介绍:
洋泾浜个故事
周钰栋
文/周钰栋
现在个延安东路辣拉老里八早个辰光其实是一条河浜，名字就叫“洋泾浜”。就是辣拉十九世纪个末叶，随着外国帝国主义个入侵，搿条河浜个北面成了英租界，西南面成了法租界。自从河浜两旁边成了租界以后，外国人就开始改造起搿条浜。伊拉先是用条石驳起了堤岸，并且辣堤岸浪竖了一排铁栏杆。再辣拉河浜个两旁边筑了两条马路，便于交通，迭两条马路，北面一条叫松江路，南面一条叫孔子路。接下来又辣拉路个两旁边造了交关房子，住辣里向个人有外国人也有中国人。外国人搭仔中国人碰了一道，总关要交流伐，于是，有排洋派个中国人就开始学起了外国闲话。要晓得，迭种“学人家个闲话”侪是辣拉白相相个当中，东插一句西插一句学个，哪能好与人家辣拉正规个学堂里跟辣老师后头像像样样个学比呢？告咾辣迭能样子个地方、环境下头学出来个外国闲话，勿要讲语法了，就是音调也是南腔北调个，而且讲法讲法还会辣末生头带出几句中国闲话，让人家笑脱牙齿。后来，大家就拿迭种蹩脚来西个外国闲话叫做“洋泾浜外国闲话”。而且，迭种讲法一直延用到今。
大家还在听
