特别广播 地铁报站：上海闲话讲起来

地铁报站：上海闲话讲起来 　　文/任向阳 钱乃荣 　　上海闲话是上海迭座城市个血脉，血脉流通，城市就会得保持活力——就像大家感受老深个地铁一样，假使地铁呒没形成网络，葛末地铁勿会得充分发挥方便快捷个作用。同样，要是方言只局限垃屋里向讲，形勿成像现在地铁搿能介【这样】个“网络”，葛末，方言就勿能够真正起到伊个交流作用。上海闲话作为上海个大众文化，也完全应该垃本地个多种大众场合得到传播机会。 　　现在，仍旧有1000多万人平常口头浪讲上海闲话，还有得报纸开专版、电台播音、电视台办节目、公交报站名、课程进学堂、文化活动竞赛咾啥【等等】传播方式，不过，还可以传播得更加广泛一点。可以讲，用上海闲话报地铁站名，也是一种必然个选择。 　　搿个是因为，一，地铁用上海闲话报站，体现了一个城市对文化个坚守，也是一种文化个自信，现代化交通工具是完全应该、可以接纳传统个本地文化个，上海应该首先成为世界上语言、文化多元和谐个乐园，只要肯安排，有地方文化特色个方言是可以担当得起地铁报站个服务职能个，搿个已经被其他用方言垃地铁报站个城市证明得清清爽爽了。关键是有关部门重视勿重视，是勿是立即行动起来。二，搿个也是人群交流个需要，上海个地铁应该首先为上海人民服务好。垃地铁听到报站辰光讲个上海闲话，长期垃国内、国外其他地方生活回来个人，就触及得着一种无形个乡愁情结；勿熟悉上海闲话个人，可以从地铁个报站声音当中体会到上海迭座城市个文化特质；经常讲上海闲话个人，会得觉着特别亲切。地铁浪个上海闲话，为多元文化社会个人际交流，又开开了一扇本来就有个门。三，方言需要有一个好个语言环境。地铁是大容量个公共交通工具，是城市个基础服务设施。本地居民搭仔（与）八方来客侪要乘用地铁，各种人群汇聚一道，普通闲话是首选。先用了普通闲话报站，再加上上海闲话报站，听个人多，既可以各取所需，还可以用一定个形式垃地铁搿个人来人往的公共空间扩展上海闲话个影响。 　　具体来讲，地铁乘员众多，正可以发挥垃人群当中传承上海闲话个特殊作用；地铁浪还有得线路图、有得普通闲话先报站名、乘员还可以看得到一个个车站，所以听到上海闲话更加容易理解；另外，一趟趟乘地铁可以反复听上海闲话，积累起来会印象更深；特别要讲清爽个是，由于普通闲话先报站，所以是勿会得影响推广普通闲话个。国家领导人最近讲，推广普通话搭仔加强对方言的抢救保护并勿矛盾。