介绍:
《小猪唏哩呼噜》
第廿四集，接棍个保险箱
大狼先生也就是呜哇老师个学堂关门了，搿帮皮大王，小猴子，小狗，还是小狐狸唠啥，天天辣辣马路浪向荡发荡发。后头马路高头白相腻脱了，伊拉又往同学屋里跑。葛唠啊，猪猡太太屋里向一直有的一帮小赤佬辣白相。伊拉顶顶欢喜到唏哩呼噜屋里向来，为啥呢？因为就算伊拉拿天花板也捎脱，猪猡太太也勿会得朝牢伊拉发火，伊脾气老好个。最多帮伊拉讲“㑚声音稍许轻点，否则鸭太太要骂山门个。伊一直讲，如果声音忒响，会得影响伊生蛋个。”
伊拉介欢喜寻唏哩呼噜呢，还有一只原因，就是因为唏哩呼噜是只老实大，伊从来勿会得欺负别人。
小朋友侪晓得丁丁就是点心店狐狸老板个儿子。丁丁屋里房子特别大，白相倌也有的交交关关，不过啊狐狸老板勿允许丁丁带任何小朋友去白相。为仔搿乃，丁丁帮伊拉阿爸有意见了，“哪能侬老是叫我覅野辣马路高头，要白相就去同学屋里白相，为啥勿好到阿拉屋里来白相呢？”
狐狸老板对自家儿子解释，“哎，人家屋里勿是呒没介许多钞票嘛。”
丁丁继续提出抗议“侬个钞票侪囥辣保险箱里向，搿只保险箱...”丁丁呒没讲下去，因为啊，搿只保险箱个接棍，伊是清爽个。
每趟狐狸老板开保险箱朝里向摆钞票个辰光，侪要用自家个身体拿高头两个会得发光个揿钮倘牢，常怕拨小狐狸看到密码。但是丁丁乃，老是假痴假呆辣辣地板浪白相，实质上迓迓较用眼乌珠瞄辣嗨。三瞄两瞄末，到底是拨伊晓得了密码是多少。
有的一天，丁丁辣辣电子游戏房拿钞票统统输光了。伊趁伊拉爸爸辣辣前头个店里向忙生意个辰光，偷偷摸摸溜进大房间。伊想末，只要晓得密码，应该是能开保险箱了。呒没到，伊搿只手刚刚碰着揿钮高头，还呒没来得及揿一记，就有的一只勿晓得啥地方飞过来个手，抽了伊一只大头耳光“啪”！哦哟，搿只大头耳光接棍啊，拿伊打了直接趴辣地浪向。
小狐狸豪稍讨饶，“噢我就摸一摸，根本就呒没想过要拿钞票！”
诶？伊又仔细看看，爸爸并呒没辣辣伊身边呀？伊来煞勿及跑到前头个店铺里向一看，伊拉爸爸还忙辣做生意呀。伊觉着哪能介奇怪，豪稍又跑回去。搿趟伊寻了一根丫杈头，用手拿牢最后头，想用前头个尖尖头去揿搿个揿钮。侬讲妖怪伐？丫杈头刚刚碰着揿钮，又是一记大头耳光，“啪”一记，打的唻小狐狸原地转了三圈。搿趟伊总算看清爽了，原来是保险箱个侧面，一记头伸出一只手来。阿爹里个娘唻，埃只手臂把好伸了介长介长啊，好直接碰着伊面孔个伊讲！搿还勿算，夜到头，狐狸爸爸拿伊叫的去，眼乌珠一瞪，“小鬼昏脱了是伐？今朝阿是想拿我个钞票？”
丁丁开始装夜壶蛋，“啊？侬个钞票？辣嚡里搭啊？”
伊拉爸爸笑笑“嘿，小鬼头还侬帮我摆花班，侬过来！”伊拉跑到保险箱前头，狐狸老板辣辣侧面啥地方揿了一记，保险箱个正面一记头出来一只屏幕。屏幕高头放个就是白天丁丁鬼头鬼脑去揿按钮，拨吃了一记大头耳光，趴辣地高头叫，‘我就摸一摸，根本就呒没想过要拿钞票！’还有后头伊又用丫杈头揿按钮，又拨打了，搿点画面。哎呀，乃末丁丁彻底闷脱了，统统侪拨录下来了伊讲，乃赖勿脱唻！
不过啊，狐狸老板也就是哈哈一笑，“哈哈，侬啊，还是好好较跟牢我学伐！帮我比起来，侬还差了远唻！”
再来讲讲唏哩呼噜屋里向，伊拉屋里向呒没啥个保险箱哦。看样子啊，伊拉也用勿着搿个物事。小狐狸丁丁呢，经常趁大家侪辣辣白相个辰光，搿面搭看看，埃面搭翻翻。最后啊，伊弄清爽了，猪猡先生屋里个搿眼钞票侪囥辣大床个席梦思底下头。不过丁丁并勿会去拿搿个钞票，因为唏哩呼噜是伊个朋友，对朋友总归要讲点义气个。覅老伊老是铆牢屋里保险箱里搿点钞票，毕竟搿钞票是伊自家屋里个。拿自家屋里个钞票叫拿，拿人家屋里个钞票，就叫偷了！勿关哪能伊毕竟做过几天大狼呜哇老师个学生子，搿眼道理伊还是懂个。
伊想晓得啥人个钞票摆辣嚡里搭就是好奇心而已。讲了严重眼末，也顶多只好讲伊有点强迫症。
大家还在听
