搭老师讲呀！‘老师，我想射尿！’”
伊刚刚讲到搿搭，吊灯高头个小猴子安安就举起手讲，“老师，我要射尿！”
挨下来，房间里举起一大片蹄子，脚爪，大家侪讲“老师，我要射尿！老师，我也要射尿！”
哇呜老师呒没办法，好伐，也正好趁搿个辰光拿床单被头统统拎到院子里向去晒。伊就讲“好好好，侪去伐！”
辣辣院子里，哇呜老师一头辣辣往绳子浪向挂床单唠，被头唠啥，一头辣辣东张西望，嘴巴里向还勿停个讲“哎哎哎，覅瞎奔，覅跑到外头去。哎侬快点回来！哎哎哎，侬做啥？啧！讲侬呀，安安，侬爬辣树浪去做啥？树浪向又呒没厕所间！”
“哎呀！我讲阿汪！侬只小赤佬哪能出尿出辣我烧饭个镬子里向啦！”
哎，好勿容易拿搿点小捣蛋通通弄回教室，哇呜老师搞的唻汗淌淌滴，又开始上课。
伊就讲了两句，小猪猡就已经吃力的趴辣地浪向睏着了“呼呼呼呼”。小猪猡打呼噜个声音老响老响，小朋友听了侪哈哈大笑。哇呜老师快点讲“覅吵覅吵，伊拉猪猡屋里向个人，本来就睏的比阿拉侪多。伊还小，外加又是头一天读书，让伊睏脱歇伐。㑚就当呒没听到。”
但是啊，小猪猡个呼噜声越来越响“呼呼呼呼”。响的唻已经连哇呜老师讲闲话个声音也听勿出了。哇呜老师呒没办法，寻了一张报纸，拿小猪猡个面孔遮起来，希望搿能介可以让声音小眼。
呒没想到，小猪猡打一记咕噜“呼呼”，报纸就“呼”一记鼓起来，三鼓两鼓，最后报纸直接飞起来了。
哇呜老师呆煞了，后说来伊又拿来只面盆，扣辣小猪猡面孔浪向。但是搿能一来，勿得了！呼噜声更加大了，一记头比原来响了好几倍！原来是“呼呼呼呼”，现在是“轰轰轰轰”！
边浪向个墙壁也抖起来，房顶高头个灰也落下来了。所有个人也顾勿上笑了，豪稍侪拿耳朵捂起来。
还算好，下课个辰光终于到了。哇呜老师看看自家个手表，又举起了埃只大铃铛，用力个摇起来，“咣当咣当”。
大家还在听
