介绍:
老底子上班忙是忙了一眼，别过还是蛮开心额。也碰到交关好白相额事体，今朝脱大家分享。
中国人拿有工作做叫作饭碗。有一趟呢叫来交关朋友聚会，有额朋友还带来勒自己拿手好菜，大家吃吃白相相，茄茄三胡，闹闹忙忙，开开心心。聚会结束后朋友侪回去勒。伊拉走脱后我发觉其中一个朋友忘记拿带菜来额饭碗带回去勒。想想弗是啥额大事体，下趟再讲。第二天夜道9点钟搿位老兄来拿饭碗。我想侬到蛮急吼吼额嘛，为了一只饭碗特地跑一趟。要走额辰光，伊一副腔调老怪额，辣末生头，伊脱我讲，搿幢事体真是天晓得，忒刮三勒。我问伊啥额事体，介瞎人到怪额？伊讲啊：“搿是人生一大教训，下趟到人家屋里厢千万弗好忘记拿饭碗带回去。阿拉昨日忘记脱拿饭碗带回去，今朝我老婆就畀公司解聘勒，上班额饭碗头也畀敲脱勒。乃么饭碗头真额落脱勒。葛佬人生教训，覅忘记侬额饭碗。”
讲到阿拉公司啊，伊有好几栋大楼。有一趟公司开会，勒拉隔壁大楼，我从来呒没去过。开会开到一半，我要拆私，就走到二楼上厕所。从厕所里向出来个辰光，抬头一看，辣末生头看到对面厕所们浪向写着：“男厕所”，啥意思，搿么我刚刚走出来额就弗是弗是男厕所唠？我魂灵头还畀吓出来勒，拔腿就逃。我想出鬼勒，我刚刚走错脱厕所间勒？搿庄事体我呒没脱任何人讲起过，忒退灶司勒。接下来额号头又开会了，勒拉老地方。我又要上拆私勒，我想搿趟我弗会搞错脱勒伐？我走到两楼，左看看右看看，册那，我碰到赤佬勒，居然左右两个厕所侪是男厕所，搿搭居然呒没女厕所。葛唠我上趟呒没走错，我额姆妈娘唉，自介吓自介，也要吓傻人额。后来别人脱我讲，因为大楼里向侪是男职工，葛佬两楼就拿男厕所改成女厕所勒。
公司里吃饭是大家比较放松额辰光，大家一头吃饭一头茄三胡。有一趟吃中饭额辰光，阿拉勒拉讨论食品安全，我考大家一个问题，中国食品安全标志QS是啥个意思，一位同事马上反应过来讲是英文Quality System个简称。我告诉伊拉，事实浪是中文”去死”额拼音第一个字母组成。我额闲话弄得伊拉吓勒一跳，一记头，大家一眼声音也呒没勒。交关辰光后，一个后生叹了一声气讲：中华文化，真是博大精深啊！
搿么，单位吃额么事好伐呢？我本来蛮有信心额。有一趟回到屋里厢，老婆同情额看牢我，告诉我今朝伊勒拉菜场买洋山芋额时候，卖菜师傅脱伊讲：覅拣，搿洋山芋只只好额，不好额侪卖畀人家单位食堂了。
唉个辰光，单位有班车。勒拉班车浪向有5个法国人。我发觉车子浪向额外国人勒拉看中文书，中国人勒拉看英文书。蛮好白相额。
捺听到过蒂森克俘伯伐？蒂森克俘伯是阿拉公司额德国品牌电梯，伊拉额电梯就像伊额名字一样刮三。乘搿电梯额最开心额事体就是讲搿电梯个笑话。比如，有一趟大家侪轧勒拉电梯里向，一个人问搿电梯为啥层层停，另外一个人告诉伊，讲不定挂三额事体勒拉后头睐，搿电梯来得勒欢喜自说自话每半层停一记。又一个人讲，搿个电梯忒慢，另外一个人讲，乘搿个电梯要有耐心，大家讲三只故事，就差不多到了。又一个人接下去讲：我昨日乘搿电梯，伊辣末生头落下去三层，然后再直接往高头跑三层，然后再一记头跌倒底层，瞎煞人耦。
后头呢公司搬到勒新额办公地址，每个人发了工卡，工卡浪向有照名，名字脱仔工号，又畀每个人发了一只黑色额卡套，卡套正面看是一个黑框，当中透明。公司要每个人拿工卡插到卡套里向，照片脱仔名字正好勒拉黑框里向额透明塑料额地方，搿恁介呢，大楼里向几百个员工人人侪带勒搿恁介一只里向有自介照片脱仔名字额黑色小框框勒拉胸前上班。看着每个同事胸浪向黑框里向额照片，觉着搿搭额领导，是实实在在额滑稽。 我到楼下头文具店里向买了咖啡色额塑料套，分发畀周围额同事。
记得又一天公司开会，公司会议室不够用，葛佬今朝额安全教育会议勒拉旁边酒店额会议室举行。走进大堂辰光，看到两个会议指示牌：一个是“研发部安全会议201会议室。”就怪我呒没事体寻事体做，又多看了旁边另外一个会议指示牌，高头写勒：“浦东新区殡葬部门联席会议301会议室。”看了我心里向瞎牢牢额。唉日额安全教育会议，大家听得勒特别仔细。不晓得搿是不是公司领导额又一个黑色幽默。
同样勒拉搿天额会浪向，一个老外副总脱仔一个中国副总分别做报告，两人侪是用中国闲话作报告。别过，老外额中文我全能听懂，唉个中国人额中文我只好听懂50%。
勒拉公司里向讲英文额机会不多了。连老外看到我侪用中文讲闲话。
大家还在听
