广播专辑 弄堂茄山胡05 碰到阿扎里

我碰到了阿诈里 搿趟我房间搬场，叫勒一辆二顿卡车，结果来了一辆五吨卡车，还装弗下。我一直想弗老，我屋里厢么事多是多，别过弗应该多到五吨开车也装弗下去。啊是碰到赤佬勒。弗得弗还要装第二车。后来我想通了，第一车一定当中是空心额，车子根本呒没装满，只弗过从外头看弗出车子当中是空额，伊拉就是为了多攒第二车额钞票。外加多攒额钞票弗需要上交，侪是外快铜钿。 搬好场后要请人来解决一眼问题。小区帮忙请来勒厂家来额人来清洗脱排油烟机。结果来了两个人。一个女人负责清洗脱排油烟机，男 额检查我额煤气灶。印象当中煤气灶呒没问题，既然也来人了，搿也就让伊看看，反正又看弗坏额。 搿个女人勒拉清洗油烟机。伊辣末生头从油烟机里向拿出一堆油腻额么事脱我讲，侬看油烟机额油封坏脱勒，要换勒。一尺50块，共8尺大概400块。我脱伊讲，只要清洗弗需要侬换么事。伊讲油封弗换回得着火额，侬弗换我就拿搿眼么事放回去。我讲侬是骗子，油烟机根 本就呒没所谓油封搿样么事，我研究过额，搿眼油封垃圾是侬自介带来额。伊嘀嘀咕咕勒交关辰光。到辣末赶伊拉走额辰光，搿个女人讲了一句老实闲话，伊讲：“捺侪是聪明人，今朝是我输畀侬” 再来讲搿个男人同时也勒拉忙，伊打开了煤气灶检查，伊讲我额煤气灶有毛病，打火放手后煤气额火自己会灭脱。我讲煤气弗需要修理，本来就是好额。侬居然来了，就畀侬看看，哪能就弗好打火勒呢？我拿搿两个人侪赶了跑。 第二天，我请来了老底子认得额师傅上门来看。伊一看就讲，侬看有人做手脚勒，侬看几个接头畀伊拨出来，当然打弗出火来。搿种人 忒盎三，用搿种方式来攒钞票，弗是人。师傅就收了40块上门费。 我额教训是，弗怪啥人讲伊是厂方额维修人员，侪弗要相信。一定要确认是从生产单位官网浪向额电话侪是联系到真正厂方额，其它电 话侪是阿诈里额电话。 阿扎里勒拉侬额日常生活里向天天可以碰到。我晓得勒，为啥上海人额脑子比较灵光，是畀千千万万阿诈里锻炼出来额。侬讲，啥人愿 意畀人骗？啥人愿意做憨大？人弗就是搿恁介吃过亏后长记性勒，越来越聪明勒。 搿位朋友，现在额社会里向阿诈里多是多得了吓煞人凹。包括电信诈骗，侪是空麻袋背米，大家要当心啊。