我额上海（下）

离开地面50米，是另外一个上海。 灯火开得锃锃亮，整夜整夜勿关个。灯光个颜色搭勒弄堂里向人家屋里个勿一样，伊是冷个。勒伊眼窗口后头个，是勒高速运行个贸易公司、咨询公司、投资行、律师事物所，是无穷无尽个视频会议、越洋电话、股权纠纷、融资协议，是看勿见个刀光剑影搭仔滚滚个财源。 所谓个精英大清老早就西装革履个去上班了，勒地铁里向拨轧成功只饼。下了地铁，伊拉就像啥也没发生过一样整整自家个衣裳，头发理理好，仍旧是像模像样个，看上去风度翩翩。落班个辰光伊拉是用勿着轧地铁了，常庄要加班个。直到一两点，恒隆广场路边个出租车排着队，等候夜归个白领。到了屋里先汏个浴，睏几个钟头，一清老早还要出现勒轧得要死个地铁里向个…… 搿座城市总体属于阴。南昌路、陕西南路、复兴西路，到处侪是别致个小店。推门进去，首先看见个是曾经沧海、风骚妩媚个老板娘。 上海女人是精致、实惠、拎得清，懂事体、识相、了解风情个。伊勒场面浪向可以拨足男人个面子，私底下呢，就是另外一种样子了。勒上海女人个眼睛里向，男女之间关系个最高境界就是医生搭病人个关系了。男人假使搭伊讲，“侬啊侬啊，真真是我个一贴药”，葛就是对女人个最高个褒奖。反过来，女人也会得吃药个，还会得上念头瘾。一日勿见，像煞隔了三秋，想煞恨煞，拿伊呒啥办法。上海女人个冷漠搭仔世故也是一种自我保护，像大闸蟹个壳，里向个肉是软个。一旦爱上了，葛就是掏心掏肺，在所勿惜个。翻翻张爱玲搭仔胡兰成个老账就可以晓得，风流缠绵过后，受伤个大多数还是女人。 上海男人一度是声名远扬个。现在，绝大多数是独生子女，新一代上海男人当中，会得烧菜、会得修家生、邪气体贴人个是越来越少了。上海男人搭仔上海个老工业一样，剩下来个也只有名声了。但是，无论是辣里弄、洋房里，还是勒小区、新村里，阿里有得老个款色个上海牌手表，阿里就有得买、汏、烧一锅子端个老派男人。 上海言话是市井个，马路浪向个，张家长李家短个，所以是邪气活泼、生动、活灵活现个；上海言话里呒没冠冕堂皇个词语，到是有勿少是柴米油盐、鸡毛蒜皮。上海人勿讲“爱”，只讲“欢喜”，迭就道出了爱个本质，更加俗气点个讲是“吃定侬”、“吃煞侬”，老有几分“食色、性也”个无赖存在，生生世世，饮食男女。 自从开埠以来，勿少中、英文“混搭”个词到现在还勒用，成就了上海言话个独特趣味。由“monkey精”而成为了“门槛精”，由“cheat佬”而变成了“赤佬”，由“混chance”而变成“混腔斯”，由“发dear”而成为了“发嗲”。发嗲有交关种类，小朋友发个是糯米嗲，女小囡发个是豆腐嗲，中老年妇女叫做发咸菜嗲。 情侣之间散散步，叫“轧马路”。散步结束回去晏了，弄堂口个冷面爷叔会得问伊一句，“今朝数了几根电线木头啊？”分手了叫做“坳断”；分手了以后再去复合，就叫做“吃回汤豆腐干”了。 乘一趟49路，从外滩经过人民广场，到从前个法租界，经过个是最最繁华个商业区，也经过最最幽静个小马路。一路浪向，听听用上海言话播报个站头名字，看看窗外头个高高大大个梧桐树，圣三一教堂、跑马总会、静安别墅、犹太总会、白公馆、普希金头像、爱庐、宋子文官邸、国际礼拜堂、中央研究院……老建筑个身影一眼眼往后头退去。 搿个就是我深深眷恋个上海。