介绍:
《小猪唏哩呼噜》
第廿二集 侬当我是啥人？我是一只大狼！
第二节课，是算术课。唏哩呼噜乃末勿睏觉了，因为伊老欢喜算术课个。爸爸妈妈个算术侪一天世界，买物事个辰光，随便哪能也算勿清爽，一直拨人家骗。唏哩呼噜晓得，屋里向下趟侪要靠伊個。
呜哇老师摇好上课铃，就辣辣黑板高头写下来“3+5=”。
写好伊回过头来问，“啥人会的算？举手回答。”
小猪猡第一个举手，但是呜哇老师呒没叫伊。伊看到小狐狸丁丁正辣辣抢小猫咪咪个铅笔盒子，就指牢伊讲“丁丁，侬上来算！”
小狐狸慌慌张张个走上去，辣辣等于号后头写了一只“7”。
呜哇老师问，“大家讲，丁丁写了对伐？”
小朋友们开始叽叽咋咋，有个末讲对，有个末讲勿对。小猪猡辣辣下头讲“勿对，三加五等于八。”
呜哇老师讲“唏哩呼噜讲的对，三加五应该是八。”
小狐狸丁丁嘿嘿嘿笑了起来“伊是稀里糊涂，伊会得对啊？明明就是七！”
哇呜老师讲“丁丁，侬看，打比方，第一天侬交个学费是三粒葡萄。”讲到搿搭，伊辣辣黑板高头画了三只圆圈圈。“第二天，侬又交的来五粒葡萄。”伊又画了五只圆圈圈。“好，现在侬数数看，共总有的几粒葡萄？”
小狐狸丁丁讲“侬画个啥物事啊？葡萄啥地方有的介大啊？侬搿是桔子好伐？”
呜哇老师讲“侬覅管是啥物事了，反正侬数数看，夯不啷当一共有的几只？”
丁丁勿想输拨小猪猡，伊数“一二三四五六七，七只！”
呜哇老师讲“勿对，再数一趟！”
丁丁又数了一趟“一二三四五六七，七只呀！”
呜哇老师有眼急了，“侬哪能连数数字也数勿来？”
丁丁讲“明明就是七只呀！勿相信侬问安安，伊拉爸爸是税务局局长，算术覅忒好哦！”
小猴子安安辣辣吊灯高头喊“对个呀，就是七只呀！”
丁丁又问“阿汪，侬讲讲看，是几只？”
小狗汪汪讲“当然是七只咾，搿还用问？阿拉爸爸是统计局局长，算术也老好个好伐？”
呜哇老师讲“㑚搿帮小贼今朝哪能桩事体啊？侪睏扁头啦？现在我指一只，㑚数一只！”
搿辰光，丁丁一记头凑到呜哇老师耳朵边浪讲“覅数了。侬只要讲是我对，勿就好了嘛！侬只要讲是七只。明显我就带拨侬七块奶油蛋糕，就是高头有的交关奶油个埃种。侬假使讲是八只，哼哼，明朝我连点心个屑屑头也勿带的来！就带八粒芝麻！再叫安安，阿汪伊拉啥物事也覅带的来，饿侬三天！”
小猪猡唏哩呼噜听勿到小狐狸丁丁帮呜哇老师讲啥物事。伊只看到呜哇老师听了丁丁个闲话之后两只眼睛定烊烊个朝前头看，整个人侪呆脱了。
呜哇老师心里向辣辣想“是呀，安安，阿汪伊拉侪听丁丁个闲话，如果真个连牢三天啥物事也勿带的来，哇！”
满房间个学生子侪看牢呜哇老师，伊拉侪勿晓得丁丁帮老师讲了点啥，好拿老师吓的唻搿能样子。
辣末生头，呜哇老师一记头跳起来！拿满口个大牙子统统龇出来，朝牢小狐狸哇哇叫“侬当我是啥人？我是一只大狼！狼！狼侬懂伐？我就算饿上三十天，也勿会得乱讲八讲，误人子弟！误人子弟侬懂伐？啊！狐狸小鬼我讲拨侬听！三加五等于八！等于八！等!于！八！”
呜哇老师个喖咙越来越响，所有个人侪拨伊吓戆脱了。过脱一歇，小猴子安安反应最快，伊从吊灯高头一记头窜下来，直接逃到外头去了。小狐狸丁丁搭小狗汪汪豪稍跟了后头一道奔。挨下来，所有个小动物侪轧了一捉堆，来煞勿及个往外头逃。
唏哩呼噜勿晓得拨啥人撞的唻跌了一只大跟头，跑了最最后头。不过啊，尽管伊已经吓的唻七荤八素了，但是伊还是记牢爸爸帮伊讲过个小人要有礼貌，伊一边跑，一边还勿忘记朝牢呜哇老师讲了声“老师再会！”
大家还在听
