介绍:
《小猪唏哩呼噜》
第廿六集，辣辣小狐狸屋里向
丁丁呒没想到，伊拉爸爸勿但拿店铺关脱了，外加拿伊拉屋里个天井也锁脱了。小狐狸气的唻双脚跳，“哪能桩事体啊？我哪能连自家个房子也进勿去啊！”
唏哩呼噜讲“哎侬看，挨面搭贴了一张纸条。”
伊拉跑过去凑近看，高头写辣盖“丁丁，侬到唏哩呼噜屋里去白相伐。伊老实，勿会得欺负侬。夜饭就辣辣伊拉屋里吃伐。要是侬表现好我回来奖励侬十块洋钿。”哦，搿是狐狸老板留拨丁丁个纸条。
狐狸老板讲唏哩呼噜老实，不过啊搿歇伊勿老实咾。伊抬头看看围墙讲“阿拉从搿搭爬进去。来！我顶侬上去！”就搿能介，小狐狸踏辣小猪猡个肩胛高头，又蹬了伊个骷榔头一脚，老灵活个翻进去了。过脱一歇歇伊又厾出来一根绳子，拿小猪猡也拉进去了。
要讲进天井蛮便当个，但是要进房子就有难度了。两层实打实个防盗门，窗门浪向侪是介粗个铁杆子。搿哪能办？
小猪猡安慰丁丁，“覅紧个，侬覅担心。阿拉想想办法。”伊叫小狐狸帮忙两家头一道拿天井里向个一块水泥板捎起来，下头露出来一只洞洞眼。
丁丁凑过去一看，洞洞眼里向墨黜乌里黑，还有的一股臭烘烘个味道。丁丁豪稍捏牢鼻头讲“哦哟，黑黜黜看也看勿出，外加还介臭！”
小猪猡勿在乎，伊讲“进去再汏好唻，再讲又覅侬钻。我钻过去，帮侬拿防盗门打开来。”伊拿衣裳裤子统统脱光，叫小狐狸拿好，帮伊讲，“侬就辣辣防盗门外头等辣盖！”
小狐狸等了呒没一歇两道防盗门就侪打开了。但就是小猪猡浑身侪是黑不溜秋个烂污泥，还勿停个辣辣冒臭气。
小狐狸拼命叫，“哎！快去汏，快去汏！臭煞脱了！”小猪猡就去汏了清清爽爽，穿好衣裳，再拿厨房间个地板也揩清爽。哦，原来伊就是从埃面搭钻进来个。
小狐狸第一趟开始有眼佩服起自家个搿为朋友来。本事哪能介大，如果是伊一家头个说话，随便哪能也进勿来。不过乃末总算好了，伊个房间又属于伊了。
伊打开冰箱，拿出交交关关好吃个物事拨伊个朋友。还拿伊个高级白相倌统统拿出来，搿两只小鬼是彻彻底底白相了一只痛快。
等伊拉白相了腻脱了，丁丁又拿唏哩呼噜领到了伊拉爸爸和房间。小猪猡第一趟看到保险箱，笡仔头颈辣辣看。
搿个辰光，小狐狸肚皮里向坏水冒出来了。伊想“嘿，让唏哩呼噜去开一记保险箱，让伊也吃记大头耳光，肯定老有劲个！”葛唠伊就讲“搿只老鬼三里向有交关钞票，就是打勿开！假使侬好打开来，我立刻性就好还侬钞票。”
小猪猡豪稍摇头，“呃，搿能勿对个。”
小狐狸讲“搿有啥勿对！搿是我屋里向个保险箱，是我叫侬开个！”
小猪猡讲“是㑚爸爸个，假使㑚爸锁起来了，就说明伊勿让侬开。”
小狐狸讲“勿对勿对，伊是怕拨小偷打开！阿拉爸爸帮我讲“丁丁，我拿保险箱锁脱哦，是怕小偷进来拿伊打开来。侬可以随便开。好！我现在就讲拨侬听密码。”然后。伊就拿密码告诉我了。侬讲，伊是勿是让我随便开啊？”
小猪猡搞勿懂，“密码？密码是啥个物事？”
“呃，就是讲侬自家设定一只号头，譬如讲“3858”，就侬一个人晓得，人家侪勿晓得。然后乃侬再去揿搿只按钮。三-八-五-八，再伊拉把手，“咔吧”一记，门就开了。但是别人勿晓得搿个密码，葛唠随便侬哪能拉也拉勿开个。”
小猪猡觉着老有劲个，就问“葛末㑚爸爸勿是讲拨侬听...密...呃密码了吗？侬为啥还是打勿开？”
哎哟，丁丁意识到自家闲话讲豁边了，做啥要讲打勿开呢。伊眼乌珠一转，讲“呃，其实我打的开个，我讲打勿开呢，是因为我勿想让侬晓得密码。”
小猪猡讲“葛末侬开个辰光我勿看，我拿眼睛蒙牢。”
“侬会的偷看个！”
“葛末我到隔壁头等辣盖。”
小狐狸一看，搿能介下去小猪猡肯定勿会得上当了。伊只好又想坏主意，哎对了，唏哩呼噜最欢喜帮人家个忙，要是伊搿能介讲乃，“呃，实质浪也勿是怕拨侬晓得密码。侬介老实，如果我讲拨侬听，叫侬帮我保密，侬肯定勿会得讲拨人家听个。我打勿开呢，主要是因为埃只把手忒紧了，我扳勿动。大概是两交关光勿用，有眼锈牢了。”
哎，搿只小狐狸啊，兜了介大一只圈子，就是想让小猪猡去开保险箱。反正勿管哪能伊侪要让小猪猡出一趟洋相，好让伊开心开心。
果然勿出伊所料，小猪猡讲“我个力道大，我帮侬开，侬讲拨我听哪能弄。”
小狐狸讲“哎老简单个，侬直接过去揿按钮，就是左边一只最大个，开锁！”
小猪猡跑过去准备揿搿个按钮，小狐狸吓的唻“噌”一记跳了老老选，伊常怕埃只大头耳光也打到伊。小猪猡揿了一记按钮，“开锁，好了，后头打密码了，密码是多少？”
啊？小狐狸戆脱了，搿只保险箱一眼反应也呒没。大头耳光呢？哪能呒没出来？搿是哪能回事体啊？小狐狸真想自家冲过去，揿好密码马上打开保险箱。但是，伊又想到拨打好耳光以后，面孔浪向辣豁豁，搿个痛头势啊，伊是一生一世勿会忘记脱。丁丁还是勿大敢过去，伊只好立辣后头。朝牢小猪猡叫“葛末好伐，现在我拿后头个密码侪讲拨侬听，侬一记一记揿了慢点。F...M...1...3...0...5...2...8...3...FM1305283。覅搞错脱！”
伊搿句闲话刚刚讲好，就听到“咔吧”，“吱~~”，保险箱个门开喽。
哇，里向介许多介许多钞票啊！小狐狸豪稍奔过来，拿几向个钞票捧起来又撒下去，“哗啦啦，哗啦啦！”小猪猡立辣边浪向也戆脱了。伊从来呒没看到过介许多钞票。
接下去，小狐狸从搿堆钞票里数出来一点，摆了地板高头，帮小猪猡讲“搿是㑚爸爸囥辣席梦思底下头个三十七块洋钿，侬快点摆回去伐！否则拨伊晓得个说法，肯定要请侬吃生活。”看到小猪猡还呆辣盖，伊就拿搿钞票一把一把拾起来，塞到小猪猡个衣裳袋袋里。塞好之后，伊又拿出来两只硬币塞了小猪猡手里，讲“搿是前头帮侬讲好个，借一块还两块。”
小猪猡搿辰光开始为伊个朋友担心了，“侬搿能介做，㑚爸爸假使晓得，勿打侬？”
小狐狸讲“勿搭界，侬自家看，侬看得出钞票少脱伐？勿动大钞票就覅紧。拉头分阿拉爸爸根本呒没数目个好伐。”讲好，他继续一把一把往自家袋袋里塞钞票。一边塞，伊一边讲“嘿，真是怪了，为啥我一碰揿钮就...”小狐狸一高兴，就拿保险箱豁伊大头耳光个事体也讲出来了。小猪猡一听叫起来“原来侬讲生锈了是骗我啊，侬是想让我也吃一记大头耳光啊？”
小狐狸哈哈笑“嗨嗨嗨，白相相嘛！但是怪了，阿拉爸爸哪能会得犯搿种错误乃？伊离开搿间房间个头一桩事体就是检查保险箱好伐。保证搿只物事可以揎人家耳光。”
小猪猡问，“葛末假使伊自家要开保险箱个辰光呢？”
小狐狸指牢墙壁讲“看到搿只锁脱个铁盒头了伐？伊开保险箱之前，先要开搿只铁盒头，拿电源切断脱。阿拉爸爸覅忒聪明哦，伊拿电线埋辣地下头，啥人也寻勿着。啥人也覅想切断电源。因为如果电源拨切断脱，大头耳光就呒没用了。”
辣末生头，小猪猡好像懂了，伊叫起来了“哎呀，大概是我拿电源起的断脱喽！我爬地道个辰光，一根绳子绕牢我个脚。搿里头墨黜乌里黑，我啥个也看勿出。只好用力道一挣，搿根绳子就断脱了。”
小狐狸一听，跳起来喊“乃末完结了！搿肯定是电源线！乃招阿拉爸爸肯定要晓得我开过保险箱了。阿拉一定要拿电线接接好！”
小朋友们，讲到此地，我要拿搿只故事个结尾讲拨㑚听了。嗯，不过啊，搿只结尾勿是忒好。因为搿两只小赤佬一抬头。阿爹里个娘！就看到狐狸老板正立辣门口头，面孔扳起仔，凶巴巴个盯牢伊拉看。好唻！两家头拨狐狸老板活掐！
最后呢，哎，我勿大想拿后头个事体讲拨㑚听，怕吓到㑚。㑚还是自家猜猜看伐！
大家还在听
