广播专辑 弄堂茄山胡53 碧绿生青个毛豆子

广播147 弄堂茄山胡 碧绿生青个毛豆子 2013-10-21 18:03来源：新民晚报 新民网编辑：田诗雍 作者：任向阳 　　照现在个讲法，毛豆子是黄豆个“青春版”。阿拉觉着，搿种新鲜带壳（连荚）个菜用大豆，完全称得上是蔬菜当中个“小王子”。 　　先是卖相赞【外观漂亮】。新鲜个毛豆子，迓垃月牙形个毛茸茸个绿豆壳当中，剥伊出来，水灵灵，嫩搭搭，碧碧绿，胖笃笃，鲜鲜亮，来得个讨人欢喜。烧熟仔呢，毛豆节曲里带弯，高低起伏，比生个辰光绿得来更加仔深；毛豆子油光锃亮，绿肉穿透白衣，浑身连青带翠…… 　　顶重要个是吃口好。刚刚上市个辰光，豆粒子还呒没发福，一歇歇就烧熟了，轻轻较一咬，又滑嫩又新鲜。买着梗个品种，吃起来蛮爽脆，有一种梗香垃里头。碰着糯个“牛踏扁”咾啥个品种，酥里夹糯，轻嚼慢品，交关有味道。毛豆子老了，多烧一歇，也邪气足实。特别是家常经典菜盐水毛豆荚，豆壳个植物清香告毛豆子个咸鲜，吃上去感觉来得个好。 　　还有就是营养足。毛豆子个膳食纤维含量比芹菜高出三倍多，对降低血压、胆固醇，改善便秘侪有好处。搿当中个钾可以预防热天介穷出汗弄得来钾缺失引起个中暑。毛豆子里向，各种维生素、矿物质咾啥个含量侪老高个，特别是有种叫卵磷脂个物质，对小朋友大脑发育来得个有帮助。 　　当然还有菜式多。毛豆子可以煠【zha，水煮】，也好炖、炒、烧、氽、焐，还好炙，青浦朱家角、金泽有得老好吃个炙青豆。毛豆子单烧是一道菜，跟茭白、洋山芋、丝瓜、黄瓜、辣椒、竹笋、咸菜、白菜、韭菜、山药、香菇、豆腐干、芦笋、黑木耳、胡萝卜咾啥个交关素菜侪好搭道做菜。告鸡、鸭、鱼、肉、虾、蟹摆垃一道也蛮有腔调。红烧、白烧、糖醋、川汤、冷拌随侬做，开一百只毛豆子菜单也勿会得碰鼻头。盐水毛豆荚，咸淡香辣调料侬想吃啥就放啥；毛豆子炒萧山萝卜干，盐摆水里，拿豆煠了七分熟，热油镬炒萝卜干丁，加生抽收干，摆毛豆子，加盐、糖、五香粉，色彩好看，味道丰富；还有红烧黄鱼，毛豆子告鱼一道笃【慢煮】，鱼个鲜味道笃进豆个肉里向，豆比鱼还要好吃。 　　压末就是常庄有。毛豆子春、夏、秋三季侪好种，侪有得上市，可以从五一节吃到国庆节。另外，垃大酒店里一年四季侪有得糟毛豆当冷盆。上海人还欢喜中秋节吃芋艿烤毛豆节，讨一个有“余”、“吉”祥个好口彩。 　　上世纪七十年代，我还看到过农民拿整棵毛豆连秸拔起来，论棵卖毛豆个，搿既好证明物事个清鲜，又讨着仔买菜人个欢喜。豆剥光之后，连牢仔毛豆壳个秸杆晒干仔又多出了豆秸柴，勿少人家拿来引火生煤球炉，火点着仔个噼噼啪啪个声响，像是垃拉放鞭炮。 　　现在个人啊，老忙个，葛咾菜场里摊贩剥好仔毛豆卖肉，一盆盆碧绿生青个毛豆子等侬去买。