介绍:
《小猪唏哩呼噜》
第廿三集，阿拉是老朋友唻
第二天早浪向，小猪猡去上课。伊看到呜哇老师屋里向个紧紧个关辣盖。两张封条交叉个贴辣高头，像只大鐾搞。小猪猡问问小马白白，“搿是哪能会事体啊？”
小白讲，“我也勿晓得，阿拉问问毛驴伯伯伐！”
摆馄饨摊头个毛驴伯伯正辣辣摊头面前包小馄饨。伊帮小猪猡伊拉讲，“大清老早就搬了跑了，呒没看到门也拨封脱了嘛？哎，搬脱也蛮好！伊搭我做了半年隔壁邻舍，伊连一碗小馄饨也呒没买过好伐？断命个还问我讨过两耷清汤！搿能介一只穷瘪三，㑚跟牢伊好学啥物事啊？学哪能讨饭啊？”
哎，唏哩呼噜就上了一天课，就呒没书读了。猪猡太太急煞脱唻，勿停个叫猪猡先生快点想想办法。猪猡先生讲，“我也老急个呀。我听讲又新开了一只学堂，我就去寻伊拉校长，鳄鱼校长。呒没想到鳄鱼校长讲，辣辣伊拉学堂读书每个小人要交学费一百万！”猪猡太太插嘴讲“侬是想讲一百块伐？”猪猡先生讲“呒没！真个是一百万！”猪猡太太听了之后，差眼昏过去哦。过了老半天伊再讲，“阿爹里个娘唻，拿我卖脱也勿够啊！算我五十块一斤好唻，我碰顶也只值一万块呀！一百万，啥地方有啊！”
唏哩呼噜呒没书读了，伊啊，只好天天辣附近荡来荡去。有的一天，伊正好辣辣马路浪向走路，辣末生头有一部赤刮辣新个摩踏车开到伊面前，“哔”一记停下来。
“侬好啊！唏哩呼噜！”开车子个大模子朝伊打招呼。讲好，搿只大模子拿头盔摘下来。呀！是呜哇老师啊！呜哇老师着辣一件赤刮辣新个皮夹克，还穿了一双锃锃亮个新皮靴。帮原来个样子完全勿一样了。伊朝四周围看看，搭唏哩呼噜讲“走！搿搭有的一间酒吧，老师请侬吃冰激凌！”
酒吧里老清净个，伊拉寻了一只相当适宜个位子坐下来。呜哇老师帮唏哩呼噜点了蛋糕，冰激凌，自家就点了一杯啤酒。小猪猡从来呒没吃过味道介赞个蛋糕。伊唏哩呼噜，唏哩呼噜个吃下去一块大蛋糕，三份冰激凌之后再讲“呃我帮小白一道去读书，看到老师侬个房子拨封脱了。”
呜哇老师讲“小狐狸丁丁生气了，让伊拉爸爸去寻工商局个狗局长，税务局个猴子局长。伊拉跑过来，一个末讲我凶学生子，态度勿好，吊销了我个营业执照。另外一个末讲我收个点心屑屑头咾，烘山芋唠啥个侪呒没交过税，属于偷税漏税。就搿能介，拿我个门也封脱了。猫小姐，再来一份点心，两份冰激凌。”
小猪猡豪稍讲“够了够了，一百块洋钿一份，忒贵了。”
呜哇老师笑了，“呵呵老底是真个吃够了，还是嫌鄙贵啊？覅客气，阿拉是老朋友唻！”
老朋友？伊就上了一天课就是老朋友了？小猪猡呆样样个看牢呜哇老师。
呜哇老师讲“谢谢侬救了我三个小囝。要勿是侬，月牙熊先生定规要拿伊拉吃脱了！”
呀！呜哇老师原来真个是埃只拿伊叼了跑个大狼啊！不过啊，搿歇点唏哩呼噜一眼也勿吓了。大狼先生正用老感激个眼神看牢伊，眼泪水也辣辣眼眶里转来转去。
“侬还挖了蚯蚓拨伊拉吃。”呜哇老师讲，“我哪能寻勿着搿排物事乃？哎我挖了交关地方，侪挖了蛮深个，但是就是寻勿着。”
小猪猡讲“蚯蚓勿是啥地方侪有个。侬要寻地势低一眼个，潮湿一眼个地方，最好是烂泥乌浆高头再盖眼烂糟糟个树叶子，就对了。”
呜哇老师讲“是伐？哎哟，唏哩呼噜真是一只懂经个小猪猡。喏，吃伐！”
小猪猡问“寻着侬个枪了伐？”
“当然，搿又勿用寻个，勿是就辣辣房间里向嘛？搿也要谢谢侬！不过埃把枪也已经呒没了，拨我卖脱了。哎，介赞个一把枪哦！有啥个办法呢？总规要吃饭个呀！。我个三个小囝末，侪拨我宠坏脱了。我总归想伊拉介小就呒没妈妈了，作孽八腊个。呒没想到伊拉倒好，除脱肉帮鱼，别个物事侪勿吃！后头没办法唻，我就到搿搭来教书。但是搿帮小贼就拨眼点心屑屑头，烘山芋，淡馒头唠啥，我个小囝根本就勿吃。噢，勿好意思，我勿是辣讲侬！㑚屋里人口介许多，能帮我带淡馒头我已经老感动了。我一看到搿个铜板就邪气开心，我可以帮我三个小囝买点小鱼小虾。”
小猪猡问“侬老里巴早就认出我啦？”
大狼先生讲“是呀，侬来读书，我一看，咦？搿物事伊个唏哩呼噜嘛！上趟拿侬叼了跑，勿大好意思帮侬打招呼，再讲，我也怕侬问我，大狼先生，侬个三个宝宝呢？”
小猪猡搞勿懂，“搿是为啥？”
大狼先生讲“侬勿晓得？养小囝要交‘狼头税’啊！一个小囝八千块，三个就是二万四啊！我只好假装呒没养过小囝。”
搿倒是真个，唏哩呼噜个爸爸也为了交搿个“猪头税”动了交关脑筋。
大狼先生讲“我现在好了，辣辣一家大公司当职员，每个号头好赚老多钞票。还租了一套公寓，拿三个小囝侪接过来了。”呜哇老师问小猪猡，进了新个学堂了伐。
小猪猡拿鳄鱼校长个事体讲了，呜哇老师讲，“呒没关系，等我赚够了钞票，我也造一座学堂。到时候侬来读书，我一只铜板也勿收侬。”
唏哩呼噜听了老开心个，伊搿一开心别个呒没啥，就是又吃了九份蛋糕，廿八份冰激凌。
大家还在听
