介绍:
《小猪唏哩呼噜》
第廿五集，电子游戏房
搿天仔，小朋友侪辣辣唏哩呼噜屋里白相好了，伊拉一个一个侪回去了。就挺下来小狐狸丁丁还呒没走。伊凿了一记唏哩呼噜讲“走，我带侬去只好地方。”
唏哩呼噜晓得，伊讲个好地方并勿是啥个好地方，是电子游戏房。伊犹豫了一歇，还是跟了一道去了。
伊拉到了电子游戏房门口头，有块牌子高头写辣盖“学生禁止入内”。但是边浪两位打扮得老好看个猫小姐就好像搿块牌子是透明个一样，跑上来拉牢伊拉讲“喵！欢迎光临！欢迎光临！”
等伊拉一走进游戏房。乖乖！行情行市侪是人，轧了扑扑满。外加有的交关学生子。
小猪猡头一趟来搿种地方，东看看，西张张，“哇！哪能介闹猛啊！”。
小狐狸丁丁讲“勿光介闹猛哦，搿搭还好赚钞票唻！”伊拉牢唏哩呼噜跑到一排花花绿绿个游戏机前头，指牢一台游戏机帮小猪猡讲“我帮侬讲哦，只要侬从搿只洞洞眼里厾一块洋钿进去，伊就会得吐出来十只一块头，运道好个说话，还会的吐出来一百只！”
唏哩呼噜听了呆煞了，“啊？会得有的搿种好事体啊？”我豪稍拿眼乌珠张张大，盯辣盖看。
有的一直穿了山青水绿个活狲正兴致勃勃个朝搿只小洞眼里厾角子。伊一枪头掼进去五只硬币。但是啊，过脱一歇歇，辣辣正面个屏幕高头辣末生头出来一只嘴巴张了老老大个大老虎！“哇呜”一记！
小猪猡吓的唻朝后头退了两步，讲“呃，下头呒没吐出来钞票呀？”
丁丁嘴巴一笡，“嘿，伊是戆大，侬看我个！”讲好，伊轧上去，厾了一只角子进去。接下去，搿台机器“叮铃咚隆”放了一段老好听个音乐，随后屏幕浪向出来一只老好看个猫姑娘。隔手从下头个一只口子里向吐出来交交关关一块头个硬币。统统堆了一只盒头里，堆了扑扑满。丁丁拿盒头端起来哈哈大笑“是一百块！哈哈哈哈！”唏哩呼噜彻底看戆脱了“啊？统...统统归侬了？”
丁丁一头拿角子一把一把朝袋袋里塞，一头讲“搿当然了！”
唏哩呼噜豪稍从袋袋里摸出一只一块头，也想冲过去投币。丁丁拦牢伊讲，“覅！阿拉等脱歇！”
埃只活狲再勿等唻，伊又掼进去一块洋钿，屏幕里向个大老虎又“哇呜”一记出来了！还是一块洋钿也呒没落出来。小猪猡看的唻头顶心冒汗哦，“还好侬拦牢我，否则我个钞票就呒没了。”
小狐狸得意洋洋个讲“嘿，听我个勿会错！”伊拉牢小猪猡走到旁边头，迓迓较讲拨伊听一只秘密。“每台机器侪是伊拉事先安排好个。吃下去五千块，吐出来一千块，当仔我勿晓得啊？我刚刚就蹲辣后头看，搿台机器已经吃脱交关钞票了，一分洋钿也呒没吐出来。搿能介我再厾一块洋钿进去。嘿嘿，哪能啊！”伊拍拍已经拨撑起来个衣裳袋袋。
伊拉又辣辣后头看了一歇辰光，丁丁领牢小猪猡到一台机器前头帮伊讲，“来，厾钞票进去。”小猪猡摸出一块洋钿，从搿只小洞洞里掼进去，“叮铃咚隆”又响起一阵好听个音乐，从下头“噼里啪啦”落出来十只亮晶晶个一块头硬币。小狐狸哈哈大笑，拍拍小猪猡个头，“呆辣盖做啥？快点拾起来，搿已经是侬个钞票了呀！”
小猪猡端起小盒头，手也辣辣发抖，伊拉爸爸一个号头只拨伊一块洋钿零用钿，从来呒没介许多钞票好伐？哎呀！伊发财喽！丁丁之前就帮伊讲过好几趟游戏房个事体，但是伊个爸爸妈妈一直关照伊勿要来搿搭白相。唏哩呼噜一直老听伊拉爷娘个闲话，一直也呒没来过。今朝末伊本来打算进来看看就走，但是现在伊一眼也勿想走了。伊袋袋里个十只角子一直辣辣叮铃铛啷个响，好像辣辣做梦一样。但是伊晓得，搿勿是做梦，丁丁拿到了一百块，也是伊亲眼看到个。进去一块，出来一百！哇塞！小猪猡也想赢到一百块！假使伊赢了一百块拿回去，伊拉妈妈肯定会得像拨老虫咬了记耳朵一样“哇”一记跳起来。
小猪猡就搿能，心心念念一门心事个跟牢小狐狸一道白相了起来。小猪猡勿怕浪费辰光，伊老耐心个候辣埃面搭。过脱一歇，我自觉有的一台机器一直吃钞票，交关辰光侪呒没吐出来过。伊觉着机会差勿多应该来了，就跑过去厾进去一块洋钿。但是啊，屏幕高头大老虎出来了，“哇呜”一记！欧！小猪猡个一块洋钿，呒没喽！哎，看样子，小狐狸个招势也勿大灵光。
小狐狸输钞票个速度，要比小猪猡快的多。当小猪猡袋袋里还有辣末一块洋钿个辰光，小狐狸已经立辣小猪猡边浪向练戆了，因为伊叫一分洋钿也呒没了，统统输光了。
小狐狸哦，两只眼睛通通红，拿手伸到小猪猡个袋袋里，讲“借拨我，我等歇还拨侬两块！覅看搿搭只有一块洋钿，讲勿定等脱歇又好变成一百块了！”但是啊，伊连一块洋钿也呒没捞到。
小狐狸输了发急了，伊两只手搓来搓去，帮小猪猡讲“侬回去拿点钞票过来！侬屋里住了近！”实质上根本勿是远近个问题。因为伊晓得，就算伊回去，也拿勿到一分洋钿。小猪猡皱牢眉头讲“但是我勿晓得我屋里个钞票辣嚡里搭。”
小狐狸也顾勿得介许多了，伊讲“哎呀就辣辣大床个席梦思底下头，侬上去爬到最最里向，就辣盖床横头个角子浪向。”
小猪猡从来呒没做过搿种事体，。但是啊，伊现在搭小狐狸一样个，心里向就想牢“如果进去一块洋钿，过脱歇就是一百块出来了！”伊毫勿犹豫个奔回去，急吼拉吼个从席梦思下头拿钞票拿出来，统统装进袋袋。
哎，可惜啊，搿点钞票呒没一块洋钿变成功一百块洋钿。反过来小狐狸帮小猪猡两家头从大户变成功了穷光蛋。
从游戏房走出来个辰光，小狐狸朝牢两个猫小姐咬牙切齿个讲“我要请㑚吃一顿生活！”两位猫小姐只是朝伊拉鞠了一躬，讲“欢迎㑚下趟再来！”
其实啊，小狐狸搿辰光已经好了，眼睛末也红了，头浪向汗也呒没了。伊忒小猪猡讲，“走，到我屋里去白相歇。”小猪猡就勿一样了，伊心里想“哎，假使我最开始赢了十块洋钿就走就好了，搿能介，我还是一个大户！”小狐狸又问了伊一声“哎，到我屋里去白相去伐啦？”小猪猡摇摇头，“㑚爸爸勿让去个。”伊想“还白相？屋里向席梦思下头现在是光秃秃啥物事也呒没了，爸爸回来看到，乃末要哪能办？”丁丁呒没注意小猪猡辣辣想心事，伊讲“阿拉老爸今朝出去谈生意了，勿回来吃夜饭，我屋里有的交关白相倌，让侬白相了煞根！”
就搿能介，小猪猡唏哩呼噜心事重重个跟牢小狐狸，来到了狐狸老板个屋里向。
大家还在听
